ᱦᱮᱞᱮᱱ ᱠᱮᱞᱚᱨ

ᱦᱮᱞᱮᱱ ᱮᱰᱚᱢᱥ ᱠᱮᱞᱚᱨ ᱫᱚ ᱒᱗ ᱡᱩᱱ ᱑᱘᱘᱐ ᱥᱟᱞᱮᱨᱮ ᱟᱢᱮᱨᱤᱠᱟ ᱨᱮᱱᱟᱜ ᱴᱚᱥᱠᱚᱢᱵᱤᱭᱟ, ᱚᱞᱵᱟᱢᱟ ᱨᱮᱭ ᱡᱟᱱᱟᱢ ᱞᱮᱱᱟ ᱾ ᱡᱟᱱᱟᱢ ᱠᱟᱛᱮ ᱦᱮᱞᱮᱱ ᱠᱮᱞᱚᱨ ᱫᱚ ᱦᱚᱲᱢᱚ ᱨᱮᱱᱟᱜ ᱡᱮᱛᱮ ᱞᱮᱠᱟᱱ ᱜᱟᱺᱴ ᱛᱮ ᱥᱚᱝ ᱯᱩᱨᱩᱱ ᱮ ᱛᱟᱦᱮᱸ ᱠᱟᱱᱟ᱾ ᱑᱙ ᱪᱟᱸᱫᱚ ᱛᱟᱭᱚᱢ ᱩᱱᱤ ᱫᱚ ᱢᱤᱫ ᱟᱡᱟᱨ ᱨᱮᱭ ᱯᱟᱲᱟᱣ ᱮᱱᱟ ᱟᱨ ᱚᱱᱟ ᱟᱡᱟᱨ ᱠᱷᱟᱹᱛᱤᱨ ᱛᱮᱜᱮ ᱩᱱᱤᱭᱟᱜ ᱢᱮᱫ ᱨᱮᱱᱟᱜ ᱢᱟᱨᱥᱟᱞ, ᱢᱚᱪᱟ ᱨᱮᱱᱟᱜ ᱨᱚᱲ ᱟᱲᱟᱝ, ᱟᱨ ᱞᱩᱛᱩᱨ ᱨᱮᱱᱟᱜ ᱟᱸᱡᱚᱢ ᱫᱟᱲᱮ ᱫᱚ ᱢᱩᱪᱟᱹᱫ ᱩᱛᱟᱹᱨ ᱞᱮᱱ ᱛᱟᱭᱟ ᱾

 ᱦᱮᱞᱮᱱ ᱠᱮᱞᱚᱨ ᱨᱤᱱ ᱟᱭᱳ ᱵᱟᱵᱟ ᱥᱟᱢᱟᱝ ᱨᱮ ᱫᱚ ᱢᱤᱫ ᱵᱩᱨᱩ ᱞᱮᱠᱟᱱ ᱪᱟᱞᱮᱸᱡᱽ ᱜᱮ ᱛᱤᱸᱜᱩ ᱮᱱᱟ᱾ᱤᱠᱷᱟᱹᱱ ᱮᱱ ᱦᱚᱸ ᱦᱟᱹᱨ ᱵᱟᱝ ᱢᱟᱱᱟᱣ ᱠᱟᱛᱮ ᱦᱮᱞᱮᱱ ᱠᱮᱞᱚᱨ ᱚᱞ ᱯᱟᱲᱦᱟᱣ ᱚᱪᱚ ᱠᱟᱛᱮ ᱥᱮᱪᱮᱫ ᱮᱢᱟᱦᱟᱭ ᱨᱮᱱᱟᱜ ᱠᱤᱱ ᱨᱤᱠᱟᱹ ᱠᱮᱫᱼᱟ ᱾ ᱤᱠᱷᱟᱹᱱ ᱟᱹᱠᱤᱱ ᱥᱟᱢᱟᱝ ᱨᱮ ᱟᱹᱰᱤ ᱢᱟᱨᱟᱝ ᱠᱩᱠᱞᱤ ᱛᱟᱦᱮᱸ ᱠᱟᱱᱟ ᱪᱤ ᱚᱠᱟ ᱞᱮᱠᱟᱱ ᱢᱟᱪᱮᱛ ᱧᱟᱢ ᱞᱮᱠᱷᱟᱱ ᱦᱮᱞᱮᱱ ᱠᱮᱞᱚᱨ ᱫᱚ ᱱᱟᱯᱟᱭ ᱥᱟᱺᱦᱤᱡ ᱥᱮᱪᱮᱫ ᱮ ᱮᱢ ᱫᱟᱲᱮᱭᱟᱭᱟ ᱟᱨ ᱦᱮᱞᱮᱱ ᱠᱮᱞᱚᱨ ᱦᱚᱸᱭ ᱵᱩᱡᱷᱟᱹᱣ ᱧᱟᱢ ᱫᱟᱲᱮᱭᱟᱜᱼᱟ ᱾ ᱱᱚᱶᱟ ᱫᱚ ᱚᱱᱟ ᱠᱷᱟᱹᱛᱤᱨ ᱪᱮᱫᱟᱜ ᱥᱮ ᱦᱮᱞᱮᱱ ᱠᱮᱞᱚᱨ ᱫᱚ ᱮᱴᱟᱜ ᱥᱟᱢᱟᱱᱚᱢ ᱜᱤᱫᱽᱨᱟᱹ ᱠᱷᱚᱱ ᱫᱚ ᱵᱷᱮᱜᱟᱨ ᱜᱮᱭ ᱛᱟᱦᱮᱸ ᱠᱟᱱᱟ ᱾ ᱱᱚᱝᱠᱟ ᱮᱴᱠᱮᱴᱚᱬᱮ ᱥᱟᱞᱟᱜ ᱛᱮᱦᱚᱸ ᱟᱠᱚ ᱢᱤᱫ ᱱᱟᱯᱟᱭ ᱢᱟᱪᱮᱛ ᱠᱚ ᱧᱟᱢ ᱠᱮᱫᱮ ᱜᱮᱭᱟ ᱾ ᱩᱱᱤ ᱢᱟᱪᱮᱛᱟᱜ ᱧᱩᱛᱩᱢ ᱫᱚ ᱛᱟᱦᱮᱸ ᱠᱟᱱᱟ “ᱮᱱᱤ ᱥᱩᱞᱤᱵᱟᱱ” ᱢᱮᱱᱛᱮ ᱾ ᱩᱱᱤ ᱢᱟᱪᱮᱛ ᱫᱚ ᱦᱮᱞᱮᱱ ᱠᱮᱞᱚᱨ ᱜᱚᱴᱟᱯᱟᱲᱟ ᱠᱷᱚᱱ ᱥᱮᱪᱮᱫ ᱮᱢᱟᱦᱟᱭ ᱞᱟᱹᱜᱤᱫ ᱮ ᱨᱤᱠᱟᱹ ᱠᱮᱫᱼᱟ ᱾ ᱢᱮᱱᱩᱣᱟᱞ ᱟᱞᱯᱷᱟᱵᱮᱴ ᱟᱨ ᱵᱽᱨᱮᱞᱤ ᱥᱠᱤᱯᱴ ᱮᱢᱟᱱ ᱠᱚᱨᱮᱱᱟᱜ ᱥᱮᱪᱮᱫ ᱛᱚᱦᱚᱨ ᱛᱮ ᱱᱟᱯᱟᱭ ᱥᱮᱪᱮᱫ ᱮᱢ ᱞᱟᱹᱜᱤᱫ ᱮ ᱨᱤᱠᱟᱹ ᱠᱮᱫᱼᱟ ᱾ ᱡᱟᱦᱟᱸ ᱞᱮᱠᱟᱛᱮ ᱥᱮᱪᱮᱫ ᱟᱢᱮᱴ ᱨᱮᱱᱟᱜ ᱚᱠᱛᱚ ᱯᱚᱞᱚᱢ ᱤᱫᱤ ᱮᱱᱟ ᱟᱨ ᱫᱩᱥᱨᱟᱹ ᱯᱟᱦᱴᱟ ᱠᱷᱚᱱ ᱦᱮᱞᱮᱱ ᱠᱮᱞᱚᱨ ᱫᱚ Wright Humanson school for Deep ᱠᱷᱚᱱ ᱮᱛᱚᱦᱚᱵ ᱥᱮᱪᱮᱫ ᱫᱚᱭ ᱥᱟᱹᱛ ᱠᱮᱫᱼᱟ ᱾ ᱮᱛᱚᱦᱚᱵ ᱥᱮᱪᱮᱫ ᱮ ᱯᱩᱨᱟᱹᱣ ᱥᱟᱹᱛ ᱠᱮᱫ ᱛᱟᱭᱚᱢ ᱦᱮᱞᱮᱱ ᱠᱮᱞᱚᱨ ᱫᱚ ᱟᱹᱰᱤ ᱮᱠᱞᱟ ᱜᱮᱭ ᱟᱹᱭᱠᱟᱹᱣ ᱠᱮᱫᱼᱟ, ᱪᱮᱫᱟᱜ ᱥᱮ ᱩᱱᱤᱭᱟᱜ ᱟᱸᱥ ᱫᱚ ᱛᱟᱦᱮᱸ ᱠᱟᱱᱟ ᱪᱤ ᱟᱡ ᱦᱚᱸ ᱡᱚᱛᱚ ᱦᱚᱲ ᱞᱮᱠᱟᱜᱮᱭ ᱚᱞ ᱯᱟᱲᱦᱟᱣᱜ ᱢᱟ ᱾

 ᱱᱚᱶᱟ ᱞᱟᱹᱜᱤᱫ ᱑᱙᱐᱒ ᱥᱟᱞᱮᱨᱮ ᱥᱚᱱᱮᱨ ᱯᱟᱲᱦᱟᱣᱜ ᱞᱟᱹᱜᱤᱫ ᱦᱮᱞᱮᱱ ᱠᱮᱞᱚᱨ ᱫᱚ ᱨᱮᱰᱠᱞᱤᱯᱷ ᱢᱟᱨᱟᱝ ᱵᱤᱨᱫᱟᱹᱜᱟᱲ ᱨᱮ ᱫᱟᱹᱠᱷᱤᱞᱟᱭ ᱦᱟᱛᱟᱣ ᱠᱮᱫᱼᱟ ᱾ ᱚᱸᱰᱮ ᱦᱮᱞᱮᱱ ᱠᱮᱞᱚᱨ ᱫᱚ ᱮᱴᱟᱜ ᱱᱚᱨᱢᱟᱞ ᱜᱤᱫᱽᱨᱟᱹ ᱠᱚ ᱥᱟᱶ ᱯᱟᱲᱦᱟᱣᱜ ᱮ ᱮᱛᱚᱦᱚᱵ ᱠᱮᱫᱼᱟ ᱾ ᱚᱸᱰᱮ ᱯᱟᱲᱦᱟᱣᱜ ᱠᱟᱱ ᱛᱩᱞᱩᱡ ᱜᱮ ᱦᱮᱞᱮᱱ ᱠᱮᱞᱚᱨ ᱫᱚ ᱚᱞᱼᱵᱮᱞ ᱞᱟᱹᱜᱤᱫ ᱨᱟᱹᱥᱠᱟᱹ ᱥᱟᱨᱥᱟᱣ ᱟᱫᱮᱭᱟ ᱟᱨ ᱩᱱᱤ ᱫᱚ ᱚᱞᱼᱵᱮᱞ ᱮ ᱮᱛᱚᱦᱚᱵ ᱠᱮᱫᱼᱟ ᱾ ᱦᱮᱞᱮᱱ ᱠᱮᱞᱚᱨ ᱫᱚ ᱤᱱᱟᱹ ᱚᱠᱛᱚᱨᱮ ᱢᱤᱫ ᱱᱚᱝᱠᱟᱱ ᱯᱚᱛᱚᱵ ᱮ ᱚᱞᱼᱛᱚᱞ ᱠᱮᱫᱼᱟ, ᱡᱟᱦᱟᱸ ᱫᱚ ᱩᱱᱤ ᱟᱹᱰᱤ ᱢᱟᱨᱟᱝ ᱡᱤᱛᱠᱟᱹᱨ ᱮ ᱟᱢᱮᱴ ᱦᱚᱪᱚ ᱠᱮᱫᱮᱭᱟ᱾ ᱚᱱᱟ ᱯᱚᱛᱚᱵ ᱨᱮᱱᱟᱜ ᱧᱩᱛᱩᱢ ᱫᱚ ᱛᱟᱦᱮᱸ ᱠᱟᱱᱟ, “ᱤᱧᱟᱜ ᱡᱤᱭᱚᱱ ᱠᱟᱹᱦᱱᱤ” ᱟᱨᱵᱟᱝ “The Story of my lifeᱹ”

 ᱟᱡᱟᱜ ᱡᱤᱭᱚᱱ ᱨᱮ ᱦᱩᱞᱥᱟᱹᱭ ᱨᱮᱱᱟᱜ ᱱᱚᱝᱠᱟᱱ ᱚᱠᱛᱚ ᱯᱟᱨᱚᱢ ᱠᱟᱛᱮ ᱦᱮᱞᱮᱱ ᱠᱮᱞᱚᱨ ᱫᱚᱭ ᱵᱩᱡᱷᱟᱹᱣ ᱧᱟᱢ ᱞᱮᱫ ᱛᱟᱦᱮᱸᱫ ᱡᱮ, ᱡᱤᱭᱚᱱ ᱨᱮ ᱡᱩᱫᱤ ᱦᱩᱞᱥᱟᱹᱭ ᱦᱩᱭᱩᱜᱼᱟ, ᱮᱱᱠᱷᱟᱱ ᱪᱮᱫ ᱠᱟᱹᱢᱤ ᱦᱚᱸ ᱚᱱᱠᱟ ᱵᱟᱹᱱᱩᱜ ᱟᱱᱟ, ᱡᱟᱦᱟᱸ ᱫᱚ ᱟᱵᱚ ᱵᱟᱵᱚᱱ ᱛᱚᱨᱟᱣ ᱫᱟᱲᱮᱭᱟᱜᱼᱟ ᱾ ᱱᱚᱶᱟ ᱩᱭᱦᱟᱹᱨ ᱥᱟᱶᱛᱮ ᱜᱮ ᱦᱮᱞᱮᱱ ᱠᱮᱞᱚᱨ ᱫᱚ ᱥᱟᱶᱛᱟ ᱨᱮᱱᱟᱜ ᱵᱷᱟᱹᱞᱟᱹᱭ ᱞᱟᱹᱜᱤᱫ ᱥᱟᱸᱜᱷᱟᱨ ᱮ ᱮᱛᱚᱦᱚᱵ ᱞᱮᱫᱼᱟ ᱾

 ᱦᱮᱞᱮᱱ ᱠᱮᱞᱚᱨ ᱫᱚ ᱢᱤᱫ ᱟᱢᱮᱨᱤᱠᱤᱭᱟᱹ ᱚᱱᱚᱞᱤᱭᱟᱹ, ᱨᱟᱡᱽᱟᱹᱨᱤᱭᱟᱹ ᱟᱨ ᱢᱤᱫ ᱥᱠᱚᱞᱟᱨ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱫᱚ ᱵᱟᱰᱚᱦᱤ ᱨᱮ ᱥᱚᱱᱮᱨ ᱮ ᱟᱢᱮᱴ ᱟᱠᱟᱫ ᱯᱩᱭᱞᱩ ᱠᱟᱹᱬᱤ, ᱠᱟᱹᱞᱤ ᱟᱨ ᱠᱩᱸᱫᱤᱭᱤᱡ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱫᱚ ᱥᱩᱞᱤᱵᱟᱱ ᱟᱜ ᱥᱮᱪᱮᱫ ᱨᱮ ᱖ ᱥᱮᱨᱢᱟ ᱩᱢᱮᱨ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱔᱙ ᱥᱮᱨᱢᱟ ᱩᱢᱮᱨ ᱛᱮᱫᱚ ᱥᱮᱪᱮᱫ ᱨᱮᱱᱟᱜ ᱡᱤᱛᱠᱟᱹᱨ ᱨᱮ ᱢᱤᱫ ᱞᱟᱯᱷᱟᱝ ᱴᱷᱟᱶ ᱮ ᱟᱢᱮᱴ ᱦᱩᱭ ᱟᱠᱟᱫ ᱛᱟᱦᱮᱸᱫ ᱾

 (ᱦᱮᱞᱮᱱ ᱠᱮᱞᱚᱨ ᱟᱜ ᱠᱷᱟᱴᱚ ᱡᱤᱭᱚᱱ ᱠᱟᱹᱦᱱᱤ ᱠᱷᱚᱱ ᱟᱹᱰᱤ ᱱᱟᱯᱟᱭ ᱥᱮᱪᱮᱫ ᱜᱮ ᱥᱟᱱᱟᱢ ᱠᱚᱵᱚᱱ ᱧᱟᱢ ᱫᱟᱲᱮᱭᱟᱜᱼᱟ ᱾ ᱵᱟᱹᱲᱛᱤᱠᱟᱭ ᱛᱮᱫᱚ ᱠᱩᱲᱤ ᱦᱚᱯᱚᱱ ᱠᱚ ᱞᱟᱹᱜᱤᱫ ᱩᱫᱽᱜᱟᱹᱣ ᱦᱚᱨ ᱨᱮ ᱢᱟᱨᱥᱟᱞ ᱵᱟᱹᱛᱤ ᱞᱮᱠᱟ ᱾ ᱦᱮᱞᱮᱱ ᱠᱮᱞᱚᱨ ᱫᱚ ᱜᱤᱫᱽᱨᱟᱹ ᱠᱷᱚᱱ ᱜᱮ ᱠᱟᱹᱬᱤ, ᱠᱟᱹᱞᱤ ᱟᱨ ᱠᱩᱸᱫᱤᱭ ᱛᱟᱦᱮᱸ ᱠᱟᱱ ᱨᱮᱦᱚᱸ ᱥᱮᱪᱮᱫ ᱟᱢᱮᱴ ᱨᱮᱱᱟᱜ ᱟᱡᱟᱜ ᱜᱟᱺᱦᱤᱨ ᱟᱸᱥ ᱜᱮ ᱟᱡ ᱫᱚ ᱥᱮᱪᱮᱫ ᱨᱮᱱᱟᱜ ᱞᱟᱯᱷᱟᱝ ᱡᱤᱛᱠᱟᱹᱨ ᱴᱷᱟᱶ ᱮ ᱟᱢᱮᱴ ᱚᱪᱚ ᱞᱮᱫᱮ ᱛᱟᱦᱮᱸᱫ ᱾ ᱱᱚᱶᱟ ᱠᱟᱹᱦᱱᱤ ᱠᱷᱚᱱ ᱜᱮ ᱵᱟᱰᱟᱭᱚᱜ ᱠᱟᱱᱟ, ᱡᱟᱦᱟᱸᱱᱟᱜ ᱠᱟᱹᱢᱤ ᱞᱟᱹᱜᱤᱫ ᱜᱮ ᱢᱚᱱᱮᱨᱮ ᱜᱟᱺᱦᱤᱨ ᱟᱸᱥ ᱛᱟᱦᱮᱸᱱ ᱠᱷᱟᱱ ᱱᱚᱶᱟ ᱫᱷᱟᱹᱨᱛᱤ ᱨᱮ ᱚᱱᱠᱟᱱ ᱪᱮᱫ ᱫᱟᱲᱮ ᱦᱚᱸ ᱵᱟᱹᱱᱩᱜ ᱟᱱᱟ, ᱡᱟᱦᱟᱸ ᱫᱚ ᱠᱩᱨᱩᱢᱩᱴᱩ ᱪᱷᱩᱴᱟᱹᱣ ᱟᱠᱟᱱ ᱦᱚᱲ ᱥᱟᱢᱟᱝ ᱨᱮ ᱡᱟᱸᱜᱮ ᱛᱤᱸᱜᱩᱱᱟ ᱾ ᱡᱤᱭᱚᱱ ᱨᱮ ᱛᱟᱲᱟᱢ ᱡᱟᱸᱜᱟ ᱞᱟᱦᱟᱭ ᱨᱮ ᱡᱟᱸᱜᱮ ᱢᱮᱱᱟᱜᱼᱟ ᱢᱮᱱᱮᱛ ᱚᱱᱟ ᱫᱚ ᱫᱚᱲᱦᱚ ᱯᱟᱹᱣᱲᱤ ᱢᱟᱬᱟᱝ ᱛᱮ ᱞᱟᱦᱟᱭ ᱨᱮᱱᱟᱜ ᱩᱱᱩᱫᱩᱜ ᱠᱟᱱᱟ ᱾ )

***

About the author

ᱢᱟᱭᱱᱚ ᱴᱩᱰᱩ

ᱢᱟᱭᱱᱚ ᱴᱩᱰᱩ

ᱢᱟᱹᱱᱤᱡ ᱢᱟᱭᱱᱚ ᱴᱩᱰᱩ ᱫᱚ ᱢᱤᱫ ᱚᱱᱚᱞᱤᱭᱟᱹ ᱠᱟᱱᱟᱭ ᱾ ᱟᱹᱰᱤ ᱞᱮᱠᱟᱱ ᱯᱚᱛᱚᱵ ᱠᱚᱭ ᱯᱟᱨᱥᱟᱞ ᱦᱩᱭ ᱟᱠᱟᱫᱼᱟ ᱾ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱶᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱒᱐᱑᱗ ᱨᱮ Yuva Puraskar ᱛᱮᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾ ᱡᱟᱱᱟᱢ ᱯᱟᱹᱨᱥᱤ ᱵᱟᱧᱪᱟᱣ ᱟᱨ ᱚᱞ ᱪᱤᱠᱤ ᱪᱷᱟᱨᱟᱣ ᱫᱚ ᱟᱡᱟᱜ ᱡᱤᱭᱚᱱ ᱨᱮᱱᱟᱜ ᱯᱩᱭᱞᱩ ᱟᱺᱜᱤᱵᱷᱟᱨ ᱠᱟᱱᱟ ᱾

View all posts

1 Comment

Leave a Reply

Your email address will not be published. Required fields are marked *