ᱦᱟᱨᱠᱮᱛᱚᱜ ᱠᱟᱱ ᱛᱤᱨᱞᱟᱹ ᱡᱤᱭᱚᱱ

ᱟᱭᱳ ᱵᱟᱵᱟᱦᱟᱜ ᱠᱚᱞᱮ ᱦᱚᱵᱚᱨ ᱨᱮ ᱜᱤᱫᱽᱨᱟᱹ ᱫᱚ ᱥᱚᱱᱟ ᱢᱤᱨᱩ ᱫᱩᱞᱟᱹᱲ ᱨᱮᱱ ᱫᱷᱚᱱ ᱾ ᱮᱱᱛᱮ ᱨᱮᱦᱚᱸ ᱪᱮᱫᱟᱜ ᱪᱚ ᱠᱚᱲᱟ ᱜᱤᱫᱽᱨᱟᱹ ᱪᱮᱛᱟᱱ ᱟᱥᱟ ᱵᱷᱚᱨᱥᱟ ᱥᱚᱦᱟᱜᱽ ᱫᱩᱞᱟᱹᱲ ᱱᱟᱥᱮ ᱫᱚ ᱰᱮᱦᱮᱨᱚᱜ ᱜᱮᱭᱟ ᱾ ᱠᱩᱲᱤ ᱜᱤᱫᱽᱨᱟᱹ ᱫᱚ ᱮᱴᱟᱜ ᱚᱲᱟᱜ ᱞᱟᱹᱜᱤᱫ ᱜᱮ ᱩᱱᱤ ᱪᱮᱛᱟᱱ ᱱᱟᱥᱮ ᱜᱚᱨᱚᱡᱽ ᱫᱩᱞᱟᱹᱲ ᱫᱚ ᱠᱚᱢᱚᱜ ᱜᱮᱭᱟ ᱾ ᱟᱹᱛᱩ ᱴᱚᱞᱟ ᱯᱟᱲᱟ ᱥᱩᱢᱩᱝ ᱫᱚ ᱵᱟᱝ ᱜᱚᱴᱟ ᱫᱤᱥᱚᱢ ᱜᱮ ᱱᱤᱛ ᱨᱮᱦᱚᱸ ᱱᱚᱶᱟ ᱪᱤᱛᱟᱹᱨ ᱡᱷᱟᱞᱠᱟᱣᱜ ᱠᱟᱱᱟ ᱾ ᱠᱩᱲᱤ ᱜᱤᱫᱽᱨᱟᱹ ᱡᱟᱦᱟᱸ ᱞᱮᱠᱟᱛᱮ ᱜᱚᱝ ᱜᱤᱰᱤ ᱠᱟᱭ ᱠᱷᱟᱱ ᱜᱮ ᱩᱱᱤ ᱪᱮᱛᱟᱱ ᱟᱨ ᱡᱟᱦᱟᱸᱱ ᱫᱟᱣ ᱥᱮ ᱟᱺᱜᱤᱵᱷᱟᱨ ᱫᱚ ᱨᱟᱣᱟᱞᱚᱜ ᱞᱮᱠᱟ ᱜᱮ ᱟᱹᱭᱠᱟᱹᱣᱜᱼᱟ ᱾ ᱟᱭᱳ ᱵᱟᱵᱟ ᱚᱲᱟᱜ ᱨᱮᱦᱚᱸ ᱠᱩᱲᱤ ᱜᱤᱫᱽᱨᱟᱹ ᱫᱚ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤ ᱜᱮᱠᱚ ᱥᱟᱛ ᱥᱟᱯᱲᱟᱣᱜᱼᱟ ᱾ ᱚᱲᱟᱜ ᱫᱩᱣᱟᱹᱨ ᱜᱷᱟᱨᱚᱸᱡᱽ ᱥᱚᱝᱥᱟᱨ ᱢᱚᱡᱽ ᱛᱮ ᱟᱨ ᱟᱹᱰᱤ ᱫᱩᱞᱟᱹᱲ ᱛᱮᱠᱚ ᱡᱚᱛᱚᱱ ᱡᱚᱜᱟᱣᱟ ᱾ ᱡᱟᱶᱟᱭ ᱞᱮᱠᱷᱟᱱ ᱜᱮ ᱩᱱᱤᱭᱟᱜ ᱡᱟᱝ ᱦᱚᱸ ᱡᱟᱝ ᱛᱚᱨᱚᱡ ᱦᱚᱸ ᱛᱚᱨᱚᱡ ᱟᱹᱠᱷᱨᱤᱧᱚᱜ ᱛᱟᱭ ᱞᱮᱠᱟ ᱜᱮ ᱾

ᱵᱩᱠᱟᱹ ᱛᱚᱯᱟ ᱡᱟᱱᱟᱢ ᱵᱷᱤᱴᱟᱹ ᱠᱷᱚᱱᱟᱜ ᱟᱡᱟᱜ ᱨᱮᱦᱮᱫ ᱛᱚᱯᱟᱜ ᱮᱱ ᱛᱟᱭ ᱞᱮᱠᱟ ᱜᱮ ᱾ ᱛᱤᱨᱞᱟᱹ ᱡᱤᱭᱚᱱ ᱨᱮᱱᱟᱜ ᱚᱞᱚᱝᱜᱟᱨ ᱫᱚ ᱱᱤᱭᱟᱹ ᱜᱮ ᱡᱟᱶᱟᱭ ᱚᱲᱟᱜ ᱦᱚᱲ ᱜᱮ ᱟᱯᱱᱟᱨ ᱟᱨ ᱚᱱ ᱟᱜᱮ ᱟᱯᱱᱟᱨᱟᱜ ᱜᱷᱟᱨᱚᱸᱡᱽ ᱾ ᱡᱤᱣᱤ ᱦᱚᱲᱢᱚ ᱟᱞᱟᱭ ᱠᱟᱛᱮ ᱥᱚᱦᱟᱜᱽ ᱫᱩᱞᱟᱹᱲ ᱥᱮᱯᱮᱧ ᱠᱟᱛᱮ ᱥᱩᱞᱩᱠ ᱜᱷᱟᱨᱚᱸᱡᱽ ᱨᱮᱱ ᱞᱟᱹᱣᱲᱤᱭᱟᱹ ᱵᱮᱱᱟᱣ ᱮᱱᱛᱮ ᱨᱮᱦᱚᱸ ᱡᱚᱛᱷᱟᱛ ᱢᱟᱹᱱ ᱫᱚ ᱱᱤᱛ ᱨᱮᱦᱚᱸ ᱵᱟᱹᱱᱩᱜᱼᱟ ᱾ ᱛᱤᱨᱞᱟᱹ ᱜᱮ ᱚᱲᱟᱜ ᱞᱩᱠᱷᱤ ᱱᱚᱶᱟ ᱠᱟᱛᱷᱟ ᱢᱮᱱᱚᱜ ᱠᱟᱱ ᱨᱮᱦᱚᱸ ᱧᱩ ᱵᱩᱞ ᱵᱷᱩᱛᱟᱹᱲ ᱠᱟᱛᱮ ᱚᱲᱟᱜ ᱮᱨᱟ ᱫᱟᱞ ᱛᱚᱞ ᱨᱚᱸᱡᱚᱱ ᱫᱚ ᱞᱮᱛᱟᱲ ᱜᱮ ᱢᱮᱱᱟᱜᱼᱟ ᱾ ᱨᱮᱸᱜᱮᱡ ᱱᱟᱪᱟᱨ ᱜᱷᱟᱨᱚᱸᱡᱽ ᱥᱩᱢᱩᱝ ᱫᱚ ᱵᱟᱝ ᱟᱭᱢᱟ ᱜᱷᱟᱨᱚᱸᱡᱽ ᱨᱮᱜᱮ ᱠᱟᱹᱣᱡᱟᱹ ᱠᱷᱟᱹᱯᱟᱹᱨᱤ ᱞᱮᱛᱟᱲ ᱟᱠᱟᱱᱟ ᱾ ᱛᱤᱨᱞᱟᱹ ᱡᱤᱭᱚᱱ ᱫᱚ ᱦᱟᱨᱠᱮᱛ ᱟᱠᱟ ᱜᱮ ᱢᱮᱱᱟᱜᱼᱟ ᱾ ᱜᱷᱟᱨᱚᱸᱡᱽ ᱨᱮᱱ ᱡᱟᱦᱟᱸᱭᱟᱜ ᱨᱩᱣᱟᱹ ᱷᱟᱹᱥᱩ ᱨᱮᱦᱚᱸ ᱟᱡ ᱜᱮ ᱥᱮᱵᱟ ᱠᱟᱹᱢᱤᱨᱮ ᱪᱷᱩᱴᱟᱹᱣ ᱟᱠᱟᱭ ᱛᱟᱦᱮᱸᱱᱟ ᱾ ᱥᱮᱵᱟ ᱡᱚᱛᱚᱱ ᱠᱟᱛᱮᱭ ᱯᱷᱟᱹᱨᱭᱟᱹ ᱨᱩᱣᱟᱹᱲ ᱮᱭᱟ ᱾ ᱢᱮᱱᱠᱷᱟᱱ ᱟᱡᱟᱜ ᱨᱩᱣᱟᱹ ᱷᱟᱹᱥᱩ ᱨᱮᱫᱚ ᱚᱠᱚᱭ ᱦᱚᱸ ᱥᱟᱶᱨᱮ ᱵᱟᱭ ᱧᱟᱢ ᱠᱚᱣᱟ ᱾ ᱟᱭᱢᱟ ᱥᱮᱫ ᱜᱮ ᱧᱮᱞᱚᱜᱼᱟ ᱱᱚᱝᱠᱟᱱ ᱦᱟᱨᱠᱮᱛᱚᱜ ᱨᱮᱱᱟᱜ ᱪᱤᱛᱟᱹᱨ ᱾ ᱟᱯᱱᱟᱨᱤᱡ ᱡᱤᱣᱤ ᱡᱩᱨᱤ ᱦᱚᱸᱭ ᱜᱤᱰᱤᱵᱟᱝᱚᱜᱼᱟ ᱾ ᱱᱚᱶᱟ ᱠᱷᱚᱱᱟᱜ ᱟᱨ ᱡᱟᱦᱟᱸ ᱞᱮᱠᱟᱱ ᱫᱩᱠ ᱫᱚ ᱵᱟᱹᱱᱩᱜᱼᱟ ᱾

ᱡᱟᱦᱟᱸ ᱜᱷᱟᱨᱚᱸᱡᱽ ᱞᱟᱹᱜᱤᱫ ᱟᱯᱱᱟᱨᱟᱜ ᱡᱤᱣᱤ ᱦᱚᱲᱢᱚ ᱟᱞᱟᱭᱚᱜᱼᱟ ᱾ ᱚᱸᱰᱮ ᱜᱮ ᱟᱯᱱᱟᱨ ᱞᱟᱹᱜᱤᱫ ᱫᱚ ᱚᱠᱚᱭ ᱦᱚᱸ ᱵᱟᱹᱱᱩᱜ ᱠᱚᱣᱟ ᱾ ᱛᱤᱨᱞᱟᱹ ᱦᱚᱯᱚᱱᱟᱜ ᱫᱚ ᱨᱩᱣᱟᱹ ᱷᱟᱹᱥᱩ ᱢᱮᱱᱛᱮ ᱟᱞᱚ ᱛᱟᱦᱮᱸᱱ ᱢᱟ ᱾ ᱡᱤᱭᱚᱱ ᱵᱷᱩᱨ ᱜᱮ ᱟᱞᱟᱭ ᱟᱠᱟᱭ ᱛᱟᱦᱮᱸᱱᱟ ᱾ ᱚᱱᱟ ᱛᱟᱞᱟᱨᱮ ᱥᱤᱧ ᱧᱤᱫᱟᱹ ᱠᱷᱟᱴᱟᱣ ᱠᱟᱛᱮ ᱟᱯᱱᱟᱨᱟᱜ ᱦᱚᱲᱢᱚ ᱡᱤᱣᱤ ᱟᱞᱟᱭ ᱠᱟᱛᱮ ᱜᱷᱟᱨᱚᱸᱡᱽ ᱥᱚᱝᱥᱟᱨ ᱨᱮ ᱞᱟᱸᱫᱟᱭ ᱯᱷᱚᱴᱮᱞ ᱚᱪᱚᱭᱟ ᱾ ᱱᱚᱶᱟ ᱛᱮ ᱡᱩᱫᱤ ᱦᱚᱲᱢᱚ ᱡᱤᱣᱤ ᱨᱮ ᱡᱟᱦᱟᱸ ᱞᱮᱠᱟ ᱢᱟᱨᱟᱝ ᱧᱚᱜ ᱨᱩᱣᱟᱹ ᱷᱟᱹᱥᱩ ᱛᱟᱱᱟᱜ ᱧᱟᱢᱮᱱᱟ, ᱩᱱ ᱫᱚ ᱩᱱᱤ ᱪᱮᱛᱟᱱ ᱫᱟᱭᱟ ᱫᱩᱞᱟᱹᱲ ᱥᱮᱵᱟ ᱡᱚᱛᱚᱱ ᱞᱮᱠᱟ ᱛᱮ ᱦᱚᱲ ᱜᱮ ᱵᱟᱝ ᱠᱚ ᱯᱟᱸᱡᱟ ᱧᱟᱢᱚᱜᱼᱟ ᱾ ᱜᱷᱟᱨᱚᱸᱡᱽ ᱨᱤᱱ ᱵᱚᱡᱷᱟ ᱞᱮᱠᱟ ᱛᱤᱱ ᱨᱮᱠᱚ ᱞᱮᱵᱽᱫᱟ ᱥᱟᱦᱟ ᱮᱭᱟ ᱚᱱᱟ ᱩᱭᱦᱟᱹᱨ ᱜᱮ ᱢᱟᱬᱟᱝᱚᱜᱼᱟ ᱾ ᱦᱟᱹᱥᱩᱨ ᱵᱮᱲᱟ ᱨᱮ ᱡᱟᱹᱨᱤ ᱵᱟᱲᱟ ᱞᱮᱠᱷᱟᱱ ᱦᱚᱸ ᱦᱚᱱ ᱦᱚᱯᱚᱱ ᱦᱚᱸ ᱟᱺᱜᱤᱵᱷᱟᱨ ᱮᱲᱟᱣ ᱜᱮ ᱥᱟᱱᱟ ᱠᱚᱣᱟ ᱾ ᱡᱟᱱᱟᱢ ᱟᱭᱳ ᱪᱮᱛᱟᱱ ᱥᱚᱦᱟᱜᱽ ᱫᱩᱞᱟᱹᱲ ᱦᱚᱸ ᱢᱟᱹᱞᱪᱷᱟᱹ ᱪᱟᱵᱟᱜᱼᱟ ᱾ ᱟᱯᱱᱟᱨᱟᱜ ᱞᱟᱹᱜᱤᱫ ᱛᱟᱦᱮᱸᱱ ᱴᱷᱟᱶ ᱦᱚᱸ ᱵᱟᱝ ᱛᱟᱦᱮᱸᱱᱟ ᱾ ᱩᱱ ᱫᱚ ᱫᱟᱜ ᱫᱚᱲᱚᱢ ᱞᱮᱱᱠᱷᱟᱱ ᱜᱮ ᱱᱟᱯᱟᱭᱟ ᱾

***

About the author

ᱥᱩᱪᱤᱛᱨᱟ ᱦᱟᱸᱥᱫᱟᱜ

ᱥᱩᱪᱤᱛᱨᱟ ᱦᱟᱸᱥᱫᱟᱜ

ᱥᱩᱪᱤᱛᱨᱟ ᱦᱟᱸᱥᱫᱟᱜ ᱫᱚ ᱢᱤᱫ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱠᱟᱱᱟᱭ ᱾ ᱟᱡᱟᱜ ᱢᱤᱫ ᱥᱚᱨᱮᱥ ᱚᱱᱚᱬᱦᱮ ᱯᱩᱛᱷᱤ ᱞᱟᱹᱜᱤᱫ ᱒᱐᱑᱔ ᱨᱮ ᱥᱟᱦᱤᱛᱭᱚ ᱮᱠᱟᱰᱮᱢᱤᱹ ᱱᱟᱶᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱭᱩᱵᱚ ᱯᱩᱨᱚᱥᱠᱟᱨ ᱛᱮᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾ ᱟᱡ ᱫᱚ ᱱᱤᱛᱚᱜ ᱥᱟᱣᱩᱛᱷ ᱥᱩᱵᱷᱟᱥᱯᱟᱞᱤ, ᱦᱩᱜᱽᱞᱤ, ᱯᱩᱪᱷᱤᱢ ᱵᱮᱝᱜᱚᱞ ᱨᱮᱭ ᱛᱟᱦᱮᱸᱱ ᱠᱟᱱᱟ ᱾

View all posts

Leave a Reply

Your email address will not be published. Required fields are marked *