ᱦᱩᱞ ᱢᱟᱦᱟᱸ

᱑᱘᱕᱕ ᱥᱟᱞᱮ ᱨᱮ ᱓᱐ ᱢᱟ ᱡᱩᱱ ᱨᱮ
ᱥᱚᱱᱚᱛ ᱫᱷᱟᱹᱨᱛᱤ ᱨᱮ
ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮ
ᱵᱤᱨᱵᱟᱱᱴᱟ ᱥᱤᱫᱩ ᱠᱟᱹᱱᱦᱩ ᱪᱟᱸᱫᱽ ᱵᱷᱟᱭᱨᱚ
ᱦᱩᱞ ᱠᱚ ᱦᱩᱞᱥᱟᱹᱭ ᱞᱮᱫ-ᱟ ᱾

ᱟ.ᱫᱤᱢ ᱠᱷᱮᱨᱣᱟᱲ ᱛᱩᱞᱩᱡ
ᱨᱚᱰᱚᱡ-ᱠᱚᱪᱚᱞᱚᱱ, ᱞᱩᱴ
ᱛᱤᱨᱞᱟᱹ ᱦᱚᱯᱚᱱ ᱨᱮ
ᱤᱝᱨᱮᱡᱽ ᱠᱚᱣᱟᱜ ᱵᱟᱹᱲᱤᱡ
ᱱᱚᱡᱚᱨ ᱜᱮ ᱛᱟᱸᱦᱮ ᱞᱮᱱ ᱾

ᱥᱤᱫᱩ ᱠᱟᱹᱱᱦᱩ ᱪᱟᱸᱫᱽ ᱵᱷᱟᱭᱨᱚ
ᱵᱟᱝ ᱠᱚ ᱥᱟᱦᱟᱣ ᱞᱮᱫ
ᱞᱚᱞᱚ ᱢᱟᱭᱟᱢ ᱦᱩᱨᱩᱢ ᱦᱩᱨᱩᱢ
ᱟᱜ ᱥᱟᱨ ᱠᱟᱹᱯᱤ ᱛᱟᱨᱣᱟᱲᱮ
ᱞᱟᱹᱲᱦᱟᱹᱭ ᱥᱟᱢᱟᱱ ᱥᱟᱯᱟᱵ ᱟᱛᱮ
ᱢᱟᱲᱟᱝ ᱞᱮᱱ ᱠᱚ ᱦᱩᱞᱥᱟᱹᱭ ᱦᱩᱞᱥᱟᱹᱭ ᱾

ᱡᱩᱢᱤ ᱡᱟᱭᱜᱟ ᱨᱚᱯᱷᱟᱭ ᱞᱟᱹᱜᱤᱫ
ᱯᱷᱩᱨᱜᱟᱹᱞ ᱛᱟᱦᱮᱸᱱ ᱞᱟᱹᱜᱤᱫ
ᱡᱟᱹᱛᱤ ᱫᱷᱚᱨᱚᱢ ᱵᱟᱧᱪᱟᱣ ᱞᱟᱹᱜᱤᱫ ᱛᱩᱯᱩᱫ ᱞᱮᱱᱟ ᱠᱚ ᱵᱨᱤᱴᱤᱥ ᱛᱩᱞᱩᱡ
ᱵᱟᱠᱚ ᱛᱷᱤᱨ ᱞᱮᱱ ᱡᱟᱹᱯᱤᱫ ᱾

ᱦᱩᱞᱜᱟᱹᱨᱤᱭᱟᱹ ᱯᱷᱩᱞᱚ ᱡᱷᱟᱱᱚ
ᱞᱟᱥᱟᱬᱦᱮᱫ ᱮᱱᱮᱢ ᱛᱟᱹᱠᱤᱱ
ᱛᱤᱨᱞᱟᱹ ᱦᱚᱯᱚᱱ ᱨᱮ ᱱᱟᱦᱟᱪᱟᱨ ᱵᱟᱹᱲᱤᱡ
ᱧᱮᱞ ᱛᱮ ᱵᱟᱹᱠᱤᱱ ᱛᱟᱦᱮᱸ ᱞᱮᱱ ᱛᱷᱤᱨ
ᱴᱮᱸᱜᱚᱡ ᱠᱟᱹᱯᱤ ᱜᱚᱜ ᱠᱟᱛᱮ
ᱵᱮᱱᱟᱣ ᱞᱮᱱ ᱠᱤᱱ ᱵᱤᱨ ᱾

ᱥᱟᱨᱡᱚᱢ ᱥᱟᱠᱟᱢ ᱥᱟᱹᱜᱩᱱ ᱦᱩᱞᱥᱟᱹᱭ ᱜᱤᱨᱟᱹ
ᱥᱮᱴᱮᱨ ᱞᱮᱫ ᱠᱤᱱ ᱟᱹᱛᱩ ᱟᱹᱛᱩ
ᱦᱩᱞ ᱡᱩᱢᱤᱫᱽ ᱜᱤᱨᱟᱹ
ᱜᱚᱨᱟ ᱯᱟᱞᱴᱚᱱ ᱦᱮᱞᱮᱡ ᱞᱟᱹᱜᱤᱫ
ᱦᱟᱛᱟᱣ ᱞᱮᱫ ᱠᱤᱱ ᱠᱤᱨᱟᱹ ᱾

ᱫᱤᱥᱚᱢ ᱞᱟᱹᱜᱤᱫ ᱢᱟᱭᱟᱢ
ᱞᱤᱝᱡᱤ ᱞᱮᱱ ᱵᱩᱨᱩ ᱦᱟᱨᱟ ᱜᱚᱴᱟ
ᱦᱟᱡᱟᱨ ᱦᱟᱡᱟᱨ ᱠᱷᱮᱨᱣᱟᱲ
ᱦᱚᱯᱚᱱ ᱡᱤᱣᱤ ᱫᱟᱱ ᱞᱮᱱ
ᱫᱷᱚᱨᱚᱢ ᱨᱚᱯᱷᱟᱭ ᱮᱨᱟ -ᱩᱨᱩ ᱠᱟᱛᱮ ᱠᱚᱴᱟ ᱾

ᱵᱤᱨ ᱵᱟᱱᱴᱟ ᱟᱯᱮ ᱥᱟᱱᱟᱢ
ᱦᱩᱞᱜᱟᱹᱨᱤᱭᱟᱹ ᱠᱚ
ᱯᱟᱸᱡᱟ ᱯᱚᱨᱟᱭᱱᱤ ᱨᱮ ᱥᱟᱭ ᱥᱟᱭ
ᱞᱟᱥᱟᱬᱦᱮᱫ ᱢᱟᱱᱚᱛ ᱜᱚᱰ ᱡᱚᱦᱟᱨ ᱾

***

About the author

ᱥᱚᱢᱵᱟᱹᱨᱤ ᱵᱟᱥᱠᱮ

ᱥᱚᱢᱵᱟᱹᱨᱤ ᱵᱟᱥᱠᱮ

ᱢᱟᱹᱱᱤᱡ ᱥᱚᱢᱵᱟᱹᱨᱤ ᱵᱟᱥᱠᱮ ᱛᱤᱠᱤᱱᱟᱜ ᱡᱟᱱᱟᱢ ᱟᱹᱛᱩ ᱫᱤᱥᱚᱢ ᱫᱚ ᱺ ᱥᱟᱢᱟᱝ ᱥᱤᱝᱵᱷᱩᱢ, ᱡᱷᱟᱨᱠᱷᱚᱸᱰ ᱾
ᱱᱤᱛᱚᱜ ᱫᱚ ᱵᱤᱥᱟᱠᱷᱟᱯᱟᱴᱱᱟᱢ, ᱟᱸᱫᱷᱨᱚ ᱯᱨᱚᱫᱮᱥ ᱨᱮ ᱠᱤᱱ ᱛᱟᱦᱮᱸᱱ ᱠᱟᱱᱟ ᱾

View all posts

Leave a Reply

Your email address will not be published. Required fields are marked *