ᱵᱟᱵᱟ ᱵᱟᱹᱠᱷᱩᱞ

ᱵᱟᱵᱟ ᱵᱟᱹᱠᱷᱩᱞ ᱨᱤᱱ ᱵᱟᱦᱟ ᱠᱟᱱᱟ ᱠᱚ ᱦᱚᱯᱚᱱ ᱮᱨᱟ ᱫᱚ ᱾ ᱢᱤᱫ ᱜᱷᱟᱨᱚᱸᱡᱽ ᱨᱮ ᱠᱩᱲᱤ ᱜᱤᱫᱽᱨᱟᱹᱭ ᱡᱟᱱᱟᱢ ᱞᱮᱱ ᱠᱷᱟᱱ ᱡᱟᱱᱟᱢ ᱛᱟᱨᱟ ᱠᱷᱚᱱ ᱜᱮ ᱟᱡᱟᱜ ᱵᱟᱞᱮ ᱠᱮᱸᱠᱚᱴᱚᱨ ᱟᱲᱟᱝ ᱛᱮ ᱵᱟᱵᱟ ᱵᱟᱹᱠᱷᱩᱞ ᱮ ᱟᱸᱫᱚᱲ ᱠᱟᱜᱼᱟ ᱾ ᱛᱟᱲᱟᱢ ᱮ ᱪᱮᱫ ᱞᱮᱱ ᱠᱷᱟᱱ ᱡᱟᱸᱜᱟ ᱨᱮᱱᱟᱜ ᱯᱟᱹᱭᱬᱤ ᱥᱟᱰᱮ ᱛᱮ ᱨᱟᱪᱟ ᱪᱷᱟᱴᱠᱟ ᱛᱟᱠᱮᱨ ᱠᱚᱜᱼᱟ ᱾ ᱦᱟᱨᱟ ᱠᱟᱛᱮ ᱥᱟᱡᱟᱣᱜ ᱮ ᱪᱮᱫ ᱞᱮᱠᱷᱟᱱ ᱛᱤ ᱨᱮᱱᱟᱜ ᱥᱮᱠᱮᱡ ᱥᱟᱠᱚᱢ ᱥᱮᱠᱲᱮᱡ ᱥᱟᱰᱮ ᱛᱮ ᱵᱟᱵᱟ ᱵᱟᱹᱠᱷᱩᱞ ᱠᱚᱬ ᱠᱚᱪᱟᱭ ᱪᱚᱦᱚᱲ ᱠᱟᱜᱼᱟ ᱾ ᱟᱡᱟᱜ ᱚᱰᱚᱠ ᱵᱚᱞᱚᱱ ᱨᱚᱲ ᱞᱟᱸᱫᱟ, ᱜᱩᱱ ᱵᱮᱵᱷᱟᱨ ᱫᱚ ᱵᱟᱵᱟ ᱵᱟᱹᱠᱷᱩᱞ ᱨᱮᱱᱟᱜ ᱢᱤᱼᱢᱤᱫᱴᱟᱹᱜ ᱥᱟᱡᱟᱣ ᱥᱟᱯᱟᱵ ᱜᱮ ᱠᱟᱱᱟ ᱾

ᱦᱟᱨᱟᱵᱩᱨᱩ ᱠᱟᱛᱮ ᱡᱟᱶᱟᱭ ᱚᱲᱟᱜ ᱮ ᱵᱤᱫᱟᱹᱭ ᱞᱮᱱ ᱠᱷᱟᱱ ᱵᱟᱵᱟ ᱵᱟᱹᱠᱷᱩᱞ ᱫᱚ ᱟᱹᱰᱤ ᱜᱮ ᱱᱤᱥᱚᱱ ᱜᱚᱫᱚᱜᱼᱟ ᱾ ᱦᱚᱯᱚᱱ ᱮᱨᱟ ᱡᱟᱶᱟᱭ ᱚᱲᱟᱜ ᱨᱮᱭ ᱛᱟᱦᱮᱸᱱ ᱡᱚᱦᱚᱜ ᱫᱚ ᱵᱟᱵᱟ ᱵᱟᱹᱠᱷᱩᱞ ᱨᱮᱱᱟᱜ ᱠᱟᱸᱛ, ᱫᱩᱣᱟᱹᱨ, ᱨᱟᱪᱟ, ᱪᱷᱟᱴᱠᱟ, ᱠᱷᱩᱸᱫᱽᱲᱤ ᱨᱮᱱᱟᱜ ᱠᱚᱬ ᱠᱚᱪᱟ ᱥᱟᱱᱟᱢᱟᱜ ᱠᱟᱹᱦᱤᱸᱥ ᱢᱚᱱᱮᱨᱮ ᱟᱡᱟᱜ ᱦᱤᱨᱤ ᱦᱤᱡᱩᱜ ᱦᱚᱨ ᱠᱚᱭᱚᱜ ᱨᱮᱭ ᱛᱟᱦᱮᱸᱱᱟ ᱾ ᱡᱟᱦᱟᱸ ᱛᱤᱥ ᱢᱤᱫ ᱰᱚᱸᱰᱮᱠ ᱦᱚᱯᱚᱱ ᱮᱨᱟ ᱡᱟᱶᱟᱭ ᱚᱲᱟᱜ ᱠᱷᱚᱱ ᱵᱟᱵᱟ ᱵᱟᱹᱠᱷᱩᱞ ᱛᱮ ᱦᱤᱨᱤᱭ ᱦᱤᱡᱩᱜ ᱨᱮᱦᱚᱸ ᱵᱟᱵᱟ ᱵᱟᱹᱠᱷᱩᱞ ᱨᱮᱱᱟᱜ ᱠᱚᱬ, ᱠᱚᱪᱟ, ᱨᱟᱪᱟ, ᱪᱷᱟᱴᱠᱟ, ᱠᱩᱰᱟᱹᱢ ᱥᱟᱛᱮ ᱫᱟᱨᱮ ᱱᱟᱹᱬᱤ ᱨᱟᱹᱥᱠᱟᱹ ᱛᱮ ᱪᱷᱤᱞᱠᱟᱹ ᱪᱷᱤᱞᱠᱤ ᱪᱚᱦᱚᱲ ᱨᱩᱣᱟᱹᱲ ᱜᱚᱫᱚᱜᱼᱟ ᱾ ᱚᱠᱚᱭ ᱮ ᱧᱮᱞ ᱧᱟᱢᱟ, ᱩᱱᱤᱭ ᱟᱹᱭᱠᱟᱹᱣ ᱧᱟᱢᱟ, ᱩᱱᱠᱩ ᱠᱚᱣᱟᱜ ᱠᱩᱥᱤ, ᱨᱟᱹᱥᱠᱟᱹ ᱛᱤᱱᱟᱹᱜ ᱟᱠᱚᱣᱟᱜ ᱠᱚᱞᱮ ᱨᱮ ᱠᱷᱤᱞᱰᱩ ᱮᱱᱮᱡ ᱟᱛᱮᱭ ᱦᱟᱨᱟ ᱟᱠᱟᱱ ᱦᱚᱯᱚᱱ ᱮᱨᱟ ᱧᱟᱢ ᱨᱩᱣᱟᱹᱲ ᱠᱟᱛᱮ ᱾ ᱩᱱᱠᱩᱣᱟᱜ ᱢᱩᱞᱩᱡ ᱞᱟᱸᱫᱟ, ᱠᱩᱥᱤ ᱛᱮ ᱜᱩᱬᱩᱼᱜᱩᱬᱩ ᱥᱮᱨᱮᱧ ᱨᱟᱦᱟ ᱩᱱᱤ ᱜᱮᱭ ᱟᱸᱡᱚᱢ ᱫᱟᱲᱮ ᱠᱮᱭᱟ ᱾

ᱦᱚᱯᱚᱱ ᱮᱨᱟ ᱡᱟᱶᱟᱭ ᱚᱲᱟᱜ ᱵᱤᱫᱟᱹᱭ ᱠᱟᱛᱮ, ᱡᱟᱱᱟᱢ ᱚᱲᱟᱜ ᱠᱷᱚᱱ ᱫᱚ ᱵᱟᱭ ᱮᱴᱟᱜᱚᱜ ᱠᱟᱱᱟ, ᱵᱚᱨᱚᱢ ᱵᱟᱨᱭᱟ ᱚᱲᱟᱜ ᱮ ᱢᱤᱫᱴᱟᱹᱝ ᱮᱫᱼᱟ, ᱮᱴᱟᱜ ᱯᱟᱹᱨᱤᱥ ᱨᱮ ᱵᱚᱞᱚ ᱠᱟᱛᱮ ᱡᱟᱱᱟᱢ ᱯᱟᱹᱨᱤᱥ ᱠᱷᱚᱱ ᱫᱚ ᱵᱟᱝ ᱜᱮᱭ ᱪᱩᱰᱟᱹᱨᱚᱜᱼᱟ, ᱵᱚᱨᱚᱢ ᱵᱟᱨᱭᱟ ᱯᱟᱹᱨᱤᱥ ᱥᱟᱶ ᱥᱟᱹᱜᱟᱹᱭ ᱮ ᱡᱚᱲᱟᱣ ᱮᱫᱼᱟ ᱾ ᱡᱟᱶᱟᱭ ᱚᱲᱟᱜ ᱨᱮᱭ ᱛᱟᱦᱮᱸᱱ ᱨᱮᱦᱚᱸ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱠᱚ ᱥᱤᱨᱡᱟᱹᱣ ᱮᱱ ᱛᱟᱭᱚᱢ ᱡᱟᱶᱟᱭ, ᱜᱤᱫᱽᱨᱟᱹ ᱠᱚ ᱟᱹᱰᱤ ᱜᱚᱨᱚᱡᱽ ᱛᱮᱭ ᱟᱹᱜᱩ ᱠᱚᱣᱟ ᱡᱟᱱᱟᱢ ᱵᱟᱵᱟ ᱵᱟᱹᱠᱷᱩᱞ ᱾ ᱟᱡ ᱨᱤᱱ ᱦᱚᱯᱚᱱ ᱞᱟᱹᱜᱤᱫ ᱦᱚᱸ ᱢᱟᱢᱚ ᱚᱲᱟᱜ ᱫᱚ ᱱᱤᱡᱚᱨ ᱚᱲᱟᱜ ᱠᱷᱚᱱ ᱦᱚᱸ ᱱᱤᱡᱚᱨ, ᱵᱚᱸᱜᱟ ᱵᱟᱨᱟᱵᱟᱹᱨᱤ ᱢᱟᱢᱚ ᱟᱨ ᱢᱟᱢᱚ ᱵᱟᱹᱠᱷᱩᱞ ᱫᱚ ᱥᱚᱨᱚᱜᱽ ᱵᱚᱸᱜᱟ ᱛᱷᱟᱱ ᱥᱚᱢᱟᱱ ᱾ ᱡᱚᱛᱚ ᱠᱷᱚᱱ ᱱᱤᱨᱟᱹᱭ, ᱡᱚᱛᱚ ᱠᱷᱚᱱ ᱯᱟᱨᱟᱝᱜᱚᱛ ᱴᱷᱟᱶ ᱾

ᱢᱟᱹᱱᱢᱤ ᱡᱤᱭᱚᱱ ᱱᱚᱶᱟ ᱫᱷᱟᱹᱨᱛᱤ ᱨᱮ ᱦᱤᱡᱩᱜ ᱥᱮᱱᱚᱜ ᱥᱮ ᱡᱟᱱᱟᱢ ᱜᱩᱨ ᱫᱚ ᱟᱹᱰᱤ ᱜᱮ ᱥᱟᱹᱨᱤᱭᱟᱜ ᱨᱤᱛ ᱠᱟᱱᱟ ᱾ ᱡᱟᱱᱟᱢ ᱟᱭᱳ ᱵᱟᱵᱟ ᱠᱤᱱ ᱵᱚᱸᱜᱟᱛᱟᱞᱟ ᱞᱮᱱ ᱠᱷᱟᱱ ᱟᱭᱳ ᱵᱟᱵᱟ ᱫᱚ ᱢᱤᱫ ᱦᱚᱯᱚᱱ ᱮᱨᱟᱦᱟᱜ ᱟᱺᱜᱤᱵᱷᱟᱨ ᱫᱚ ᱦᱚᱯᱚᱱ ᱟᱜ ᱛᱤ ᱨᱮ ᱠᱤᱱ ᱪᱟᱞ ᱚᱴᱚ ᱠᱟᱜᱼᱟ ᱾ ᱵᱟᱹᱲᱛᱤ ᱵᱟᱝ ᱨᱮᱦᱚᱸ, ᱠᱷᱟᱱᱮᱠ ᱡᱟᱦᱟᱸ ᱛᱤᱥ ᱠᱚᱨᱮ ᱦᱚᱯᱚᱱ ᱮᱨᱟ ᱡᱟᱱᱟᱢ ᱟᱭᱳ ᱵᱟᱵᱟ ᱚᱲᱟᱜ ᱦᱤᱨᱤ ᱦᱤᱯᱤᱨᱤᱭ ᱦᱤᱡᱩᱜᱼᱟ, ᱟᱡ ᱨᱤᱱ ᱵᱟᱨᱮ ᱵᱟᱹᱦᱩ ᱦᱚᱛᱮᱛᱮ ᱟᱛᱟᱝ ᱫᱟᱨᱟᱢ ᱫᱚ ᱦᱩᱭᱩᱜ ᱢᱟᱜᱮ ᱾ ᱪᱮᱫᱟᱜ ᱵᱟᱝ ᱢᱟ ᱵᱟᱵᱟ ᱵᱤᱫᱟᱹᱞ ᱫᱚ ᱠᱚᱲᱟ ᱵᱚᱭᱦᱟ ᱜᱮ ᱢᱤᱫ ᱢᱤᱥᱨᱟ ᱞᱟᱹᱜᱤᱫ ᱵᱟᱵᱟ ᱵᱟᱨᱟᱵᱟᱹᱨᱤᱭ ᱛᱤᱸᱜᱩᱱᱟ ᱾ ᱛᱤᱱ ᱵᱷᱩᱨ ᱢᱤᱫ ᱢᱤᱥᱨᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱤᱣᱤᱫ ᱡᱤᱭᱚᱱ ᱮ ᱛᱟᱦᱮᱸᱱᱟ, ᱩᱱ ᱵᱷᱩᱨ ᱫᱚ ᱢᱤᱫ ᱢᱤᱥᱨᱟ, ᱡᱟᱱᱟᱢ ᱟᱭᱳ ᱵᱟᱵᱟ ᱚᱲᱟᱜ ᱟᱡᱟᱜ ᱚᱲᱟᱜ ᱞᱮᱠᱟ ᱜᱮᱭ ᱦᱤᱡᱩᱜ ᱥᱮᱱᱚᱜᱼᱟ ᱾ ᱛᱤᱥ ᱮ ᱢᱚᱱᱮᱭᱟᱭ ᱦᱤᱡᱩᱜᱼᱟ, ᱫᱩᱠ ᱥᱩᱠ ᱨᱮ ᱛᱤᱱᱟᱹᱝ ᱫᱤᱱ ᱛᱟᱦᱮᱸ ᱥᱟᱱᱟ ᱮᱭᱟ ᱛᱟᱦᱮᱸ ᱫᱟᱲᱮᱭᱟᱜ ᱟᱭ ᱾

ᱡᱟᱱᱟᱢ ᱚᱲᱟᱜ ᱨᱮ ᱵᱟᱵᱟ ᱵᱤᱫᱟᱹᱞ ᱢᱤᱫ ᱢᱤᱥᱨᱟ ᱞᱟᱹᱜᱤᱫ ᱠᱚᱲᱟ ᱵᱚᱭᱦᱟ ᱜᱮᱛᱚ ᱵᱟᱵᱟ ᱥᱚᱢᱟᱱ ᱮ ᱛᱤᱸᱜᱩᱱᱟ, ᱫᱩᱠ ᱥᱩᱠ ᱨᱮᱭ ᱜᱚᱲᱚ ᱟᱭᱟ, ᱟᱱᱟᱴ ᱮᱴᱠᱮᱴᱚᱬᱮ ᱠᱷᱚᱱ ᱚᱣᱟᱨ ᱞᱟᱹᱜᱤᱫ ᱦᱚᱸ ᱟᱡᱟᱜ ᱥᱟᱢᱟᱝ ᱯᱟᱹᱪᱷᱞᱟᱹ ᱨᱮ ᱵᱟᱹᱲᱤᱡ ᱫᱟᱨᱟᱢ ᱡᱟᱸᱜᱮ ᱠᱷᱩᱱᱴᱤ ᱞᱮᱠᱟᱭ ᱛᱤᱸᱜᱩ ᱛᱟᱦᱮᱸᱱᱟ ᱾ ᱡᱟᱦᱟᱸᱭ ᱠᱩᱲᱤ ᱦᱚᱯᱚᱱ ᱨᱤᱱ ᱠᱚᱲᱟ ᱵᱚᱭᱦᱟ ᱠᱚ ᱛᱟᱦᱮᱸᱱᱟ, ᱩᱱᱠᱩ ᱠᱩᱲᱤ ᱦᱚᱯᱚᱱ ᱫᱚ ᱱᱚᱶᱟ ᱫᱷᱟᱹᱨᱛᱤ ᱨᱤᱱ ᱡᱚᱛᱚ ᱠᱷᱚᱱ ᱠᱚᱯᱟᱲ ᱟᱱ ᱢᱟᱹᱱᱢᱤ ᱠᱟᱱᱟ ᱠᱚ ᱾ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱚᱛᱚ ᱠᱷᱚᱱ ᱥᱩᱠ ᱟᱨ ᱨᱩᱠᱷᱤᱭᱟᱹ ᱨᱮ ᱛᱟᱦᱮᱸᱱ ᱢᱟᱹᱱᱢᱤ ᱠᱟᱱᱟ ᱠᱚ ᱾ ᱟᱡ ᱪᱮᱛᱟᱱ ᱡᱟᱦᱟᱸᱱᱟᱜ ᱵᱮᱵᱟᱹᱲᱤᱡ ᱦᱩᱭᱩᱜ ᱨᱮᱱᱟᱜ ᱵᱚᱛᱚᱨ ᱠᱷᱚᱱ ᱥᱟᱺᱜᱤᱧ ᱨᱮᱭ ᱛᱟᱦᱮᱸᱱᱟ ᱾ ᱡᱟᱶᱟᱭ ᱚᱲᱟᱜ ᱨᱮᱭ ᱛᱟᱦᱮᱸᱱ ᱨᱮᱦᱚᱸ ᱢᱤᱫ ᱢᱤᱥᱨᱟ ᱡᱟᱦᱟᱸᱱᱟᱜ ᱮᱴᱠᱮᱴᱚᱬᱮ ᱞᱟᱦᱟᱨᱮ ᱟᱡᱟᱜ ᱢᱚᱱᱮᱨᱮ ᱢᱤᱫ ᱱᱤᱨᱚᱲ ᱯᱟᱨᱟᱝᱜᱚᱛ ᱩᱭᱦᱟᱹᱨ ᱦᱮᱡ ᱟᱭᱟ, ᱵᱟᱵᱟ ᱵᱟᱹᱠᱷᱩᱞ ᱨᱮ, ᱵᱟᱵᱟ ᱵᱟᱨᱟᱵᱟᱹᱨᱤ ᱵᱟᱨᱮᱧ ᱢᱮᱱᱟᱭ ᱠᱷᱟᱱ ᱤᱧᱟᱜ ᱟᱨ ᱪᱮᱫ ᱦᱩᱰᱩᱜ, ᱤᱧᱟᱜ ᱟᱨ ᱪᱮᱫ ᱟᱱᱟᱴ ᱮᱴᱠᱮᱴᱚᱬᱮ ᱾

ᱥᱟᱶᱛᱟ ᱛᱟᱞᱟᱨᱮ ᱡᱟᱦᱟᱸ ᱛᱤᱥ ᱥᱟᱶᱛᱟ ᱦᱚᱛᱮᱛᱮ ᱡᱟᱦᱟᱸᱱᱟᱜ ᱢᱤᱥᱨᱟᱭ ᱵᱚᱭᱟᱱ ᱵᱟᱨᱚᱱ ᱜᱚᱫᱚᱜ ᱨᱮ, ᱟᱡ ᱨᱤᱱ ᱵᱟᱨᱮ ᱵᱚᱭᱦᱟ ᱜᱮ ᱟᱡ ᱥᱟᱶᱨᱮ ᱠᱷᱟᱢ ᱠᱷᱩᱱᱴᱤ ᱞᱮᱠᱟ ᱥᱟᱶ ᱨᱮᱠᱚ ᱛᱤᱸᱜᱩᱱᱟ ᱾ ᱪᱮᱫᱟᱜ ᱵᱟᱝ ᱢᱟ, ᱢᱤᱫ ᱞᱟᱡ ᱠᱷᱚᱱ ᱡᱟᱱᱟᱢ ᱟᱠᱟᱱ ᱵᱚᱭᱦᱟ, ᱢᱤᱫ ᱢᱟᱭᱟᱢ ᱛᱮ ᱜᱚᱲᱦᱚᱱ ᱟᱠᱟᱱ ᱦᱚᱲᱢᱚ, ᱢᱤᱫ ᱦᱚᱭ ᱦᱤᱥᱤᱫ, ᱢᱤᱫ ᱥᱤᱠᱷᱟᱹᱣ ᱯᱟᱲᱦᱟᱣ ᱛᱮ ᱦᱟᱨᱟ ᱨᱟᱠᱟᱵ ᱟᱠᱟᱱ ᱢᱚᱱᱮ ᱩᱭᱦᱟᱹᱨ ᱢᱤᱥᱨᱟ, ᱮᱴᱟᱜ ᱦᱚᱲᱟᱜ ᱵᱟᱹᱲᱤᱡ ᱟᱦᱞᱟ ᱚᱨᱥᱚᱝ ᱛᱮᱭ ᱡᱷᱟᱨᱠᱟᱣ ᱟᱛᱟᱨᱚᱜ ᱠᱟᱱ ᱵᱮᱲᱟᱨᱮ, ᱥᱟᱶᱛᱟ ᱱᱚᱡᱚᱨ ᱨᱮ ᱵᱟᱹᱲᱤᱡ ᱮ ᱩᱨᱩᱢᱚᱜ ᱠᱟᱱ ᱵᱮᱲᱟᱨᱮ ᱵᱟᱨᱮ ᱵᱚᱭᱦᱟ ᱜᱮᱛᱚ ᱫᱩᱜ ᱞᱟᱹᱜᱤᱫ ᱢᱤᱥᱨᱟ ᱥᱟᱢᱟᱝ ᱨᱮᱭ ᱛᱤᱸᱜᱩᱱᱟ ! ᱪᱮᱫᱟᱜ ᱥᱮ ᱢᱤᱥᱨᱟ ᱟᱜ ᱢᱟᱹᱱ ᱦᱮᱱᱚᱛ ᱫᱚ ᱟᱡᱟᱜ ᱦᱚᱸ ᱢᱟᱹᱱ ᱦᱟᱹᱱᱤ ᱠᱟᱱᱟ ᱾

ᱢᱤᱫ ᱠᱩᱲᱤ ᱦᱚᱯᱚᱱᱟᱜ ᱠᱚᱯᱟᱲ ᱨᱮ ᱮᱴᱟᱜ ᱚᱲᱟᱜ ᱟᱯᱱᱟᱨ ᱨᱮᱱᱟᱜ ᱨᱤᱛ ᱢᱮᱱᱟᱜ ᱨᱮᱦᱚᱸ, ᱡᱟᱱᱟᱢ ᱚᱲᱟᱜ ᱜᱮ ᱟᱡᱟᱜ ᱵᱩᱠᱟᱹ ᱛᱚᱯᱟ ᱚᱛ ᱦᱟᱥᱟ ᱫᱚ, ᱡᱟᱱᱟᱢ ᱚᱲᱟᱜ ᱜᱮ ᱟᱡᱟᱜ ᱡᱤᱣᱤ ᱫᱚᱦᱚ ᱧᱟᱢᱚᱜ ᱴᱷᱟᱶ ᱫᱚ ᱾ ᱮᱴᱟᱜ ᱚᱲᱟᱜ ᱮ ᱟᱯᱱᱟᱨᱟ ᱱᱚᱶᱟ ᱫᱚ ᱥᱟᱹᱨᱤ ᱠᱟᱛᱷᱟ ᱠᱟᱱᱟ, ᱤᱠᱷᱟᱹᱱ ᱡᱟᱱᱟᱢ ᱟᱭᱳ ᱵᱟᱵᱟ ᱚᱲᱟᱜ ᱨᱮᱫᱚ ᱟᱡᱟᱜ ᱚᱱᱛᱚᱨ ᱡᱤᱣᱤ ᱵᱟᱥᱟ ᱛᱟᱦᱮᱸᱱᱟ ᱾ ᱚᱱᱟᱛᱮ ᱟᱹᱰᱤ ᱜᱟᱺᱦᱤᱨ ᱥᱟᱹᱜᱟᱹᱭ ᱡᱚᱲᱟᱣ ᱛᱟᱦᱮᱸᱱᱟ ᱢᱤᱫ ᱦᱚᱯᱚᱱ ᱮᱨᱟ ᱟᱜ ᱵᱟᱵᱟ ᱵᱟᱹᱠᱷᱩᱞ ᱥᱟᱶ ᱫᱚ ᱾

***

About the author

ᱢᱟᱭᱱᱚ ᱴᱩᱰᱩ

ᱢᱟᱭᱱᱚ ᱴᱩᱰᱩ

ᱢᱟᱹᱱᱤᱡ ᱢᱟᱭᱱᱚ ᱴᱩᱰᱩ ᱫᱚ ᱢᱤᱫ ᱚᱱᱚᱞᱤᱭᱟᱹ ᱠᱟᱱᱟᱭ ᱾ ᱟᱹᱰᱤ ᱞᱮᱠᱟᱱ ᱯᱚᱛᱚᱵ ᱠᱚᱭ ᱯᱟᱨᱥᱟᱞ ᱦᱩᱭ ᱟᱠᱟᱫᱼᱟ ᱾ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱶᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱒᱐᱑᱗ ᱨᱮ Yuva Puraskar ᱛᱮᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾ ᱡᱟᱱᱟᱢ ᱯᱟᱹᱨᱥᱤ ᱵᱟᱧᱪᱟᱣ ᱟᱨ ᱚᱞ ᱪᱤᱠᱤ ᱪᱷᱟᱨᱟᱣ ᱫᱚ ᱟᱡᱟᱜ ᱡᱤᱭᱚᱱ ᱨᱮᱱᱟᱜ ᱯᱩᱭᱞᱩ ᱟᱺᱜᱤᱵᱷᱟᱨ ᱠᱟᱱᱟ ᱾

View all posts

Leave a Reply

Your email address will not be published. Required fields are marked *