ᱪᱤᱨᱜᱟᱹᱞ ᱼ ᱢᱤᱫ ᱥᱮᱪᱮᱫ

ᱠᱟᱨᱟᱢ ᱜᱩᱴᱷᱩ ᱟᱹᱛᱩ ᱫᱚ ᱟᱹᱰᱤ ᱨᱟᱹᱥᱤ ᱟᱹᱛᱩ ᱠᱟᱱᱟ ᱾ ᱱᱟᱥᱮ ᱠᱤᱥᱟᱹᱬ, ᱱᱟᱥᱮ ᱨᱮᱸᱜᱮᱡ ᱜᱷᱟᱨᱚᱸᱡᱽ ᱡᱚᱛᱚ ᱜᱮ ᱟᱹᱰᱤ ᱱᱟᱯᱟᱭ ᱡᱩᱢᱤᱫᱽ ᱨᱮ ᱢᱮᱱᱟᱜ ᱠᱚᱣᱟ ᱾ ᱟᱨ ᱟᱹᱰᱤ ᱨᱟᱹᱥᱠᱟᱹ ᱛᱮ ᱫᱤᱱ ᱠᱚ ᱠᱷᱮᱢᱟᱣᱮᱫᱼᱟ ᱾ ᱚᱱᱟ ᱟᱹᱛᱩᱨᱮ ᱵᱟᱹᱲᱛᱤ ᱚᱞ ᱯᱟᱲᱦᱟᱣ ᱦᱚᱲ ᱵᱟᱹᱱᱩᱜ ᱠᱚ ᱨᱮᱦᱚᱸ ᱪᱟᱥ ᱵᱟᱥ ᱠᱟᱛᱮ ᱟᱹᱰᱤ ᱱᱟᱯᱟᱭ ᱛᱮᱠᱚ ᱟᱹᱥᱩᱞᱚᱜ ᱠᱟᱱᱟ ᱾ ᱚᱱᱟ ᱟᱹᱛᱩ ᱨᱤᱱᱤᱡ ᱢᱟᱹᱡᱷᱤ ᱦᱟᱲᱟᱢ ᱧᱩᱛᱩᱢ ᱫᱚ ᱠᱟᱹᱨᱢᱩ ᱾ ᱢᱟᱹᱡᱷᱤ ᱵᱟᱵᱟ ᱠᱟᱹᱨᱢᱩ ᱨᱤᱱ ᱫᱚ ᱵᱟᱨᱭᱟ ᱜᱤᱫᱽᱨᱟᱹ ᱢᱟᱨᱟᱝ ᱤᱡ ᱫᱚ ᱦᱚᱯᱚᱱ ᱮᱨᱟ, ᱩᱱᱤᱭᱟᱜ ᱧᱩᱛᱩᱢ ᱫᱚ ᱵᱟᱦᱟ ᱟᱨ ᱦᱩᱰᱤᱧ ᱤᱡ ᱫᱚ ᱦᱚᱯᱚᱱ, ᱩᱱᱤᱭᱟᱜ ᱧᱩᱛᱩᱢ ᱫᱚ ᱯᱷᱟᱹᱜᱩᱱ ᱾ ᱵᱟᱦᱟ ᱫᱚ ᱱᱮᱜᱼᱮ ᱜᱮ ᱪᱮᱛᱟᱱ ᱛᱟᱱᱟᱞᱟ +᱒ ᱪᱟᱱᱚᱪ ᱚᱞᱚᱜ ᱮ ᱵᱚᱞᱚ ᱜᱚᱫ ᱟᱠᱟᱱᱟ ᱾ ᱯᱷᱟᱹᱜᱩᱱ ᱫᱚ ᱜᱮᱞ ᱪᱟᱱᱚᱪ ᱨᱮᱭ ᱚᱞᱚᱜ ᱠᱟᱱᱟ ᱾

ᱟᱹᱛᱩ ᱨᱤᱱ ᱛᱤᱱᱟᱹᱜ ᱜᱟᱱ ᱜᱤᱫᱽᱨᱟᱹ ᱚᱞᱚᱜ ᱟᱥᱲᱟ ᱥᱮᱱᱚᱜ ᱠᱚ ᱜᱟᱱ ᱟᱠᱟᱱ ᱨᱮᱦᱚᱸ ᱵᱟᱠᱚ ᱥᱮᱱᱚᱜ ᱠᱟᱱᱟ ᱾ ᱚᱱᱟᱛᱮ ᱛᱮᱦᱮᱧ ᱫᱚ ᱢᱟᱹᱡᱷᱤ ᱦᱚᱯᱚᱱ ᱮᱨᱟ ᱵᱟᱦᱟ ᱜᱮ ᱟᱹᱛᱩ ᱨᱤᱱ ᱡᱮᱛᱮ ᱜᱤᱫᱽᱨᱟᱹᱭ ᱦᱚᱦᱚ ᱥᱟᱢᱴᱟᱣ ᱟᱠᱟᱫ ᱠᱚᱛᱮ ᱟᱠᱚ ᱚᱲᱟᱜ ᱢᱤᱫ ᱢᱮᱞᱟ ᱨᱮᱭ ᱫᱩᱲᱩᱵ ᱦᱚᱪᱚ ᱟᱠᱟᱫ ᱠᱚᱣᱟ ᱾ ᱥᱩᱨ ᱨᱮ ᱢᱟᱹᱡᱷᱤ ᱵᱟᱵᱟ ᱦᱚᱸ ᱢᱮᱱᱟᱭ ᱜᱮᱭᱟ ᱟᱨ ᱟᱹᱛᱩ ᱨᱤᱱ ᱛᱤᱱᱟᱹᱜ ᱜᱟᱱ ᱦᱟᱲᱟᱢ ᱵᱩᱰᱷᱤ ᱠᱚ ᱫᱩᱲᱩᱵ ᱟᱠᱟᱱᱟ ᱾ ᱢᱟᱹᱡᱷᱤ ᱵᱟᱵᱟ ᱵᱟᱦᱟᱭ ᱦᱚᱦᱚ ᱟᱭ ᱠᱟᱱᱟ ᱼ
ᱵᱟᱦᱟ ᱢᱟᱹᱭ, ᱟᱢ ᱫᱚᱢ ᱚᱠᱟ ᱮᱱᱟ, ᱱᱩᱠᱩ ᱜᱤᱫᱽᱨᱟᱹ ᱫᱚ ᱛᱮᱦᱮᱧ ᱪᱮᱫᱟᱜ ᱮᱢ ᱦᱚᱦᱚ ᱡᱟᱣᱨᱟ ᱟᱠᱟᱫ ᱠᱚᱣᱟ ? ᱫᱩᱲᱩᱵ ᱚᱪᱚ ᱟᱠᱟᱫ ᱠᱚᱛᱮᱢ ᱟᱨ ᱟᱢ ᱫᱚ ᱚᱠᱟ ᱨᱮᱪᱚ ?

ᱵᱟᱦᱟ ᱼ (ᱱᱟᱯᱟᱭ ᱪᱚᱨᱚᱠ ᱦᱟᱨᱟ ᱛᱚᱨᱟᱜ ᱠᱩᱲᱤ ᱜᱤᱫᱽᱨᱟᱹ, ᱥᱟᱞᱣᱟᱨ ᱫᱚᱛᱚ ᱜᱮᱭ ᱦᱚᱨᱚᱜ ᱟᱠᱟᱫᱼᱟ, ᱚᱲᱟᱜ ᱵᱷᱤᱛᱨᱤ ᱠᱷᱚᱱ ᱨᱚᱲᱼᱨᱚᱲ ᱛᱮᱭ ᱚᱰᱚᱠ ᱮᱱᱟ ᱾) ᱦᱚᱭ ᱵᱟ, ᱢᱮᱱᱟᱹᱧ ᱜᱮᱭᱟ ᱾ ᱡᱚᱛᱚ ᱯᱮ ᱦᱮᱡ ᱪᱟᱵᱟ ᱟᱠᱟᱱᱟ ᱛᱚ ᱥᱮ ᱟᱨ ᱚᱠᱚᱭ ᱠᱚᱯᱮ ᱥᱟᱨᱮᱡ ᱟᱠᱟᱱᱟ ?
ᱥᱟᱜᱮᱱ ᱼ (ᱢᱤᱫ ᱜᱤᱫᱽᱨᱟᱹ) ᱫᱟᱹᱭ ᱞᱤᱴᱟᱹ ᱵᱟᱭ ᱦᱮᱡ ᱟᱠᱟᱱᱟ ᱾ ᱩᱱᱤ ᱢᱟ ᱪᱮᱬᱮᱭ ᱴᱩᱴᱤ ᱮᱫ ᱠᱚᱣᱟ, ᱧᱮ ᱞᱮᱫᱮᱭᱟᱹᱧ ᱾
ᱵᱟᱦᱟ ᱼ ᱵᱟᱢ ᱦᱚᱦᱚ ᱛᱟᱨᱟ ᱞᱮᱫᱮᱭᱟ , ᱥᱟᱜᱮᱱ ?
ᱵᱤᱨ ᱼ (ᱪᱷᱟᱴᱠᱟ ᱥᱮᱫ ᱠᱚᱭᱚᱜ ᱠᱟᱛᱮ) ᱫᱟᱹᱭ, ᱦᱟᱹᱱᱤ ᱛᱟᱨᱟ ᱞᱤᱴᱟᱹ ᱾
ᱵᱟᱦᱟ ᱼ ᱞᱤᱴᱟᱹ ᱵᱮᱴᱟ, ᱪᱮᱫᱟᱜ ᱮᱢ ᱛᱟᱭᱚᱢ ᱟᱠᱟᱱᱟ ? ᱫᱮᱞᱟ ᱫᱩᱲᱩᱵ ᱢᱮ ᱾
ᱢᱟᱹᱡᱷᱤ ᱼ ᱪᱮᱫ ᱠᱷᱟᱹᱛᱤᱨ ᱱᱩᱠᱩ ᱜᱤᱫᱽᱨᱟᱹ ᱫᱚ ᱱᱚᱝᱠᱟᱢ ᱡᱟᱣᱨᱟ ᱟᱠᱟᱫ ᱠᱚᱣᱟ, ᱤᱧ ᱢᱟ ᱵᱩᱡᱷᱟᱹᱣ ᱜᱮ ᱵᱟᱹᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱾
ᱵᱟᱦᱟ ᱼ ᱵᱟᱵᱟ, ᱟᱞᱚᱢ ᱪᱤᱱᱛᱟᱹᱜ ᱟᱥᱮ ᱟᱢ ᱫᱚ, ᱟᱸᱡᱚᱢ ᱛᱤᱧ ᱢᱮ ᱤᱧᱟᱜ ᱠᱟᱛᱷᱟ ᱾
ᱟᱹᱛᱩ ᱨᱤᱱᱤᱡ ᱢᱤᱫ ᱵᱩᱰᱤ ᱮᱨᱟ ᱼ ᱦᱚᱭ ᱢᱟ ᱞᱟᱹᱭ ᱢᱮ ᱵᱟᱦᱟ ᱢᱟᱹᱭ, ᱟᱞᱮ ᱦᱚᱸ ᱟᱸᱡᱚᱢ ᱥᱟᱱᱟ ᱮᱫ ᱞᱮᱭᱟ ᱾
ᱵᱟᱦᱟ ᱼ ᱵᱟᱵᱟ, ᱟᱵᱚ ᱟᱹᱛᱩ ᱨᱮ ᱱᱩᱠᱩ ᱱᱩᱱᱟᱹᱝ ᱜᱤᱫᱽᱨᱟᱹ ᱢᱮᱱᱟᱜ ᱠᱚᱣᱟ ᱾ ᱡᱚᱛᱚ ᱜᱮ ᱑᱒/᱑᱓ ᱵᱚᱪᱷᱚᱨ ᱜᱤᱫᱽᱨᱟᱹ ᱠᱟᱱᱟ ᱠᱚ ᱾ ᱢᱤᱫ ᱥᱮᱨᱢᱟ ᱠᱚᱨᱮ ᱠᱷᱚᱱ ᱤᱧ ᱢᱮᱛᱟ ᱠᱚ ᱠᱟᱱᱟ, ᱫᱤᱱᱟᱹᱢ ᱫᱷᱟᱨᱟ ᱟᱥᱲᱟ ᱥᱮᱱᱚᱜ ᱯᱮ, ᱤᱠᱷᱟᱹᱱ ᱛᱮᱦᱮᱧ ᱫᱷᱟᱹᱵᱤᱡ ᱤᱧ ᱧᱮᱞ ᱮᱫ ᱠᱚᱣᱟ, ᱚᱠᱚᱭ ᱦᱚᱸ ᱴᱷᱤᱠ ᱥᱟᱹᱦᱤᱸᱡ ᱜᱮ ᱟᱥᱲᱟ ᱵᱟᱠᱚ ᱥᱮᱱᱚᱜ ᱠᱟᱱᱟ ᱾ ᱚᱱᱟᱛᱮ ᱛᱮᱦᱮᱧ ᱫᱚ ᱱᱩᱠᱩ ᱜᱤᱫᱽᱨᱟᱹ ᱠᱚᱧ ᱦᱚᱦᱚ ᱡᱟᱣᱨᱟ ᱟᱠᱟᱫ ᱠᱚᱣᱟ ᱾

ᱢᱟᱹᱡᱷᱤ ᱼ ᱦᱚᱭ ᱢᱟᱛᱚᱵᱮ, ᱞᱟᱹᱭ ᱢᱮ, ᱪᱮᱫ ᱞᱟᱹᱭ ᱥᱟᱱᱟ ᱮᱫ ᱢᱮᱭᱟ ᱾
ᱵᱟᱦᱟ ᱼ ᱡᱚᱛᱚ ᱠᱚᱜᱮ ᱟᱸᱡᱚᱢ ᱥᱟᱸᱜᱮ ᱛᱤᱧ ᱯᱮ ᱾ ᱠᱟᱛᱷᱟ ᱫᱚ ᱱᱚᱶᱟ ᱠᱟᱱᱟ, ᱱᱮᱛᱟᱨ ᱢᱟ ᱡᱩᱜᱽ ᱵᱚᱫᱚᱞ ᱮᱱᱟ, ᱥᱤᱛᱩᱝ, ᱡᱟᱹᱯᱩᱫ, ᱨᱮᱭᱟᱜ ᱴᱷᱤᱠ ᱵᱟᱝ ᱛᱮ ᱪᱟᱥ ᱵᱟᱥ ᱦᱚᱸ ᱱᱟᱯᱟᱭ ᱥᱟᱹᱦᱤᱸᱡ ᱵᱟᱝ ᱦᱩᱭᱩᱜ ᱠᱟᱱᱟ ᱾ ᱚᱱᱟ ᱠᱷᱟᱹᱛᱤᱨ ᱟᱹᱥᱩᱞᱚᱜ ᱨᱮᱭᱟᱜ ᱰᱟᱦᱟᱨ ᱫᱚ ᱱᱤᱛᱚᱜ ᱚᱞ ᱯᱟᱲᱦᱟᱣ ᱜᱮ ᱾ ᱱᱩᱠᱩ ᱜᱤᱫᱽᱨᱟᱹ ᱠᱚ ᱴᱷᱤᱠ ᱥᱟᱹᱦᱤᱸᱡ ᱚᱞᱚᱜ ᱟᱥᱲᱟ ᱵᱟᱠᱚ ᱥᱮᱱᱚᱜ ᱠᱟᱱᱟ ᱟᱨ ᱛᱤᱱᱟᱹᱜ ᱜᱟᱱ ᱢᱟ ᱥᱮᱱ ᱜᱮ ᱵᱟᱠᱚ ᱥᱮᱱᱚᱜ ᱠᱟᱱᱟ ᱾ ᱚᱱᱟᱛᱮ ᱤᱧ ᱫᱚᱧ ᱢᱮᱱᱮᱫ ᱛᱟᱦᱮᱸᱫ, ᱱᱩᱠᱩ ᱡᱚᱛᱚ ᱜᱤᱫᱽᱨᱟᱹ ᱚᱞᱚᱜ ᱟᱥᱲᱟ ᱵᱚᱱ ᱵᱷᱮᱡᱟ ᱠᱚᱣᱟ ᱾ ᱜᱟᱯᱟ ᱠᱷᱚᱱ ᱜᱮ ᱟᱵᱚ ᱟᱥᱲᱟ ᱨᱮ ᱧᱩᱛᱩᱢ ᱚᱞ ᱮᱦᱚᱵᱚᱜ ᱠᱟᱱᱟ ᱾ ᱟᱨ ᱡᱟᱦᱟᱸᱭ ᱠᱚ ᱢᱟᱬᱟᱝ ᱠᱷᱚᱱ ᱯᱮ ᱥᱮᱱᱚᱜ ᱠᱟᱱᱟ, ᱫᱤᱱᱟᱹᱢ ᱜᱮ ᱟᱥᱲᱟ ᱫᱚ ᱥᱮᱱᱚᱜ ᱯᱮ ᱾ ᱵᱟᱹᱵᱩ ᱠᱚ, ᱢᱟᱹᱭ ᱠᱚ ᱥᱮᱱᱚᱜ ᱟᱯᱮ ᱥᱮ ᱚᱞᱚᱜ ᱟᱥᱲᱟ?
ᱞᱚᱥᱚ ᱼ (ᱢᱤᱫ ᱠᱚᱲᱟ), ᱱᱟᱯᱟᱭ ᱵᱤᱪᱟᱹᱨ ᱜᱮ ᱛᱟᱢ ᱢᱟᱹᱭ, ᱦᱚᱭ ᱥᱟᱹᱨᱤ ᱜᱮ ᱜᱟᱯᱟ ᱠᱷᱚᱱ ᱜᱮ ᱡᱚᱛᱚ ᱜᱤᱫᱽᱨᱟᱹ ᱚᱞᱚᱜ ᱟᱥᱲᱟ ᱥᱮᱱᱚᱜ ᱯᱮ ᱾
ᱜᱤᱫᱽᱨᱟᱹ ᱠᱚ ᱼ ᱦᱚᱭ ᱛᱚᱵᱮ, ᱦᱚᱭ ᱛᱚᱵᱮ (ᱵᱟᱨᱭᱟ ᱯᱮᱭᱟ ᱜᱤᱫᱽᱨᱟᱹ ᱠᱚ ᱢᱮᱱ ᱠᱮᱫᱼᱟ)
ᱵᱟᱦᱟ ᱼ ᱱᱟᱯᱟᱭ ᱜᱮ, ᱫᱩ ᱱᱤᱛᱚᱜ ᱫᱚ ᱚᱲᱟᱜ ᱥᱮᱱᱚᱜ ᱯᱮ ᱾

ᱫᱚᱥᱟᱨ ᱦᱤᱞᱚᱜ ᱠᱷᱚᱱ ᱜᱤᱫᱽᱨᱟᱹ ᱠᱚ ᱟᱥᱲᱟ ᱥᱮᱱᱚᱜ ᱠᱚ ᱮᱭᱦᱚᱵ ᱠᱮᱫᱼᱟ ᱾ ᱛᱤᱱᱟᱹᱝ ᱥᱮᱨᱢᱟ ᱫᱚ ᱟᱹᱰᱤ ᱱᱟᱯᱟᱭ ᱛᱮᱜᱮ ᱚᱠᱛᱚ ᱯᱟᱨᱚᱢ ᱤᱫᱤ ᱮᱱᱟ ᱾ ᱟᱹᱰᱤ ᱨᱟᱹᱥᱠᱟᱹ ᱜᱮ ᱜᱤᱫᱽᱨᱟᱹ ᱠᱚ ᱦᱟᱨᱟ ᱤᱫᱤ ᱮᱱᱟ ᱟᱨ ᱚᱞᱚᱜ ᱟᱥᱲᱟ ᱥᱮᱱ ᱨᱮᱜᱮ ᱢᱮᱱᱟᱜ ᱠᱚᱣᱟ ᱾ ᱱᱤᱛᱚᱜ ᱜᱤᱫᱽᱨᱟᱹ ᱠᱚ ᱚᱠᱚᱭ ᱫᱚ ᱛᱮᱥᱟᱨ ᱪᱟᱱᱚᱪ, ᱚᱠᱚᱭ ᱫᱚ ᱢᱚᱬᱮ ᱪᱟᱱᱚᱪ ᱟᱨ ᱚᱠᱚᱭ ᱫᱚ ᱜᱮᱞ ᱪᱟᱱᱚᱪ ᱠᱚᱨᱮ ᱠᱚ ᱚᱞᱚᱜ ᱠᱟᱱᱟ ᱾ ᱢᱤᱫ ᱫᱤᱱ ᱦᱤᱞᱚᱜ ᱫᱚ ᱛᱤᱠᱤᱱ ᱵᱮᱲᱟ ᱢᱤᱫ ᱯᱩᱸᱰ ᱠᱟᱨ ᱟᱹᱛᱩ ᱛᱟᱞᱟᱨᱮ ᱛᱤᱸᱜᱩ ᱮᱱᱟ ᱾ ᱯᱮ ᱦᱚᱲ ᱫᱤᱠᱩ ᱠᱚᱲᱟ ᱦᱟᱱᱛᱮ ᱱᱷᱟᱛᱮ ᱠᱚ ᱠᱚᱭᱚᱜ ᱵᱟᱲᱟᱭᱮᱫᱼᱟ ᱾ ᱜᱟᱹᱰᱤ ᱥᱟᱰᱮ ᱟᱸᱡᱚᱢ ᱛᱮ ᱟᱹᱛᱩ ᱨᱤᱱ ᱟᱹᱰᱤ ᱦᱚᱲ ᱜᱮ ᱪᱷᱟᱴᱠᱟ ᱥᱮᱫ ᱠᱚ ᱚᱰᱚᱠ ᱮᱱᱟ ᱾ ᱢᱟᱹᱡᱷᱤ ᱵᱟᱵᱟ ᱦᱚᱸ ᱩᱱᱠᱩ ᱧᱮᱞ ᱛᱮ ᱪᱷᱟᱴᱠᱟ ᱥᱮᱫ ᱮ ᱚᱰᱚᱠ ᱮᱱᱟ ᱾ ᱩᱱᱠᱩ ᱫᱤᱠᱩ ᱠᱚ ᱢᱟᱹᱡᱷᱤ ᱵᱟᱵᱟ ᱥᱟᱶ ᱠᱚ ᱠᱟᱛᱷᱟ ᱮᱱᱟ ᱠᱟᱜᱚᱡᱽ ᱠᱚ ᱫᱮᱠᱷᱟᱣ ᱵᱟᱲᱟ ᱠᱟᱛᱮ ᱾ ᱤᱱᱟᱹ ᱛᱟᱭᱚᱢ ᱩᱱᱠᱩ ᱫᱤᱠᱩ ᱫᱚᱠᱚ ᱨᱩᱣᱟᱹᱲ ᱮᱱᱟ ᱾ ᱡᱚᱛᱚ ᱦᱚᱲ ᱢᱟᱹᱡᱷᱤ ᱴᱷᱮᱱ ᱡᱟᱣᱨᱟ ᱠᱟᱛᱮ ᱠᱚ ᱠᱩᱞᱤ ᱮ ᱠᱟᱱᱟ,
ᱞᱚᱥᱚ ᱼ ᱪᱮᱫ ᱪᱤᱠᱟᱹ ᱮᱱᱟ, ᱦᱚᱯᱚᱱ ᱵᱟ! ᱱᱚᱣᱟ ᱫᱚ ᱪᱮᱫ ᱨᱮᱭᱟᱜ ᱠᱟᱜᱚᱡᱽ ᱠᱟᱱᱟ ᱾ ᱩᱱᱠᱩ ᱫᱤᱠᱩ ᱫᱚ ᱪᱮᱫ ᱠᱚ ᱞᱟᱹᱭ ᱮᱫ ᱛᱟᱦᱮᱸᱫ?
ᱢᱟᱹᱡᱷᱤ ᱵᱟᱵᱟ ᱼ ᱢᱤᱫ ᱢᱟᱹᱪᱤ ᱨᱮ ᱪᱤᱱᱛᱟᱹ ᱥᱟᱶᱛᱮᱭ ᱫᱩᱲᱩᱵ ᱟᱠᱟᱱᱟ ᱾
ᱵᱟᱦᱟ ᱼ ᱞᱟᱹᱭ ᱢᱮᱥᱮ ᱵᱟ, ᱪᱮᱫ ᱠᱟᱛᱷᱟ ?
ᱢᱟᱹᱡᱷᱤ ᱼ ᱱᱚᱣᱟ ᱠᱟᱜᱚᱡᱽ ᱨᱮ ᱚᱞ ᱟᱠᱟᱱᱟ, ᱟᱵᱚ ᱟᱹᱛᱩ ᱨᱮᱭᱟᱜ ᱯᱩᱨᱩᱵᱽ ᱯᱟᱦᱴᱟ ᱨᱮ ᱡᱟᱦᱟᱸ ᱜᱮ ᱵᱟᱹᱫᱽ, ᱵᱟᱹᱭᱦᱟᱹᱲ, ᱜᱚᱰᱟ, ᱰᱟᱹᱦᱤ ᱛᱟᱵᱚᱱ ᱢᱮᱱᱟᱜ, ᱚᱱᱟ ᱡᱟᱭᱜᱟ ᱨᱮ ᱥᱚᱨᱠᱟᱨ ᱢᱤᱫ ᱠᱟᱹᱨᱜᱟᱲ ᱵᱮᱱᱟᱣ ᱞᱟᱹᱜᱤᱫ ᱚᱰᱚᱨ ᱮ ᱮᱢ ᱟᱠᱟᱫᱼᱟ ᱾ ᱚᱱᱟ ᱠᱟᱹᱨᱜᱟᱲ ᱨᱮ ᱚᱠᱚᱭ ᱠᱚᱣᱟᱜ ᱚᱛ ᱦᱟᱥᱟ ᱠᱚ ᱪᱟᱞᱟᱜ ᱠᱟᱱ ᱠᱷᱟᱱ ᱩᱱᱠᱩ ᱫᱚ ᱚᱱᱟ ᱚᱝᱥᱟᱨ ᱠᱟᱹᱣᱰᱤ ᱵᱚᱱ ᱧᱟᱢᱟ ᱾

ᱟᱹᱛᱩ ᱦᱚᱲ ᱛᱟᱞᱟᱨᱮ ᱠᱟᱹᱣᱵᱟᱹᱣ ᱨᱚᱲ ᱮᱦᱚᱵ ᱮᱱᱟ ᱾
ᱢᱤᱫ ᱠᱚᱲᱟ ᱼ ᱵᱟᱝ ᱵᱟᱝ ᱟᱵᱚ ᱫᱚ ᱚᱛ ᱦᱟᱥᱟ ᱫᱚ ᱵᱟᱵᱚᱱ ᱮᱢᱚᱜᱼᱟ ᱾ ᱚᱛ ᱦᱟᱥᱟ ᱜᱮ ᱟᱵᱚᱣᱟᱜ ᱥᱚᱢᱯᱚᱛᱤ ᱫᱚ ᱾ ᱚᱛ ᱦᱟᱥᱟ ᱵᱟᱝ ᱠᱷᱟᱱ ᱟᱵᱚ ᱫᱚ ᱪᱮᱫ ᱞᱮᱠᱟ ᱛᱮᱵᱚᱱ ᱟᱹᱥᱩᱞᱚᱜᱼᱟ ᱾
ᱢᱤᱫ ᱦᱟᱲᱟᱢ ᱼ ᱵᱟᱝᱼᱟ, ᱚᱛ ᱦᱟᱥᱟ ᱫᱚ ᱵᱟᱵᱚᱱ ᱮᱢᱚᱜ ᱜᱮᱭᱟ ᱾ ᱟᱹᱰᱤ ᱦᱚᱲ ᱜᱮ ᱠᱚ ᱢᱮᱱ ᱠᱮᱫᱼᱟ, ᱠᱟᱹᱣᱰᱤ ᱦᱚᱸ ᱵᱟᱵᱚᱱ ᱦᱟᱛᱟᱣᱟ ᱟᱨ ᱚᱛ ᱦᱟᱥᱟ ᱦᱚᱸ ᱵᱟᱵᱚᱱ ᱮᱱᱚᱜᱼᱟ ᱾ ᱢᱟᱹᱡᱷᱤ ᱦᱟᱲᱟᱢ ᱫᱚ ᱛᱷᱤᱨ ᱛᱷᱟᱨ ᱮ ᱫᱩᱲᱩᱵ ᱛᱷᱤᱨ ᱟᱠᱟᱱ ᱜᱮᱭᱟ ᱾ ᱫᱚᱥᱟᱨ ᱦᱤᱞᱚᱜ ᱑᱐ ᱴᱟᱲᱟᱝ ᱠᱷᱟᱱ ᱟᱨ ᱦᱚᱸ ᱚᱱᱟ ᱯᱩᱸᱰ ᱠᱟᱨ ᱥᱟᱶᱛᱮ ᱩᱱᱠᱩ ᱯᱮᱭᱟ ᱫᱤᱠᱩ ᱠᱚ ᱦᱮᱡ ᱮᱱᱟ ᱾ ᱢᱟᱹᱡᱷᱤ ᱚᱲᱟᱜ ᱥᱮᱫ ᱠᱚ ᱠᱚᱭᱚᱜ ᱠᱮᱫᱼᱟ, ᱤᱠᱷᱟ.ᱱ ᱢᱟᱹᱡᱷᱤ ᱵᱟᱵᱟ ᱵᱟᱭ ᱚᱰᱚᱠ ᱞᱮᱱᱟ ᱾ ᱢᱤᱫ ᱠᱚᱲᱟ ᱦᱚᱦᱚ ᱠᱟᱛᱮ ᱢᱟᱹᱪᱤ ᱟᱹᱜᱩ ᱠᱚ ᱢᱮᱛᱟ ᱫᱮᱭᱟ ᱟᱨ ᱟᱹᱛᱩ ᱦᱚᱲ ᱦᱚᱦᱚ ᱡᱟᱣᱨᱟ ᱠᱚ ᱢᱮᱛᱟ ᱫᱮᱭᱟ ᱾ ᱟᱹᱛᱩ ᱦᱚᱲ ᱠᱚ ᱚᱰᱚᱠ ᱡᱟᱣᱨᱟ ᱮᱱᱟ ᱾ ᱛᱤᱱᱟᱹᱝ ᱜᱟᱱ ᱫᱚ ᱠᱟᱹᱣᱰᱤ ᱠᱚ ᱟᱛᱟᱝ ᱠᱮᱫᱼᱟ ᱟᱨ ᱛᱤᱱᱟᱹᱝ ᱜᱟᱱ ᱫᱚ ᱛᱤ ᱠᱚᱠᱚ ᱦᱩᱨᱞᱟᱹ ᱵᱟᱲᱟ ᱠᱮᱫᱼᱟ, ᱟᱞᱮ ᱫᱚ ᱠᱟᱹᱣᱰᱤ ᱦᱚᱸ ᱵᱟᱞᱮ ᱟᱛᱟᱝᱼᱟ ᱟᱨ ᱚᱛ ᱦᱟᱥᱟ ᱦᱚᱸ ᱵᱟᱞᱮ ᱮᱢᱚᱜᱼᱟ ᱾ ᱠᱳᱴ ᱠᱩᱪᱨᱤ ᱞᱮ ᱥᱮᱱᱚᱜᱼᱟ ᱮᱱ ᱦᱚᱸ ᱦᱟᱥᱟ ᱫᱚ ᱵᱟᱞᱮ ᱮᱢᱚᱜ ᱜᱮᱭᱟ ᱾

ᱫᱤᱠᱩ ᱼ Ap log agar paisa nahin lena chahte hain, aur jamin nahin dena chahte hain, phir bhi yahan per to company banega hi. kyunki, sarkar ne adesh diya hai aur hum log sarkar ke adesh ko ulanghan nehi kar sakte. Agar ap log paisa nehin lenge to phir bhi ap logon ke jamin company main jayega. Isiliye behtor yehi hoga ki app log paisa pakad len, Aur khusi ki bat to yeh hai ki app logon ka jamin bekar me nehin jayega, aj se hi ap log company banane ka kam me lag sakte hain. ek din ka beton 200/- , agar ap log kam nehin karenge to dusra jaga se kam karne ke liye log ayenge. Aur jis ghar me jitna jawan, ledka ho ya ledki ye company pura ho jane ke bad ap logon ko company me naukri melenge. Chinta karne ki koi bat nehin hain.

ᱟᱹᱛᱩ ᱦᱚᱲ ᱠᱚ ᱵᱷᱤᱛᱨᱤ ᱨᱮ ᱯᱷᱟᱥᱟᱨ ᱯᱷᱩᱥᱩᱨ ᱜᱟᱞᱢᱟᱨᱟᱣ ᱪᱟᱹᱞᱩ ᱮᱱᱟ ᱾ ᱟᱹᱰᱤᱜᱟᱱ ᱦᱚᱲ ᱜᱮ ᱯᱩᱭᱥᱟᱹ ᱥᱟᱥᱟᱵ ᱠᱚ ᱞᱟᱦᱟ ᱪᱟᱞᱟᱣ ᱮᱱᱟ ᱾

ᱢᱟᱹᱡᱷᱤ ᱼ ᱮᱭᱟ ᱪᱮᱫᱟᱜ ᱯᱩᱭᱥᱟᱹ ᱫᱚ ᱯᱮ ᱥᱟᱵᱮᱫᱼᱟ ? ᱚᱛ ᱦᱟᱥᱟ ᱛᱟᱵᱚᱱ ᱪᱟᱞᱟᱣ ᱞᱮᱱ ᱠᱷᱟᱱ ᱵᱚᱨᱵᱟᱫᱽ ᱩᱛᱟᱹᱨᱚᱜᱼᱟ ᱵᱚᱱ, ᱠᱳᱴ ᱠᱩᱪᱨᱤ ᱵᱚᱱ ᱪᱟᱞᱟᱜᱼᱟ ᱟᱨ ᱱᱚᱣᱟ ᱚᱛ ᱦᱟᱥᱟ ᱵᱚᱱ ᱨᱮᱡ ᱨᱩᱣᱟᱹᱲ ᱜᱮᱭᱟ ᱾
ᱢᱟᱨᱟᱝ ᱢᱟᱨᱟᱝ ᱴᱨᱟᱠ ᱠᱚᱛᱮ ᱠᱚᱢᱯᱟᱱᱤ ᱵᱮᱱᱟᱣ ᱥᱟᱢᱟᱱ ᱟᱹᱜᱩ ᱠᱚ ᱮᱦᱚᱵ ᱠᱮᱫᱼᱟ ᱾
ᱯᱷᱟᱹᱜᱩᱱ ᱼ ᱵᱟ, ᱟᱢ ᱢᱟ ᱠᱳᱴ ᱠᱩᱪᱨᱤ ᱠᱟᱛᱷᱟᱢ ᱨᱚᱲ ᱮᱫᱼᱟ, ᱦᱟᱱᱮ ᱧᱮᱞ ᱢᱮ, ᱠᱚᱢᱯᱟᱱᱤ ᱵᱮᱱᱟᱣ ᱥᱟᱢᱟᱱ ᱟᱹᱜᱩ ᱠᱚ ᱮᱭᱦᱚᱵ ᱠᱮᱫ ᱜᱮᱭᱟ ᱾

ᱠᱚᱢᱯᱟᱱᱤ ᱵᱮᱱᱟᱣ ᱡᱩᱨᱥᱩᱨ ᱪᱟᱹᱞᱩ ᱟᱠᱟᱱᱟ ᱾ ᱟᱹᱛᱩ ᱦᱚᱲ ᱠᱟᱹᱢᱤ ᱞᱟᱹᱜᱤᱫ ᱨᱟᱹᱥᱠᱟᱹ ᱜᱮᱠᱚ ᱚᱰᱚᱠ ᱪᱟᱞᱟᱜ ᱠᱟᱱᱟ ᱾ ᱫᱤᱱ ᱦᱤᱞᱚᱜ ᱒᱐᱐/ᱼ ᱴᱟᱠᱟ ᱠᱟᱛᱮ ᱠᱟᱹᱢᱤ ᱢᱩᱡᱽᱨᱤ ᱾ ᱫᱤᱱ ᱦᱤᱞᱚᱜ ᱦᱟᱴ ᱠᱚᱨᱮ ᱠᱷᱚᱱ ᱡᱤᱞ ᱦᱟᱹᱠᱩ ᱠᱤᱨᱤᱧ ᱟᱹᱜᱩ ᱠᱟᱛᱮ ᱠᱚ ᱡᱚᱢ ᱧᱩᱭᱮᱫᱼᱟ ᱟᱨ ᱮᱱᱮᱡ ᱥᱮᱨᱮᱧ ᱛᱮ ᱨᱟᱹᱥᱠᱟᱹ ᱨᱮ ᱫᱤᱱ ᱠᱚ ᱠᱷᱮᱢᱟᱣ ᱮᱫᱼᱟ ᱠᱟᱨᱟᱢ ᱜᱷᱩᱴᱩ ᱟᱹᱛᱩ ᱦᱚᱲ ᱾ ᱢᱟᱹᱡᱷᱤ ᱫᱚ ᱵᱟᱦᱨᱮ ᱠᱷᱚᱱ ᱥᱟᱭᱠᱮᱞ ᱛᱮ ᱞᱟᱸᱜᱟ ᱫᱷᱟᱨᱟ ᱦᱮᱡ ᱠᱟᱛᱮ ᱚᱲᱟᱜ ᱮ ᱵᱚᱞᱚ ᱮᱱᱟ ᱟᱨ ᱩᱫᱽᱜᱟᱹᱨ ᱡᱚᱫ ᱡᱚᱫ ᱛᱮ ᱢᱤᱫ ᱢᱟᱹᱪᱤ ᱨᱮᱭ ᱫᱩᱲᱩᱵ ᱮᱱᱟ ᱾ ᱵᱟᱦᱟ ᱵᱷᱟᱵᱽᱱᱟ ᱢᱮᱫᱦᱟ ᱨᱮ ᱢᱤᱫ ᱜᱤᱞᱟᱹᱥ ᱫᱟᱜ ᱟᱹᱜᱩ ᱠᱟᱛᱮᱭ ᱦᱮᱡ ᱮᱱᱟ ᱾
ᱵᱟᱦᱟ ᱼ ᱵᱟᱵᱟ, ᱱᱮ ᱫᱟᱜ ᱧᱩᱭ ᱢᱮ ᱾
ᱢᱟᱹᱡᱷᱤ ᱼ ᱵᱟᱝᱼᱟ ᱢᱟᱹᱭ, ᱫᱟᱜ ᱦᱚᱸ ᱵᱟᱝ ᱧᱩᱧᱩ ᱥᱟᱹᱱᱟᱹᱧ ᱠᱟᱱᱟ ᱾ ᱢᱤᱫ ᱥᱮᱨᱢᱟ ᱦᱩᱭᱩᱜ ᱠᱟᱱᱟ, ᱠᱳᱴ ᱠᱩᱪᱨᱤ ᱫᱟᱹᱲ ᱫᱟᱹᱲ ᱛᱮᱧ ᱞᱟᱸᱜᱟ ᱪᱟᱵᱟ ᱮᱱᱟ, ᱪᱮᱫ ᱦᱚᱸ ᱵᱟᱝ ᱜᱟᱱ ᱞᱮᱱᱟ ᱟᱨ ᱧᱮᱞ ᱧᱮᱞ ᱛᱮᱜᱮ ᱟᱵᱚᱣᱟᱜ ᱚᱛ ᱦᱟᱥᱟᱨᱮ ᱠᱟᱹᱨᱜᱟᱹᱲ ᱵᱮᱱᱟᱣ ᱥᱟᱹᱛᱚᱜ ᱠᱟᱱ ᱜᱮᱭᱟ ᱾ ᱵᱟᱹᱧ ᱫᱩᱜ ᱫᱟᱲᱮᱭᱟᱫᱼᱟ ᱵᱤᱴᱤ ᱟᱵᱚᱣᱟᱜ ᱚᱛ ᱦᱟᱥᱟ, ᱪᱮᱫ ᱞᱮᱠᱟ ᱛᱮ ᱵᱚᱱ ᱟᱹᱥᱩᱞᱚᱜᱼᱟ ᱫᱤᱥᱟᱹᱦᱟᱨᱟ ᱜᱮᱧ ᱵᱩᱡᱷᱟᱹᱣ ᱮᱫᱼᱟ ᱾ ᱢᱟ, ᱱᱤᱛᱚᱜ ᱫᱚ ᱟᱹᱵᱤᱱ ᱜᱮ ᱾ ᱟᱹᱥᱩᱞᱚᱜ ᱨᱮᱭᱟᱜ ᱟᱨ ᱢᱤᱫ ᱦᱚᱨ ᱰᱟᱦᱟᱨ ᱫᱚ ᱦᱩᱭᱩᱜ ᱠᱟᱱᱟ ᱵᱤᱴᱤ, ᱚᱞ ᱯᱟᱲᱦᱟᱣ ᱾ ᱛᱤᱥ ᱦᱚᱸ ᱚᱞᱚᱜ ᱟᱞᱚ ᱵᱤᱱ ᱵᱟᱹᱜᱤᱭᱟ ᱾ ᱵᱟᱹᱲᱛᱤ ᱠᱷᱚᱱ ᱵᱟᱹᱲᱛᱤ ᱚᱞ ᱯᱟᱲᱦᱟᱣᱜ ᱵᱤᱱ ᱟᱨ ᱪᱟᱹᱠᱨᱤ ᱵᱤᱱ ᱾ ᱟᱨ ᱱᱚᱶᱟ ᱟᱹᱛᱩ ᱨᱤᱱ ᱡᱚᱛᱚ ᱦᱚᱲ ᱚᱞ ᱯᱟᱲᱦᱟᱣ ᱦᱚᱪᱚ ᱠᱚ ᱵᱤᱱ ᱾ ᱤᱧ ᱫᱚᱧ ᱞᱟᱹᱜᱟ ᱮᱱᱟ ᱵᱤᱴᱤ, ᱟᱫᱚ ᱵᱟᱹᱧ ᱫᱟᱲᱮᱭᱟᱜᱼᱟ ᱾

(ᱜᱤᱫᱽᱨᱟᱹ ᱠᱚ ᱚᱞᱚᱜ ᱟᱥᱲᱟ ᱠᱚ ᱥᱮᱱᱚᱜ ᱠᱟᱱᱟ ᱾ ᱢᱤᱫᱴᱟᱹᱝ ᱫᱤᱠᱩ ᱜᱟᱲᱢᱟᱜ ᱜᱟᱲᱢᱟᱜ ᱥᱟᱱᱛᱟᱲ ᱨᱚᱲ ᱮ ᱵᱟᱰᱟᱭᱟ ᱾ ᱟᱫᱚ ᱩᱱᱠᱩ ᱜᱤᱫᱽᱨᱟᱹᱭ ᱢᱮᱛᱟ ᱠᱚ ᱠᱟᱱᱟ, ᱠᱤ ᱵᱷᱟᱭᱤ, ᱤᱥᱠᱩᱞ ᱪᱟᱞᱟ ᱠᱟᱱᱟ ᱯᱮ, ᱤᱥᱠᱩᱞ ᱪᱟᱞᱟ ᱠᱟᱛᱮ ᱪᱮᱫ ᱯᱮ ᱧᱟᱢ ᱠᱟᱱᱟ ᱾ ᱟᱯᱮ ᱢᱟ ᱵᱤᱱ ᱯᱟᱲᱦᱟᱣ ᱛᱮᱜᱮ ᱪᱟᱠᱨᱤ ᱯᱮ ᱧᱟᱢᱟ, ᱦᱟᱱᱮ ᱧᱮᱞ ᱯᱮ ᱢᱟᱨᱟᱝ ᱠᱚᱢᱯᱟᱱᱤ ᱨᱮ ᱾ ᱟᱯᱮᱭᱟᱜ ᱚᱛ ᱦᱟᱥᱟ ᱱᱚᱶᱟ ᱠᱚᱢᱯᱟᱱᱤ ᱨᱮ ᱪᱟᱞᱟᱣ ᱟᱠᱟᱱᱟ ᱥᱮ, ᱟᱯᱮ ᱫᱚ ᱵᱟᱝ ᱚᱞ ᱯᱟᱲᱦᱟᱣ ᱠᱟᱛᱮ ᱜᱮ ᱪᱟᱠᱨᱤ ᱫᱚᱯᱮ ᱧᱟᱢᱟ ᱾ ᱟᱞᱚ ᱯᱮ ᱪᱟᱞᱟᱜᱼᱟ ᱚᱞᱚᱜ ᱠᱚ ᱾ ᱚᱸᱰᱮ ᱥᱮ, ᱟᱯᱮ ᱞᱮᱠᱟᱱ ᱜᱤᱫᱽᱨᱟᱹ ᱟᱹᱰᱤ ᱜᱟᱱ ᱠᱚ ᱠᱟᱢᱤ ᱠᱟᱱᱟ ᱾ ᱟᱯᱮ ᱦᱚᱸ ᱠᱟᱢᱤ ᱦᱟᱡᱩ ᱯᱮ, ᱫᱤᱱ ᱦᱤᱞᱚᱜ ᱴᱟᱠᱟ ᱯᱮ ᱧᱟᱢᱟ ᱟᱨ ᱠᱚᱢᱯᱟᱱᱤ ᱯᱩᱨᱟᱣ ᱞᱮᱱ ᱠᱷᱟᱱ ᱜᱮ ᱪᱟᱠᱨᱤ ᱾ ᱴᱮᱨᱟ ᱴᱮᱨᱟᱭ ᱠᱚᱭᱚᱜ ᱵᱟᱲᱟ ᱚᱴᱚ ᱟᱫ ᱠᱚᱣᱟ ᱟᱨ ᱢᱚᱱᱮ ᱢᱚᱱᱮ ᱛᱮᱭ ᱩᱭᱦᱟᱹᱨ ᱡᱚᱝ ᱠᱟᱱᱟ, ᱢᱟᱴᱷᱟᱣᱜ ᱯᱮ ᱜᱤᱫᱽᱨᱟᱹ” ᱟᱨ ᱚᱸᱰᱮ ᱠᱷᱚᱱ ᱮ ᱥᱟᱦᱟ ᱮᱱᱟ ᱾

ᱥᱟᱜᱮᱱ ᱼ ᱱᱩᱭ ᱫᱤᱠᱩ ᱢᱟ ᱥᱟᱹᱨᱤ ᱠᱟᱛᱷᱟ ᱜᱮᱭ ᱢᱮᱱ ᱠᱮᱫᱼᱟ, ᱟᱵᱚ ᱢᱟ ᱡᱚᱛᱚ ᱦᱚᱲ ᱱᱚᱣᱟ ᱠᱚᱢᱯᱟᱱᱤ ᱨᱮ ᱪᱟᱹᱠᱨᱤ ᱠᱚ ᱮᱢᱟ ᱟᱵᱚᱱ ᱞᱟᱹᱜᱤᱫ ᱾ ᱮᱱᱠᱷᱟᱱ ᱵᱮᱠᱟᱨ ᱪᱮᱫᱟᱜ ᱵᱚᱱ ᱚᱞᱚᱜᱼᱟ ᱾ ᱪᱟᱹᱠᱨᱤ ᱟᱹᱣᱨᱤ ᱵᱚᱱ ᱧᱟᱢ ᱵᱷᱩᱨ ᱫᱚ ᱠᱚᱢᱯᱟᱱᱤ ᱨᱮᱜᱮ ᱵᱚᱱ ᱠᱟᱹᱢᱤ ᱦᱟᱱᱛᱟᱲᱟ, ᱵᱟᱝ ᱜᱟᱱᱚᱜ ᱛᱮ ᱭᱟ ᱞᱤᱴᱟᱹ!!!
ᱞᱤᱴᱟᱹ ᱼ ᱟᱹᱰᱤ ᱴᱷᱤᱠ ᱠᱟᱛᱷᱟ ᱭᱟᱢ ᱢᱮᱱ ᱟᱠᱟᱫᱼᱟ ᱥᱟᱜᱮᱱ, ᱫᱮᱞᱟ ᱟᱥᱲᱟ ᱠᱚᱫᱚ ᱟᱫᱚ ᱵᱟᱞᱟᱝ ᱥᱮᱥᱮᱱ ᱠᱟᱱ ᱜᱮ ᱾
ᱵᱟᱦᱟ, ᱟᱡ ᱵᱟᱵᱟᱦᱟᱜ ᱦᱚᱲᱢᱚ ᱵᱮᱥ ᱵᱟᱝ ᱛᱮ, ᱢᱤᱫ ᱦᱟᱴ ᱠᱚᱨᱮ ᱠᱷᱚᱱ ᱚᱲᱟᱜ ᱠᱷᱚᱱ ᱜᱮ ᱵᱟᱭ ᱚᱰᱚᱠ ᱵᱟᱲᱟ ᱟᱠᱟᱱᱟ ᱾ ᱢᱤᱫ ᱫᱤᱱ ᱫᱚ ᱠᱚᱲᱟ ᱜᱤᱫᱽᱨᱟᱹ ᱠᱚᱭ ᱧᱮᱞ ᱠᱮᱫ ᱠᱚᱣᱟ, ᱥᱟᱜᱮᱱ ᱛᱮᱠᱚᱣᱟᱜ ᱢᱮᱞᱟ ᱨᱮ ᱛᱟᱥ ᱠᱚ ᱮᱱᱮᱡ ᱠᱟᱱᱟ ᱾ ᱵᱟᱹᱭ ᱵᱟᱹᱭ ᱛᱮ ᱟᱠᱚ ᱴᱷᱮᱱ ᱮ ᱥᱮᱱ ᱮᱱᱟ, ᱟᱫᱚᱭ ᱢᱮᱛᱟ ᱠᱚ ᱠᱟᱱᱟ, “ᱥᱟᱜᱮᱱ , ᱞᱤᱴᱟᱹ ᱟᱥᱲᱟ ᱫᱚ ᱪᱮᱫᱟᱜ ᱵᱟᱯᱮ ᱥᱮᱱ ᱟᱠᱟᱱᱟ ᱟᱨ ᱛᱤᱥ ᱠᱷᱚᱱ ᱛᱟᱥ ᱮᱱᱮᱡ ᱫᱚᱯᱮ ᱮᱭᱦᱚᱵ ᱠᱮᱫᱼᱟ?’’
ᱞᱤᱴᱟᱹ ᱼ ᱫᱟᱹᱭ ! ᱟᱵᱚ ᱢᱟ ᱱᱚᱣᱟ ᱠᱚᱢᱯᱟᱱᱤ ᱯᱩᱨᱟᱹᱣ ᱞᱮᱱ ᱠᱷᱟᱱ ᱜᱮ ᱪᱟᱹᱠᱨᱤ ᱵᱚᱱ ᱧᱟᱢᱟ, ᱚᱱᱟᱛᱮ ᱚᱞᱚᱜ ᱢᱟ ᱞᱟᱹᱠᱛᱤ ᱜᱮ ᱵᱟᱝ ᱠᱟᱱᱟ ᱾ ᱚᱱᱟᱛᱮ ᱟᱞᱮ ᱫᱚ ᱟᱥᱲᱟ ᱥᱮᱱᱚᱜ ᱫᱚᱞᱮ ᱵᱟᱹᱜᱤ ᱟᱠᱟᱫᱼᱟ ᱾
ᱥᱟᱜᱮᱱ ᱼ ᱟᱨ ᱫᱟᱹᱭ, ᱢᱤᱫ ᱦᱟᱴ ᱠᱷᱚᱱ ᱠᱚᱢᱯᱟᱱᱤ ᱨᱮᱜᱮ ᱠᱟᱹᱢᱤ ᱞᱮ ᱥᱟᱵ ᱟᱠᱟᱱᱟ, ᱯᱩᱨᱟᱹᱣ ᱞᱮᱱ ᱠᱷᱟᱱ ᱜᱮ ᱪᱟᱹᱠᱨᱤ ᱾ ᱢᱮᱱ ᱠᱟᱛᱮ ᱜᱤᱫᱽᱨᱟᱹ ᱫᱚᱠᱚ ᱫᱟᱹᱲ ᱠᱮᱜᱼᱟ ᱾
ᱵᱟᱦᱟ ᱼ ᱥᱟᱜᱮᱱ, ᱞᱤᱴᱟᱹ ᱦᱟᱯᱮ, ᱚᱠᱚᱭ ᱮ ᱞᱟᱹᱭ ᱟᱫ ᱯᱮᱭᱟ ᱱᱚᱝᱠᱟᱱ ᱠᱟᱛᱷᱟ ᱫᱚ ᱾ ᱜᱤᱫᱽᱨᱟᱹ ᱠᱚᱠᱚ ᱫᱟᱹᱲ ᱪᱟᱵᱟ ᱠᱮᱫᱼᱟ ᱾ ᱚᱲᱟᱜ ᱮ ᱵᱚᱞᱚᱱ ᱠᱟᱱ ᱢᱟᱬᱟᱝ ᱨᱮ ᱵᱟᱨᱭᱟ ᱟᱹᱛᱩ ᱠᱩᱲᱤᱭ ᱧᱮᱞ ᱧᱟᱢ ᱠᱮᱫ ᱠᱤᱱᱟ ᱾ (ᱦᱚᱦᱚ ᱟᱛᱮ) ᱦᱚᱯᱚᱱ ᱟᱭᱳ! ᱪᱮᱫ, ᱥᱟᱹᱨᱤ ᱜᱮ ᱜᱤᱫᱽᱨᱟᱹ ᱠᱚᱫᱚ ᱟᱥᱲᱟ ᱥᱮᱱᱚᱜ ᱵᱟᱹᱜᱤ ᱠᱟᱛᱮ ᱠᱟᱹᱢᱤ ᱠᱚ ᱥᱮᱱᱚᱜ ᱠᱟᱱᱟ ?

ᱦᱚᱯᱚᱱ ᱟᱭᱳ ᱼ ᱦᱚᱭ ᱢᱟᱹᱭ, ᱟᱫᱚ ᱚᱛᱮ ᱚᱱᱮ ᱚᱱᱠᱟ ᱠᱚ ᱞᱟᱹᱭ ᱮᱫ ᱫᱚ, ᱟᱵᱚ ᱢᱟᱱᱷᱟᱜ ᱪᱟᱹᱠᱨᱤ ᱠᱚ ᱮᱢᱟ ᱵᱚᱱ ᱾ ᱟᱫᱚ ᱚᱱᱟᱛᱮ ᱟᱞᱮ ᱦᱚᱸ ᱜᱤᱫᱽᱨᱟᱹ ᱠᱚ ᱪᱮᱫ ᱦᱚᱸ ᱵᱟᱞᱮ ᱢᱮᱛᱟ ᱠᱚ ᱠᱟᱱᱟ ᱾
ᱵᱟᱦᱟ ᱼ ᱦᱚᱯᱚᱱ ᱟᱭᱳ, ᱤᱧ ᱵᱟᱵᱟᱦᱟᱜ ᱦᱚᱲᱢᱚ ᱵᱩᱜᱤ ᱵᱟᱝᱛᱮ ᱤᱧ ᱦᱚᱸ ᱚᱠᱛᱚ ᱠᱚ ᱵᱟᱹᱧ ᱚᱰᱚᱠ ᱫᱟᱲᱮᱭᱟᱜ ᱠᱟᱱᱟ ᱱᱩᱠᱩ ᱜᱤᱫᱽᱨᱟᱹ ᱞᱟᱹᱜᱤᱫ ᱾ ᱟᱞᱚ ᱯᱮ ᱵᱟᱹᱜᱤ ᱚᱪᱚ ᱠᱚᱣᱟ ᱚᱞᱚᱜ ᱫᱚ ᱚᱞᱚᱜ ᱢᱟᱜᱮ ᱠᱚ ᱾ ᱵᱟᱱᱟᱨ ᱠᱩᱲᱤ ᱦᱚᱯᱚᱱ ᱵᱟᱦᱟ ᱠᱤᱱ ᱠᱚᱭᱚᱜ ᱧᱚᱜ ᱟᱫᱮ ᱛᱮ ᱚᱸᱰᱮ ᱠᱷᱚᱱ ᱠᱤᱱ ᱥᱟᱦᱟ ᱮᱱᱟ ᱾

ᱫᱚᱥᱟᱨ ᱦᱤᱞᱚᱜ ᱯᱷᱟᱹᱜᱩᱱ ᱫᱚ ᱛᱮᱦᱮᱧ ᱫᱚ ᱟᱹᱰᱤ ᱟᱬᱜᱟᱛ ᱨᱮᱭ ᱥᱚᱡᱽ ᱥᱟᱯᱲᱟᱣ ᱟᱠᱟᱱᱟ ᱾ ᱟᱨ ᱮ ᱢᱮᱱᱮᱫᱼᱟ ᱼ
ᱯᱷᱟᱹᱜᱩᱱ ᱼ ᱫᱟᱹᱭ, ᱫᱮᱥᱮ ᱫᱟᱜ ᱢᱟᱹᱰᱤ ᱠᱟᱹᱴᱤᱡ ᱞᱩ ᱜᱚᱫ ᱟᱹᱧ ᱢᱮ ᱾
ᱵᱟᱦᱟ ᱼ ᱟᱨᱮ ᱵᱟᱦ!! ᱛᱮᱦᱮᱧ ᱢᱟ ᱫᱩᱞᱟᱹᱲ ᱵᱚᱠᱚᱧ ᱢᱟ ᱟᱹᱰᱤ ᱩᱥᱟᱹᱨᱟ ᱜᱮᱭ ᱥᱚᱡᱽᱵᱟᱡᱽ ᱜᱚᱫ ᱮᱱ ᱫᱚ ᱾ ᱚᱠᱟᱛᱮᱢ ᱪᱟᱞᱟᱜ ᱠᱟᱱᱟ ᱵᱷᱟᱹᱭ, ᱩᱱᱟᱹᱜ ᱟᱬᱜᱟᱛ ᱨᱮᱫᱚ? ᱠᱚᱞᱮᱡᱽ ᱨᱮ ᱪᱮᱫ ᱯᱷᱚᱝᱥᱚᱱ ᱠᱚ ᱯᱟᱞᱮ, ᱤᱠᱷᱟᱹᱱ ᱚᱱᱠᱟ ᱢᱟᱛᱚ ᱵᱟᱢ ᱥᱟᱯᱲᱟᱣ ᱟᱠᱟᱱᱟ!!
ᱯᱷᱟᱹᱜᱩᱱ ᱼ ᱫᱟᱹᱭ, ᱤᱧ ᱦᱚᱸ ᱠᱚᱢᱯᱟᱱᱤ ᱵᱮᱱᱟᱣ ᱠᱟᱹᱢᱤᱧ ᱥᱮᱱᱚᱜ ᱠᱟᱱᱟ ᱾ ᱡᱚᱛᱚ ᱦᱚᱲ ᱜᱮᱛᱚ ᱪᱟᱹᱠᱨᱤ ᱵᱚᱱ ᱧᱟᱢᱟ ᱫᱟᱹᱭ, ᱚᱱᱟᱛᱮ ᱚᱠᱚᱭ ᱦᱚᱸ ᱵᱟᱠᱚ ᱚᱞᱚᱜ ᱠᱟᱱᱟ, ᱛᱚᱵᱮ ᱤᱧ ᱫᱚ ᱪᱮᱫᱟᱜ ᱤᱧ ᱚᱞ ᱦᱟᱨᱠᱮᱛᱚᱜᱼᱟ ᱾
ᱵᱟᱦᱟ ᱼ ᱯᱟᱜᱽᱞᱟ ᱠᱚ ᱞᱮᱠᱟ ᱟᱞᱚᱢ ᱠᱟᱛᱷᱟᱭᱟ ᱯᱷᱟᱹᱜᱩᱱ, ᱠᱚᱞᱮᱡᱽ ᱮᱢ ᱥᱮᱱᱚᱜᱼᱟ ᱠᱟᱹᱢᱤ ᱫᱚ ᱵᱟᱝ ᱾ ᱟᱨ ᱢᱤᱫ ᱥᱮᱨᱢᱟ ᱥᱟᱨᱮᱡ ᱟᱠᱟᱱ ᱛᱟᱢᱟ ᱥᱚᱱᱮᱨ ᱥᱟᱹᱛᱚᱜ ᱛᱟᱢᱟ ᱾ ᱤᱱᱟᱹ ᱛᱟᱭᱚᱢ ᱪᱟᱹᱠᱨᱤ ᱞᱟᱹᱜᱤᱫ ᱫᱚ ᱩᱭᱦᱟᱹᱨ ᱢᱮ ᱾
ᱯᱷᱟᱹᱜᱩᱱ ᱼ ᱢᱤᱫ ᱥᱮᱨᱢᱟ ᱠᱷᱚᱱ ᱵᱟᱹᱲᱛᱤ ᱜᱮ ᱦᱩᱭᱩᱜ ᱠᱟᱱᱟ, ᱵᱟᱵᱟ ᱢᱟ ᱯᱟᱨᱠᱚᱢ ᱮ ᱦᱚᱨᱦᱚ ᱟᱠᱟᱫᱼᱟ ᱾ ᱢᱤᱫ ᱵᱟᱨ ᱯᱩᱭᱥᱟᱹ ᱦᱚᱸ ᱛᱤ ᱨᱮ ᱵᱟᱹᱱᱩᱜᱼᱟ ᱾ ᱧᱮᱞ ᱠᱚᱢ ᱥᱮ ᱟᱹᱛᱩ ᱡᱟᱠ ᱛᱤᱱᱟᱹᱜ ᱨᱟᱹᱥᱠᱟᱹ ᱨᱮ ᱢᱮᱱᱟᱜ ᱠᱚᱣᱟ ᱾ ᱟᱞᱚᱢ ᱢᱟᱱᱟ ᱤᱧᱟ, ᱤᱧ ᱫᱚ ᱠᱟᱹᱢᱤ ᱜᱮᱧ ᱥᱮᱱᱚᱜ ᱠᱟᱱᱟ ᱾ ᱡᱤᱭᱚᱱ ᱨᱮ ᱯᱩᱭᱥᱟᱹ ᱨᱮᱭᱟᱜ ᱦᱚᱸ ᱞᱟᱹᱠᱛᱤ ᱢᱮᱱᱟᱜ ᱜᱮᱭᱟ ᱫᱟᱹᱭ, ᱟᱢ ᱫᱚ ᱚᱠᱟ ᱨᱮᱢ ᱧᱟᱢ ᱟᱹᱧᱟ ᱾ (ᱢᱮᱱ ᱢᱮᱱᱛᱮ ᱯᱷᱟᱹᱜᱩᱱ ᱫᱚ ᱠᱟᱹᱢᱤᱭ ᱚᱰᱚᱠ ᱮᱱᱟ ᱾)

ᱵᱟᱦᱟ ᱼ ᱪᱤᱠᱟᱹ ᱪᱟᱵᱟ ᱮᱱᱟ ᱠᱚ ᱱᱚᱣᱟ ᱴᱚᱞᱟ ᱦᱚᱲ ᱫᱚ ᱾ ᱪᱚᱴ ᱥᱮᱫ ᱠᱚᱭᱚᱜ ᱧᱚᱜ ᱠᱟᱛᱮ, “ᱪᱮᱫ ᱟᱹᱲᱤᱥ ᱛᱟᱢ ᱱᱚᱣᱟ ᱫᱚ ᱪᱟᱸᱫᱚ, ᱪᱮᱫᱟᱜ ᱱᱚᱝᱠᱟᱱ ᱟᱱᱟᱴ ᱨᱮᱢ ᱧᱩᱨ ᱟᱠᱟᱫ ᱞᱮᱭᱟ ᱾”
ᱧᱮᱞ ᱧᱮᱞ ᱛᱮ ᱵᱟᱨ ᱥᱮᱨᱢᱟ ᱯᱩᱨᱟᱹᱣ ᱮᱱᱟ, ᱠᱚᱢᱯᱟᱱᱤ ᱛᱤᱸᱜᱩ ᱠᱮᱴᱮᱡ ᱮᱱᱟ ᱾ ᱠᱚᱢᱯᱟᱱᱤ ᱪᱟᱹᱞᱩᱭ ᱞᱟᱹᱜᱤᱫ ᱢᱟᱨᱟᱝ ᱢᱟᱨᱟᱝ ᱢᱮᱥᱤᱱ ᱠᱚᱢᱯᱟᱱᱤ ᱛᱮᱠᱚ ᱟᱹᱜᱩ ᱠᱮᱫᱼᱟ ᱾ ᱟᱹᱛᱩ ᱦᱚᱲ ᱟᱹᱰᱤ ᱨᱟᱹᱥᱠᱟᱹ ᱨᱮ ᱠᱚᱢᱯᱟᱱᱤ ᱯᱩᱨᱟᱹᱣ ᱮᱱᱟ, ᱪᱟᱹᱠᱨᱤ ᱵᱚᱱ ᱧᱟᱢᱟ ᱾ ᱚᱱᱟ ᱠᱚᱢᱯᱟᱱᱤ ᱞᱟᱹᱜᱤᱫ ᱪᱟᱹᱠᱨᱤ ᱚᱰᱚᱠ ᱮᱱᱟ ᱠᱷᱚᱵᱚᱨ ᱠᱟᱜᱚᱡᱽ ᱨᱮ ᱾ ᱵᱤᱱᱤᱰ ᱚᱞ ᱦᱩᱭᱩᱜᱼᱟ, ᱤᱱᱴᱚᱨᱵᱷᱤᱣ ᱮᱢ ᱦᱩᱭᱩᱜᱼᱟ ᱾
ᱯᱷᱟᱹᱜᱩᱱ ᱼ (ᱥᱮᱛᱟᱜ ᱨᱮᱜᱮ ᱟᱡ ᱨᱤᱱ ᱯᱮᱭᱟ ᱡᱚᱴᱟᱣ ᱠᱚ ᱥᱟᱶ ᱪᱷᱟᱴᱠᱟ ᱨᱮᱭ ᱫᱩᱲᱩᱵ ᱟᱠᱟᱱᱟ)
ᱫᱟᱹᱭ ᱚᱠᱟᱛᱮ ᱥᱮᱛᱟᱜ ᱨᱮᱫᱚᱢ ᱪᱟᱞᱟᱜ ᱠᱟᱱᱟ ᱾
ᱵᱟᱦᱟ ᱼ ᱱᱚᱣᱟ ᱠᱚᱢᱯᱟᱱᱤ ᱨᱮ ᱪᱟᱹᱠᱨᱤ ᱚᱰᱚᱠ ᱟᱠᱟᱱᱟ, ᱚᱱᱟ ᱨᱮᱭᱟᱜ ᱵᱤᱱᱤᱰ ᱚᱞ ᱜᱮᱧ ᱥᱮᱱᱚᱜ ᱠᱟᱱᱟ ᱾
ᱯᱷᱟᱹᱜᱩᱱ ᱼ (ᱠᱚᱲᱟ ᱜᱤᱫᱽᱨᱟᱹ ᱠᱚ ᱠᱚᱯᱭᱚᱜ ᱵᱟᱲᱟ ᱠᱟᱛᱮ) ᱵᱤᱱᱤᱰ ᱚᱞ, ᱟᱵᱚ ᱫᱚ ᱪᱟᱹᱠᱨᱤ ᱫᱚᱠᱚ ᱮᱢᱟ ᱵᱚᱱ ᱫᱚ ᱱᱷᱟᱜ ᱫᱟᱹᱭ ᱾
ᱥᱟᱜᱮᱱ ᱼ ᱦᱚᱭ ᱫᱟᱹᱭ, ᱟᱨ ᱦᱚᱸ ᱵᱤᱱᱤᱰ ᱫᱚ ᱪᱮᱫᱟᱜ ᱮᱢ ᱚᱞ ᱛᱮ?
ᱵᱟᱦᱟ ᱼ ᱠᱚᱭᱚᱜ ᱧᱚᱜᱟᱫ ᱠᱚᱣᱟᱭ, ᱪᱮᱫ ᱦᱚᱸ ᱵᱟᱝ ᱢᱮᱱ ᱠᱟᱛᱮ ᱥᱮᱱ ᱮᱱᱟᱭ ᱾

ᱛᱩᱨᱩᱭ ᱪᱟᱸᱫᱚ ᱜᱟᱱ ᱯᱟᱨᱚᱢ ᱮᱱᱟ, ᱠᱟᱹᱨᱜᱟᱲ ᱨᱮ ᱠᱟᱹᱢᱤ ᱪᱟᱹᱞᱩ ᱮᱱᱟ ᱾ ᱜᱟᱹᱰᱤ, ᱢᱚᱴᱚᱨ, ᱵᱟᱡᱟᱨ ᱠᱚᱨᱮ ᱠᱷᱚᱱ ᱜᱩᱰᱼᱜᱩᱰ ᱥᱩᱴᱵᱩᱴ ᱠᱩᱲᱤ ᱠᱚᱲᱟ ᱠᱚ ᱦᱤᱡᱩᱜ ᱥᱮᱱᱚᱜ ᱠᱟᱱᱟ ᱾ ᱵᱟᱦᱟ ᱦᱚᱸᱭ ᱥᱮᱱᱚᱜ ᱠᱟᱱ ᱜᱮᱭᱟ ᱠᱟᱹᱢᱤ ᱫᱚ ᱾ ᱤᱠᱷᱟᱹᱱ ᱟᱹᱛᱩ ᱨᱤᱱ ᱟᱨ ᱠᱩᱲᱤ ᱠᱚᱲᱟ ᱪᱮᱫᱟᱜ ᱠᱟᱹᱢᱤ ᱵᱟᱠᱚ ᱦᱚᱦᱚ ᱟᱠᱚ ᱠᱟᱱᱟ ᱾ ᱢᱤᱫ ᱫᱤᱱ ᱦᱤᱞᱚᱜ ᱫᱚ ᱟᱹᱛᱩ ᱨᱤᱱ ᱡᱮᱛᱮ ᱠᱩᱲᱤ ᱠᱚᱲᱟ ᱠᱟᱹᱨᱜᱟᱲ ᱛᱮᱠᱚ ᱪᱟᱞᱟᱣ ᱮᱱᱟ ᱾ ᱟᱨ ᱚᱸᱰᱮ ᱠᱚ ᱢᱮᱱ ᱮᱫᱼᱟ, ᱟᱞᱮ ᱫᱚ ᱪᱟᱹᱠᱨᱤ ᱫᱚ ᱛᱤᱥ ᱠᱷᱚᱱ ᱯᱮ ᱮᱢᱟ ᱞᱮᱭᱟ? ᱦᱚᱲ ᱠᱚ ᱠᱟᱹᱢᱤ ᱡᱚᱝ ᱠᱟᱱᱟ ᱟᱨ ᱟᱞᱮ ᱠᱷᱟᱱ ᱫᱚ ᱦᱚᱦᱚ ᱦᱚᱸ ᱵᱟᱯᱮ ᱦᱚᱦᱚ ᱟᱞᱮ ᱠᱟᱱᱟ ᱾ ᱵᱟᱨᱭᱟ ᱯᱮᱭᱟ ᱠᱚᱲᱟ ᱜᱤᱫᱽᱨᱟᱹ ᱠᱚ ᱢᱮᱱ ᱠᱮᱫᱼᱟ ᱾ ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱢᱤᱫᱴᱟᱹᱝ ᱠᱚᱲᱟ ᱵᱷᱤᱛᱨᱤ ᱠᱷᱚᱱ ᱮ ᱚᱰᱚᱠ ᱮᱱᱟ ᱟᱨ ᱮ ᱠᱩᱞᱤ ᱮᱫ ᱠᱚᱣᱟ ᱼ ᱪᱮᱫ ᱪᱤᱠᱟᱹ ᱮᱱᱟ, ᱪᱮᱫᱟᱜ ᱱᱚᱰᱮ ᱫᱚᱯᱮ ᱠᱟᱞᱠᱟᱞᱟᱣᱜ ᱠᱟᱱᱟ?
ᱞᱤᱴᱟᱹ ᱼ ᱟᱞᱮᱭᱟᱜ ᱪᱟᱹᱠᱨᱤ ᱫᱚ ᱩᱠᱩᱨᱤᱡ? ᱛᱤᱥ ᱠᱷᱚᱱ ᱠᱟᱹᱢᱤ ᱫᱚᱞᱮ ᱥᱟᱵᱚᱜᱼᱟ?
ᱠᱟᱹᱨᱜᱟᱲ ᱠᱚᱲᱟ ᱼ ᱟᱯᱮ ᱫᱚ ᱵᱤᱱᱤᱰ ᱫᱚ ᱯᱮ ᱚᱞ ᱞᱮᱫᱼᱟ, ᱥᱤᱫᱽ ᱥᱟᱠᱟᱢ ᱫᱚ ᱢᱮᱱᱟᱜ ᱛᱟᱯᱮᱭᱟ? ᱚᱱᱟ ᱵᱟᱝᱠᱷᱟᱱ ᱪᱟᱹᱠᱨᱤ ᱫᱚ ᱵᱟᱝ ᱧᱟᱢᱚᱜᱼᱟ ᱾
(ᱱᱩᱠᱩᱣᱟᱜ ᱠᱟᱹᱣᱵᱟᱹᱣ ᱟᱸᱡᱚᱢ ᱠᱟᱛᱮ ᱵᱷᱤᱛᱨᱤ ᱠᱷᱚᱱ ᱢᱤᱫ ᱥᱟᱱᱛᱟᱲ ᱦᱟᱲᱟᱢ ᱠᱚᱲᱟ ᱜᱮ, ᱡᱟᱦᱟᱸᱭ ᱫᱚ ᱮᱴᱟᱜ ᱵᱟᱡᱟᱨ ᱠᱷᱚᱱ ᱮ ᱦᱮᱡ ᱟᱠᱟᱱᱟ, ᱩᱱᱤ ᱚᱰᱚᱠ ᱠᱟᱛᱮᱭ ᱠᱩᱞᱤ ᱠᱮᱫ ᱠᱚᱣᱟ, ᱪᱮᱫ ᱪᱤᱠᱟᱹ ᱮᱱᱟ, ᱪᱮᱫᱟᱜ ᱱᱚᱝᱠᱟ ᱫᱚ ᱯᱮ ᱟᱸᱫᱚᱲ ᱟᱠᱟᱫᱼᱟ?)
ᱥᱟᱜᱮᱱ ᱼ ᱜᱚᱢᱠᱮ, ᱧᱮᱞᱮ ᱵᱤᱱ ᱥᱮ ᱱᱩᱭ ᱠᱚᱠᱞᱚ ᱫᱤᱠᱩ, ᱪᱮᱫ ᱮ ᱢᱮᱱᱮᱜᱼᱟ? ᱟᱞᱮᱭᱟᱜ ᱚᱛ ᱦᱟᱥᱟ ᱱᱚᱣᱟ ᱠᱚᱢᱯᱟᱱᱤᱨᱮ ᱪᱟᱞᱟᱣ ᱟᱠᱟᱱᱟ, ᱮᱛᱚᱦᱚᱵ ᱠᱷᱚᱱ ᱠᱟᱛᱷᱟ ᱠᱚ ᱮᱢᱟ ᱟᱠᱟᱣᱟᱫ ᱞᱮᱭᱟ, ᱡᱟᱦᱟᱸᱭᱟᱜ ᱚᱛ ᱦᱟᱥᱟ ᱠᱚᱢᱯᱟᱱᱤᱨᱮ ᱪᱟᱞᱟᱜ ᱠᱟᱱᱟ, ᱩᱱᱠᱩ ᱡᱚᱛᱚ ᱪᱟᱹᱠᱨᱤ ᱞᱮ ᱧᱟᱢᱟ ᱾ ᱤᱠᱷᱟᱹᱱ ᱱᱤᱛᱚᱜ ᱫᱚ ᱥᱟᱨᱴᱤᱯᱷᱤᱠᱮᱴ ᱠᱚ ᱠᱷᱚᱡᱚᱜ ᱠᱟᱱᱟ ᱾
ᱫᱷᱤᱨᱟᱹᱭ (ᱥᱟᱱᱛᱟᱲ ᱦᱟᱲᱟᱢ) ᱼ ᱟᱯᱮ ᱠᱚ ᱵᱷᱤᱛᱨᱤ ᱠᱷᱚᱱ ᱚᱠᱚᱭ ᱵᱤᱱᱤᱰ ᱫᱚᱯᱮ ᱮᱢ ᱞᱮᱫᱼᱟ?
ᱵᱟᱦᱟ ᱚᱰᱚᱠ ᱦᱮᱡ ᱠᱟᱛᱮ, ᱜᱚᱢᱠᱮ ᱤᱧ ᱥᱩᱢᱩᱝ ᱜᱮᱧ ᱮᱢ ᱞᱮᱫᱼᱟ ᱾
ᱫᱷᱤᱨᱟᱹᱭ ᱼ ᱜᱩᱰ!!! ᱟᱨ ᱚᱠᱚᱭ ᱦᱚᱸ ᱪᱮᱫᱟᱜ ᱵᱟᱯᱮ ᱮᱢ ᱞᱮᱫᱼᱟ?
ᱵᱟᱦᱟ ᱼ ᱜᱚᱢᱠᱮ! ᱱᱚᱣᱟ ᱪᱟᱹᱠᱨᱤ ᱞᱟᱹᱜᱤᱫ Minimum Qualification Graduation ᱫᱷᱟᱹᱵᱤᱡ ᱛᱟᱦᱮᱸ ᱠᱟᱱᱟ ᱟᱨ ᱱᱩᱠᱩ ᱚᱠᱚᱭ ᱦᱚᱸ ᱥᱚᱱᱮᱨ ᱜᱮ ᱵᱟᱠᱚ ᱥᱟᱹᱛ ᱟᱠᱟᱫᱼᱟ ᱾ ᱚᱱᱟ ᱠᱷᱟᱹᱛᱤᱨ ᱵᱟᱠᱚ ᱟᱯᱞᱟᱭ ᱫᱟᱲᱮᱭᱟᱫ ᱛᱟᱦᱮᱸᱫ ᱾
ᱫᱷᱤᱨᱟᱹᱭ ᱼ ᱟᱪᱷᱟ ᱴᱷᱤᱠ ᱜᱮᱭᱟ, ᱱᱤᱛᱚᱜ ᱱᱚᱣᱟ ᱠᱚ ᱪᱮᱛᱟᱱ ᱨᱮ ᱵᱟᱹᱲᱛᱤ ᱜᱟᱞᱢᱟᱨᱟᱣ ᱵᱟᱝ ᱜᱟᱱᱚᱜᱼᱟ ᱾ ᱤᱧᱟᱜ ᱠᱟᱹᱢᱤ ᱪᱟᱵᱟ ᱞᱮᱱ ᱠᱷᱟᱱ ᱟᱯᱮ ᱟᱹᱛᱩᱧ ᱵᱚᱞᱚ ᱛᱟᱨᱟᱜᱼᱟ, ᱡᱚᱛᱚ ᱦᱚᱲ ᱥᱟᱞᱟᱜ ᱧᱟᱯᱟᱢ ᱞᱟᱹᱜᱤᱫ ᱾

ᱛᱟᱨᱟᱥᱤᱧ ᱵᱮᱲᱟ ᱠᱟᱨ ᱛᱮ ᱫᱷᱤᱨᱟᱹᱭ ᱟᱹᱛᱩᱭ ᱥᱮᱴᱮᱨ ᱮᱱᱟ ᱾ ᱢᱟᱹᱡᱷᱤ ᱚᱲᱟᱜ ᱛᱮᱜᱮ ᱠᱚ ᱦᱚᱦᱚ ᱠᱷᱟᱹᱲ ᱠᱮᱫᱮᱭᱟ ᱾ ᱢᱟᱹᱡᱷᱤ ᱱᱟᱥᱮᱭ ᱴᱷᱤᱠ ᱧᱚᱜ ᱟᱠᱟᱱᱟ, ᱯᱟᱨᱠᱚᱢ ᱨᱮᱭ ᱫᱩᱲᱩᱵ ᱟᱠᱟᱱᱟ ᱾ ᱚᱲᱟᱜ ᱵᱚᱞᱚ ᱠᱟᱛᱮ ᱢᱤᱫ ᱢᱟᱹᱪᱤ ᱠᱚ ᱵᱤᱞ ᱟᱫᱮᱭᱟ ᱫᱷᱤᱨᱟᱹᱭ ᱫᱚ ᱾ ᱞᱚᱴᱟ ᱫᱟᱜ ᱚᱰᱚᱠ ᱠᱟᱛᱮ ᱧᱩ ᱫᱟᱜ ᱠᱚ ᱚᱰᱚᱠ ᱟᱫᱮᱭᱟ ᱾ ᱟᱹᱛᱩ ᱨᱤᱱ ᱡᱚᱛᱚ ᱠᱩᱲᱤ ᱠᱚᱲᱟ ᱟᱨ ᱦᱟᱲᱟᱢ ᱵᱩᱰᱷᱤ ᱠᱚ ᱡᱟᱣᱨᱟ ᱟᱠᱟᱱᱟ ᱾
ᱫᱷᱤᱨᱟᱹᱭ ᱼ ᱢᱟᱥᱮ ᱮᱱᱠᱷᱟᱱ ᱞᱟᱹᱭ ᱯᱮ, ᱪᱟᱹᱠᱨᱤ ᱞᱟᱹᱜᱤᱫ ᱪᱮᱫ ᱠᱚ ᱞᱟᱹᱭ ᱟᱫ ᱯᱮ ᱛᱟᱦᱮᱸᱫ ᱱᱩᱠᱩ ᱠᱟᱹᱨᱠᱷᱟᱱᱟ ᱵᱮᱱᱟᱣ ᱫᱤᱠᱩ ᱠᱚ?
ᱞᱚᱥᱚ ᱼ ᱢᱟᱹᱡᱷᱤ ᱥᱮᱫ ᱮ ᱠᱚᱭᱚᱜ ᱠᱮᱫ ᱠᱷᱟᱱ, ᱢᱟᱹᱡᱷᱤ ᱫᱚ ᱨᱚᱲ ᱨᱮᱭᱟᱜ ᱮᱸᱜᱮᱫ ᱮ ᱮᱢᱟ ᱟᱫᱮᱭᱟ ᱾ ᱞᱚᱥᱚ ᱨᱚᱲ ᱮ ᱮᱭᱦᱚᱵ ᱠᱮᱫᱼᱟ, ᱜᱚᱢᱠᱮ, ᱠᱟᱛᱷᱟ ᱫᱚ ᱱᱚᱝᱠᱟ ᱟᱠᱟᱱᱟ, ᱡᱟᱦᱟᱸᱭᱟᱜ ᱚᱛ ᱦᱟᱥᱟ ᱠᱚᱢᱯᱟᱱᱤ ᱨᱮ ᱪᱟᱞᱟᱣ ᱟᱠᱟᱱᱟ, ᱚᱱᱟ ᱚᱲᱟᱜ ᱨᱤᱱ ᱫᱚ ᱡᱚᱛᱚ ᱠᱩᱲᱤ ᱠᱚᱲᱟ ᱪᱟᱹᱠᱨᱤ ᱠᱚ ᱧᱟᱢᱟ ᱢᱮᱱᱛᱮ ᱾ ᱤᱠᱷᱟᱹᱱ ᱱᱤᱛᱚᱜ ᱢᱟ ᱱᱩᱠᱩ ᱜᱤᱫᱽᱨᱟᱹ ᱠᱚ ᱪᱟᱹᱠᱨᱤ ᱵᱟᱝ ᱮᱢ ᱠᱟᱛᱮ ᱵᱟᱡᱟᱨ ᱠᱷᱚᱱ ᱠᱩᱲᱤ ᱠᱚᱲᱟ ᱠᱚ ᱦᱚᱦᱚ ᱟᱠᱚ ᱠᱟᱱᱟ ᱾ ᱚᱱᱟ ᱜᱮ ᱟᱞᱮ ᱦᱚᱸ ᱵᱟᱞᱮ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ, ᱪᱮᱫᱟᱜ ᱱᱚᱝᱠᱟ ᱠᱚ ᱮᱲᱮ ᱠᱮᱫ ᱞᱮᱭᱟ?
ᱫᱷᱤᱨᱟᱹᱭ ᱼ ᱦᱚᱭ ᱠᱟᱛᱷᱟ ᱢᱟ ᱥᱟᱹᱨᱤ ᱠᱟᱱ ᱜᱮᱭᱟ ᱾ ᱚᱠᱚᱭ ᱦᱚᱸ ᱱᱚᱣᱟ ᱠᱚ ᱪᱮᱛᱟᱱ ᱨᱮ ᱪᱮᱫ ᱦᱚᱸ ᱵᱟᱵᱚᱱ ᱪᱤᱠᱟᱹ ᱫᱟᱲᱮᱭᱟᱜ ᱠᱟᱱᱟ ᱾ ᱦᱟᱱᱟ ᱱᱷᱟᱣᱟ ᱠᱚᱢᱯᱟᱱᱤ, ᱠᱟᱹᱨᱜᱟᱲ ᱵᱮᱱᱟᱣ ᱞᱟᱹᱜᱤᱫ ᱥᱚᱨᱠᱟᱨ ᱚᱰᱚᱨ ᱮ ᱮᱢ ᱮᱫᱼᱟ, ᱟᱨ ᱚᱱᱟ ᱠᱚ ᱛᱤᱸᱜᱩᱭ ᱞᱟᱹᱜᱤᱫ ᱱᱤᱛᱚᱜ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱡᱟᱭᱜᱟ ᱜᱮᱠᱚ ᱧᱮᱞ ᱧᱟᱢ ᱮᱫᱼᱟ ᱾ ᱟᱨ ᱫᱤᱥᱚᱢ ᱩᱛᱱᱟᱹᱣ ᱧᱩᱛᱩᱢ ᱛᱮ ᱱᱚᱜ ᱚᱭ ᱱᱚᱝᱠᱟ ᱚᱛ ᱦᱟᱥᱟ ᱠᱚᱠᱚ ᱫᱚᱠᱷᱚᱞ ᱮᱫ ᱛᱟᱵᱚᱱᱟ ᱾ ᱢᱮᱱ ᱫᱚᱠᱚ ᱢᱮᱱ ᱦᱚᱴᱚ ᱠᱟᱜᱼᱟ ᱠᱚᱢᱯᱟᱱᱤ ᱢᱟᱹᱞᱤᱠ ᱠᱚ, ᱚᱲᱟᱜ ᱯᱤᱪᱷᱤ ᱪᱟᱹᱠᱨᱤ ᱠᱚ ᱮᱢᱟ ᱠᱚᱣᱟ ᱾ ᱤᱠᱷᱟᱹᱱ ᱥᱟᱹᱨᱤ ᱠᱟᱛᱷᱟ ᱫᱚ ᱵᱟᱠᱚ ᱞᱟᱹᱭ ᱯᱩᱨᱟᱹᱣᱟ ᱡᱮ ᱜᱤᱫᱽᱨᱟᱹ ᱠᱚᱣᱟᱜ, ᱠᱩᱲᱤ ᱠᱚᱲᱟ ᱠᱚᱣᱟᱜ ᱚᱞ ᱯᱟᱲᱦᱟᱣ ᱛᱟᱦᱮᱸ ᱠᱚᱜ ᱢᱟ, ᱰᱤᱜᱽᱨᱤ ᱥᱟᱨᱴᱤᱯᱷᱤᱠᱮᱴ ᱛᱟᱦᱮᱸ ᱠᱚᱜ ᱢᱟ, ᱚᱱᱠᱟᱱ ᱦᱚᱲ ᱪᱟᱹᱠᱨᱤ ᱠᱚ ᱧᱟᱢᱟ ᱢᱮᱱᱛᱮ ᱾ ᱟᱨ ᱱᱚᱰᱮ ᱢᱟ ᱰᱤᱜᱽᱨᱤ ᱥᱟᱹᱛ ᱟᱠᱟᱫ ᱦᱚᱲ ᱜᱮ ᱵᱟᱹᱱᱩᱜ ᱵᱚᱱᱟ ᱾ ᱩᱱᱠᱩ ᱱᱤᱛᱚᱜ ᱟᱵᱚ ᱫᱚ ᱜᱚᱴᱟ ᱯᱟᱲᱟ ᱛᱮᱠᱚ ᱮᱲᱮ ᱮᱫ ᱵᱚᱱᱟ ᱾ ᱱᱚᱣᱟ ᱫᱚ ᱯᱩᱭᱞᱩ ᱜᱷᱚᱴᱚᱱ ᱫᱚ ᱵᱟᱝ ᱠᱟᱱᱟ ᱾ ᱱᱚᱝᱠᱟᱱ ᱜᱷᱚᱴᱚᱱ ᱟᱹᱰᱤᱜᱟᱱ ᱤᱧ ᱥᱟᱢᱟᱝ ᱟᱹᱜᱩ ᱟᱠᱟᱫᱼᱟ ᱾ ᱟᱵᱚ ᱪᱤᱨᱜᱟᱹᱞᱚᱜ ᱦᱩᱭ ᱟᱵᱚᱱᱟ, ᱚᱞ ᱯᱟᱲᱦᱟᱣ ᱦᱩᱭ ᱟᱵᱚᱱᱟ ᱾ ᱱᱤᱛᱚᱜ ᱱᱚᱝᱠᱟᱱ ᱚᱠᱛᱚ ᱥᱮᱴᱮᱨ ᱟᱠᱟᱱᱟ, ᱫᱤᱥᱚᱢ ᱩᱛᱱᱟᱹᱣ ᱧᱩᱛᱩᱢ ᱛᱮ ᱟᱵᱚ ᱚᱛ ᱦᱟᱥᱟ ᱠᱚ ᱨᱮᱡ ᱪᱟᱵᱟ ᱵᱚᱱᱟ ᱾ ᱟᱨ ᱚᱞ ᱯᱟᱲᱦᱟᱣ ᱵᱟᱝ ᱛᱟᱦᱮᱸᱱ ᱠᱷᱟᱱ ᱪᱟᱹᱠᱨᱤ ᱵᱟᱹᱠᱨᱤ ᱦᱚᱸ ᱵᱟᱠᱚ ᱮᱢᱟ ᱵᱚᱱᱟ ᱾ ᱚᱱᱟᱛᱮ ᱚᱠᱛᱚ ᱵᱟᱝ ᱵᱚᱨᱵᱟᱫᱽ ᱠᱟᱛᱮ ᱡᱟᱦᱟᱸ ᱜᱮ ᱜᱤᱫᱽᱨᱟᱹ ᱟᱹᱛᱩ ᱴᱚᱞᱟ ᱨᱮ ᱢᱮᱱᱟᱜ ᱯᱮᱭᱟ, ᱚᱞ ᱯᱟᱲᱦᱟᱣᱜ ᱯᱮ ᱾ ᱥᱤᱫᱽ ᱥᱟᱠᱟᱢ ᱛᱟᱦᱮᱸᱱ ᱠᱷᱟᱱ ᱪᱟᱹᱠᱨᱤ ᱫᱚᱯᱮ ᱧᱟᱢ ᱜᱮᱭᱟ ᱾ ᱮᱱ ᱦᱚᱸ ᱡᱩᱫᱤ ᱪᱟᱹᱠᱨᱤ ᱵᱟᱠᱚ ᱮᱢᱚᱜᱼᱟ ᱠᱳᱴ ᱠᱩᱪᱨᱤ ᱵᱚᱱ ᱥᱮᱱ ᱫᱟᱲᱮᱭᱟᱜᱼᱟ ᱾ ᱟᱨ ᱵᱟᱝᱠᱷᱟᱱ ᱚᱞ ᱯᱟᱲᱦᱟᱣ ᱵᱮᱜᱚᱨ ᱫᱚ ᱥᱤᱫᱽ ᱥᱟᱠᱟᱢ ᱵᱮᱜᱚᱨ ᱫᱚ ᱪᱮᱫ ᱦᱚᱸ ᱵᱟᱵᱚᱱ ᱪᱤᱠᱟᱹ ᱫᱟᱲᱮᱭᱟᱜᱼᱟ ᱾

ᱚᱱᱟᱛᱮ ᱛᱮᱦᱮᱧ ᱠᱷᱚᱱ ᱫᱟᱨᱟᱭ ᱫᱤᱱ ᱞᱟᱹᱜᱤᱫ ᱵᱚᱱ ᱥᱟᱯᱲᱟᱣᱜᱼᱟ ᱾ ᱟᱨ ᱦᱚᱸ ᱱᱚᱝᱠᱟᱱ ᱜᱷᱚᱴᱚᱱ ᱫᱚ ᱫᱟᱨᱟᱭ ᱫᱤᱱ ᱨᱮ ᱟᱹᱰᱤ ᱜᱮ ᱦᱩᱭᱩᱜ ᱨᱮᱭᱟᱜ ᱢᱮᱱᱟᱜᱼᱟ ᱾ ᱟᱨᱵᱟᱝ ᱠᱷᱟᱱ ᱟᱵᱚᱣᱟᱜ ᱪᱷᱟᱴᱠᱟ ᱵᱟᱲᱜᱮ ᱚᱛ ᱦᱟᱥᱟ ᱨᱮ ᱢᱟᱨᱟᱝ ᱢᱟᱨᱟᱝ ᱠᱚᱢᱯᱟᱱᱤ/ᱠᱟᱹᱨᱜᱟᱲ ᱛᱤᱸᱜᱩ ᱠᱟᱛᱮ ᱨᱮᱦᱚᱸ ᱟᱵᱚᱣᱟᱜ ᱚᱞ ᱯᱟᱲᱦᱟᱣ ᱵᱟᱝ ᱛᱟᱦᱮᱸᱱ ᱠᱷᱟᱱ ᱵᱟᱡᱟᱨ ᱠᱷᱚᱱ ᱚᱞᱚᱜ ᱠᱩᱲᱤ ᱠᱚᱲᱟ ᱟᱵᱚᱣᱟᱜ ᱪᱷᱟᱴᱠᱟ ᱵᱟᱲᱜᱮ ᱠᱚᱢᱯᱟᱱᱤ ᱨᱮᱠᱚ ᱪᱟᱹᱠᱨᱤ ᱯᱮᱨᱮᱡᱟ ᱟᱨ ᱟᱵᱚ ᱫᱚ ᱟᱵᱚᱣᱟᱜ ᱚᱛ ᱦᱟᱥᱟ ᱨᱮ ᱵᱟᱝ ᱫᱚ ᱪᱟᱥ ᱵᱟᱥ ᱞᱟᱹᱜᱤᱫ ᱟᱵᱚ ᱴᱷᱮᱱ ᱚᱛ ᱦᱟᱥᱟ ᱜᱮ ᱛᱟᱦᱮᱸᱱ ᱛᱟᱵᱚᱱ ᱟᱨᱵᱟᱝ ᱫᱚ ᱪᱟᱹᱠᱨᱤ ᱜᱮ ᱾

About the author

ᱢᱟᱭᱱᱚ ᱴᱩᱰᱩ

ᱢᱟᱭᱱᱚ ᱴᱩᱰᱩ

ᱢᱟᱹᱱᱤᱡ ᱢᱟᱭᱱᱚ ᱴᱩᱰᱩ ᱫᱚ ᱢᱤᱫ ᱚᱱᱚᱞᱤᱭᱟᱹ ᱠᱟᱱᱟᱭ ᱾ ᱟᱹᱰᱤ ᱞᱮᱠᱟᱱ ᱯᱚᱛᱚᱵ ᱠᱚᱭ ᱯᱟᱨᱥᱟᱞ ᱦᱩᱭ ᱟᱠᱟᱫᱼᱟ ᱾ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱶᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱒᱐᱑᱗ ᱨᱮ Yuva Puraskar ᱛᱮᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾ ᱡᱟᱱᱟᱢ ᱯᱟᱹᱨᱥᱤ ᱵᱟᱧᱪᱟᱣ ᱟᱨ ᱚᱞ ᱪᱤᱠᱤ ᱪᱷᱟᱨᱟᱣ ᱫᱚ ᱟᱡᱟᱜ ᱡᱤᱭᱚᱱ ᱨᱮᱱᱟᱜ ᱯᱩᱭᱞᱩ ᱟᱺᱜᱤᱵᱷᱟᱨ ᱠᱟᱱᱟ ᱾

View all posts

Leave a Reply

Your email address will not be published. Required fields are marked *