ᱟᱵᱚ ᱥᱚᱢᱟᱡᱽ ᱨᱮᱱ ᱛᱤᱨᱞᱟᱹ

ᱟᱵᱚ ᱠᱷᱮᱨᱣᱟᱲ ᱥᱚᱢᱟᱡᱽ ᱫᱚ ᱯᱤᱞᱪᱩ ᱦᱟᱲᱟᱢ ᱟᱨ ᱯᱤᱞᱪᱩ ᱵᱩᱰᱷᱤ ᱴᱷᱮᱱ ᱠᱷᱚᱱ ᱮᱦᱚᱵ ᱠᱟᱛᱮ ᱦᱟᱨᱟᱵᱩᱨᱩ ᱟᱠᱟᱱᱟ ᱾ ᱱᱩᱠᱤᱱ ᱜᱮ ᱠᱤᱱ ᱥᱤᱨᱡᱟᱹᱣ ᱞᱮᱫᱼᱟ ᱠᱷᱮᱨᱣᱟᱲ ᱵᱤᱨᱟᱹᱫᱟᱹᱞᱤ ᱾ ᱟᱹᱠᱤᱱ ᱴᱷᱮᱱ ᱠᱷᱚᱱ ᱜᱮ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱜ ᱱᱟᱜᱟᱢ ᱨᱮᱱᱟᱜ ᱮᱛᱚᱦᱚᱵ ᱫᱚ ᱾ ᱟᱫᱚ ᱦᱟᱱᱮ ᱩᱱ ᱠᱷᱚᱱ ᱜᱮ ᱱᱟᱜᱟᱢ ᱥᱤᱨᱡᱟᱹᱣ ᱨᱮ ᱢᱤᱫ ᱛᱤᱨᱞᱟᱹ ᱟᱜ ᱜᱚᱲᱚ ᱾ ᱟᱨ ᱵᱟᱝᱠᱷᱟᱱ ᱱᱚᱶᱟ ᱫᱷᱩᱲᱤ ᱫᱷᱟᱹᱨᱛᱤ ᱨᱮᱫᱚ ᱯᱟᱞᱮᱱ ᱢᱟᱹᱱᱢᱤ ᱧᱩᱛᱩᱢ ᱡᱤᱵᱽ ᱡᱟᱹᱱᱤᱡ ᱵᱟᱝ ᱠᱚ ᱛᱟᱦᱮᱸ ᱠᱚᱜᱼᱟ ᱾ ᱮᱱᱠᱷᱟᱱ ᱩᱱ ᱡᱚᱦᱚᱜ ᱟᱡ ᱨᱤᱱ ᱮᱭᱟᱭ ᱠᱩᱲᱤ ᱟᱨ ᱮᱭᱟᱭ ᱠᱚᱲᱟ ᱟᱛᱮᱫ ᱛᱚᱞ ᱩᱨᱤᱡ ᱞᱮᱫ ᱟᱭ ᱥᱟᱶᱛᱟ ᱨᱮᱱᱟᱜ ᱠᱷᱩᱱᱴᱤ, ᱡᱟᱦᱟᱸ ᱫᱚ ᱱᱤᱫ ᱦᱟᱹᱵᱤᱡ ᱛᱮ ᱚᱱᱟ ᱟᱹᱨᱤ ᱛᱮᱜᱮ ᱥᱟᱜᱟᱲ ᱪᱟᱞᱟᱜ ᱠᱟᱱᱟ ᱢᱤᱫ ᱢᱟᱨᱟᱝ ᱥᱚᱥᱱᱚᱜ ᱜᱟᱲ ᱾

ᱱᱚᱶᱟ ᱫᱚ ᱥᱟᱱᱟᱢ ᱜᱮᱵᱚ ᱟᱸᱜᱚᱪ ᱟᱠᱟᱫᱼᱟ, ᱥᱟᱶᱛᱟ ᱥᱟᱜᱟᱲ ᱜᱟᱹᱰᱤ ᱫᱚ ᱮᱠᱷᱮᱱ ᱢᱤᱫ ᱦᱚᱲ (ᱵᱟᱵᱟ ᱦᱚᱲ) ᱥᱩᱢᱩᱝ ᱛᱮᱫᱚ ᱥᱟᱸᱵᱽᱲᱟᱣ ᱵᱟᱝ ᱜᱟᱱᱚᱜᱼᱟ ᱾ ᱛᱤᱨᱞᱟᱹ ᱟᱜ ᱜᱚᱲᱚ ᱨᱮᱱᱟᱜ ᱮᱠᱟᱞ ᱜᱮ ᱞᱟᱹᱠᱛᱤ ᱢᱮᱱᱟᱜᱼᱟ ᱾ ᱟᱨ ᱞᱟᱹᱠᱛᱤ ᱢᱮᱱᱟᱜ ᱛᱮᱜᱮ ᱥᱟᱶᱛᱟ ᱟᱹᱨᱤ ᱨᱮᱱᱟᱜ ᱫᱷᱚᱨᱚᱢ, ᱠᱚᱨᱚᱢ, ᱞᱮᱠᱼᱱᱮᱢᱟᱪᱟᱨ, ᱠᱟᱹᱢᱤᱼᱠᱟᱹᱥᱱᱤ ᱠᱚᱨᱮ ᱛᱤᱨᱞᱟᱹ ᱟᱜ ᱜᱚᱲᱚ ᱫᱚ ᱧᱩᱢ ᱦᱟᱞᱟᱝ ᱞᱮᱠᱟᱛᱮ ᱟᱨ ᱠᱚ ᱥᱚᱦᱮᱫ ᱤᱫᱤ ᱟᱠᱟᱫ ᱛᱮ ᱥᱟᱱᱛᱟᱲ ᱥᱟᱶᱛᱟ ᱡᱤᱭᱟᱹᱲ ᱢᱮᱱᱟᱜᱼᱟ ᱾ ᱜᱷᱟᱨᱚᱸᱡᱽ ᱟᱨ ᱥᱟᱶᱛᱟ ᱨᱮᱱᱟᱜ ᱡᱚᱛᱚ ᱞᱮᱠᱟᱱ ᱠᱟᱹᱢᱤ ᱨᱮᱜᱮ ᱜᱚᱲᱚ ᱜᱚᱯᱚᱲᱚ ᱛᱟᱞᱟᱛᱮ ᱥᱟᱵ ᱥᱟᱢᱴᱟᱣ ᱠᱟᱛᱮ ᱠᱚ ᱯᱷᱮᱭᱞᱟᱣ ᱟᱠᱟᱫ ᱛᱟᱵᱚᱱ ᱛᱮ ᱥᱟᱶᱛᱟ ᱟᱹᱨᱤ ᱦᱚᱸ ᱡᱤᱭᱟᱹᱲ ᱢᱮᱱᱟᱜᱼᱟ ᱾ ᱢᱤᱫ ᱡᱚᱠᱷᱮᱡ ᱛᱤᱨᱞᱟᱹ ᱠᱚᱫᱚ ᱮᱠᱷᱮᱱ ᱜᱷᱟᱨᱚᱸᱡᱽ ᱥᱩᱢᱩᱝ ᱨᱮᱜᱮ ᱠᱟᱹᱢᱤ ᱥᱚᱦᱚᱫ ᱠᱚ ᱛᱟᱦᱮᱸ ᱠᱟᱱᱛᱮ ᱥᱟᱶᱛᱟ ᱜᱟᱱᱟᱰᱮ ᱦᱟᱹᱵᱤᱡ ᱜᱮ ᱟᱠᱚᱣᱟᱜ ᱚᱨᱥᱚᱝ ᱧᱮᱞ ᱧᱟᱢᱚᱜ ᱠᱟᱱ ᱛᱟᱦᱮᱸᱫ ᱾ ᱡᱮᱢᱚᱱ ᱚᱲᱟᱜ ᱫᱩᱣᱟᱹᱨ ᱯᱷᱟᱨᱪᱟ, ᱡᱮᱨᱮᱲ ᱯᱚᱛᱟᱣ ᱠᱟᱛᱮ ᱯᱤᱸᱰᱟᱹ ᱵᱷᱤᱛ ᱠᱚᱨᱮ ᱱᱟᱱᱟ ᱦᱩᱱᱟᱹᱨ ᱠᱟᱹᱲᱤ ᱨᱮ ᱟᱹᱰᱤ ᱥᱩᱜᱷᱚᱫᱽ ᱪᱤᱛᱟᱹᱨ ᱡᱷᱟᱞᱠᱟᱣᱜᱼᱟ ᱾ ᱚᱱᱠᱟ ᱜᱮ ᱵᱟᱯᱞᱟ ᱵᱮᱦᱟ, ᱥᱚᱦᱨᱟᱭ ᱥᱟᱠᱨᱟᱛ ᱠᱚᱨᱮ ᱮᱱᱮᱡ ᱥᱮᱨᱮᱧ ᱟᱨ ᱠᱮᱱᱮᱠᱚᱛᱮ ᱫᱚᱱ ᱠᱩᱪᱩᱫ ᱫᱚ ᱟᱹᱰᱤ ᱡᱩᱨ ᱜᱮ ᱢᱚᱱᱮᱭ ᱜᱟᱭᱜᱚᱢᱟ ᱾ ᱢᱚᱱᱮᱭᱟᱢ ᱡᱟᱹᱱᱤᱡ ᱜᱚᱴᱟ ᱵᱚᱥᱢᱚᱛᱟ ᱜᱮ ᱞᱟᱸᱫᱟ ᱮᱫ ᱠᱟᱱᱟ ᱟᱨ ᱦᱚᱸ ᱱᱚᱛᱮ ᱞᱮᱠᱼᱱᱮᱢᱟᱪᱟᱨ ᱠᱚᱨᱮ ᱞᱚᱴᱟ ᱫᱟᱜ ᱜᱚᱰ, ᱯᱮᱲᱟ ᱯᱚᱨᱵᱷᱩ ᱡᱟᱸᱜᱟ ᱟᱹᱨᱩᱵ, ᱯᱮᱲᱟ ᱫᱟᱨᱟᱢ, ᱵᱟᱯᱞᱟ ᱫᱟᱨᱟᱢ ᱫᱟᱜ ᱡᱟᱶᱟᱭ ᱮᱸᱜᱟᱛ ᱠᱚᱨᱮ ᱮᱠᱟᱞ ᱠᱷᱟᱱ ᱮᱠᱟᱞ ᱛᱤᱨᱞᱟᱹ ᱟᱜ ᱜᱮ ᱫᱚᱨᱠᱟᱨ ᱾ ᱢᱮᱱ ᱫᱚ ᱛᱤᱨᱞᱟᱹ ᱵᱮᱜᱚᱨ ᱥᱤᱨᱡᱚᱱ ᱫᱚ ᱚᱦᱚᱭ ᱥᱟᱦᱮᱫ ᱠᱮᱭᱟ ᱾ ᱟᱫᱚ ᱠᱷᱟᱱ ᱱᱚᱝᱠᱟ ᱜᱮ ᱡᱚᱛᱚ ᱨᱮ ᱛᱤᱨᱞᱟᱹ ᱟᱜ ᱥᱚᱯᱚᱦᱚᱫ ᱛᱟᱞᱟᱛᱮ ᱠᱷᱮᱨᱣᱟᱲ ᱵᱤᱨᱟᱹᱫᱟᱹᱞᱤ ᱨᱮᱱᱟᱜ ᱱᱟᱜᱟᱢ ᱫᱚ ᱟᱹᱭᱩᱨ ᱪᱟᱞᱟᱜ ᱠᱟᱱᱟ ᱾ ᱱᱤᱛ ᱥᱚᱥᱱᱚᱜ ᱡᱩᱜᱽ ᱨᱮ ᱵᱚᱱ ᱧᱮᱞ ᱮᱫᱟᱼᱟ – ᱛᱤᱨᱞᱟᱹ ᱠᱚᱫᱚ ᱮᱠᱷᱮᱱ ᱜᱷᱟᱨᱚᱸᱡᱽ ᱥᱮ ᱥᱟᱶᱛᱟ ᱥᱩᱢᱩᱝ ᱨᱮᱫᱚ ᱵᱟᱝ ᱚᱱᱟ ᱠᱷᱚᱱ ᱵᱟᱦᱮᱨ ᱦᱚᱸᱠᱚ ᱛᱟᱲᱟᱢ ᱯᱟᱨᱚᱢ ᱟᱹᱜᱩ ᱟᱠᱟᱫᱼᱟ ᱾ ᱥᱤᱠᱷᱱᱟᱹᱛ ᱠᱚ ᱟᱢᱮᱴ ᱡᱚᱝ ᱠᱟᱱᱟ ᱾ ᱱᱟᱱᱟ ᱦᱩᱱᱟᱹᱨ ᱠᱷᱮᱞᱚᱸᱰ ᱦᱮᱯᱨᱟᱣ ᱥᱟᱶᱦᱮᱫ ᱵᱟᱹᱭᱥᱤ, ᱥᱟᱶᱛᱟ ᱵᱷᱟᱹᱞᱟᱹᱭ ᱠᱟᱹᱢᱤ, ᱨᱟᱡᱽᱟᱹᱨᱤ ᱥᱮᱢᱞᱮᱫ ᱮᱢᱟᱱ ᱠᱚᱨᱮ ᱥᱮᱞᱮᱫ ᱠᱟᱛᱮ ᱵᱷᱟᱹᱜᱤ ᱴᱷᱟᱶ ᱨᱮᱠᱚ ᱛᱤᱸᱜᱩᱱ ᱠᱟᱱᱟ ᱥᱟᱶᱛᱮ ᱨᱩᱯᱼᱜᱩᱱ ᱛᱮᱦᱚᱸ ᱠᱚ ᱥᱚᱨᱮᱥᱚᱜ ᱠᱟᱱᱟ ᱾ ᱟᱢ ᱛᱮᱜᱮ ᱟᱢᱟᱜ ᱥᱟᱶᱛᱟ ᱪᱤᱛᱟᱹᱨ ᱨᱮᱱᱟᱜ ᱵᱚᱱᱚᱫᱚᱞ ᱚᱜ ᱠᱟᱱ ᱚᱵᱚᱥᱛᱟ ᱧᱮᱞ ᱛᱮ ᱦᱟᱦᱟᱲᱟ ᱜᱮᱢ ᱵᱩᱡᱷᱟᱹᱣ ᱠᱮᱭᱟ ᱾ ᱟᱫᱚ ᱠᱷᱟᱱ ᱱᱚᱶᱟ ᱥᱚᱥᱱᱚᱜ ᱥᱟᱶ ᱛᱟᱲᱟᱢ ᱯᱟᱱᱛᱮ ᱟᱠᱟᱱ ᱛᱤᱨᱞᱟᱹ ᱠᱚ ᱚᱠᱟ ᱦᱟᱨᱠᱮᱛ ᱜᱮ ᱵᱟᱝ ᱠᱚ ᱥᱟᱦᱟᱣ ᱯᱟᱨᱚᱢ ᱟᱹᱜᱩ ᱟᱠᱟᱫᱼ ᱚᱱᱟ ᱫᱚ ᱚᱦᱚ ᱵᱚᱱ ᱢᱮᱱ ᱠᱮᱭᱟ ᱾ ᱮᱱ ᱦᱚᱸ ᱥᱟᱶᱛᱟ ᱞᱟᱦᱟᱱᱛᱤ ᱨᱮ ᱜᱚᱲᱚ ᱠᱚ ᱮᱢ ᱟᱠᱟᱫ ᱦᱚᱛᱮᱛᱮ ᱩᱱᱠᱩ ᱦᱚᱸ ᱜᱚᱲᱚ ᱫᱚ ᱡᱟᱹᱨᱩᱲ ᱠᱟᱱᱟ ᱾ ᱥᱟᱶᱛᱟ ᱥᱮᱫ ᱵᱚᱱ ᱠᱚᱭᱚᱜ ᱟᱹᱪᱩᱨ ᱞᱮᱠᱷᱟᱱ ᱵᱚᱱ ᱧᱮᱞᱟ – ᱢᱤᱫᱴᱟᱹᱝ ᱟᱹᱛᱩᱨᱮ ᱡᱮ ᱞᱮᱠᱟ ᱠᱚᱲᱟ ᱜᱤᱫᱽᱨᱟᱹ ᱠᱚ ᱯᱟᱲᱦᱟᱣᱜᱼᱟ, ᱠᱩᱲᱤ ᱜᱤᱫᱽᱨᱟᱹ ᱫᱚ ᱵᱟᱝ ᱠᱚ ᱯᱟᱲᱦᱟᱣ ᱚᱪᱚ ᱠᱚᱣᱟ ᱾

ᱢᱩᱥᱠᱤᱞ ᱛᱮ ᱚᱱᱟ ᱟᱹᱛᱩ ᱠᱷᱚᱱ ᱜᱮᱞ ᱜᱚᱴᱟᱝ ᱠᱩᱲᱤ ᱜᱤᱫᱽᱨᱟᱹ ᱥᱤᱠᱷᱱᱟᱹᱛ ᱠᱚ ᱟᱢᱮᱴᱟ ᱾ ᱪᱮᱛᱟᱱ ᱵᱤᱨᱫᱟᱹᱜᱟᱲ ᱥᱮᱫ ᱦᱚᱸ ᱞᱟᱦᱟ ᱟᱠᱟᱱ ᱛᱤᱨᱞᱟᱹ ᱠᱚ ᱴᱷᱤᱠ ᱥᱟᱹᱦᱤᱸᱡ ᱯᱟᱲᱦᱟᱣ ᱨᱮ ᱜᱚᱲᱚ ᱵᱟᱝ ᱠᱚ ᱧᱟᱢ ᱛᱮ ᱥᱤᱠᱷᱱᱟᱹᱛ ᱫᱚ ᱴᱷᱟᱠᱮᱫᱚᱜ ᱛᱟᱠᱚᱣᱟ ᱾ ᱥᱮ ᱟᱹᱰᱤ ᱢᱩᱦᱤᱢ ᱫᱚᱥᱟ ᱨᱮ ᱛᱟᱦᱮᱸ ᱠᱟᱛᱮ ᱠᱚ ᱯᱟᱲᱦᱟᱣᱜᱼᱟ ᱾ ᱱᱚᱶᱟ ᱫᱚ ᱮᱠᱷᱮᱱ ᱚᱞ ᱯᱟᱲᱦᱟᱣ ᱥᱩᱢᱩᱝ ᱨᱮᱫᱚ ᱵᱟᱝ ᱡᱚᱛᱚ ᱞᱮᱠᱟᱱ ᱞᱟᱦᱟᱱᱛᱤ ᱰᱟᱦᱟᱨ ᱨᱮ ᱛᱟᱲᱟᱢ ᱚᱠᱛᱮ ᱢᱩᱥᱠᱤᱞ ᱨᱮᱫᱚ ᱠᱚ ᱯᱟᱲᱟᱣᱜ ᱠᱟᱱ ᱜᱮᱭᱟ ᱾ ᱥᱟᱶᱛᱟ ᱞᱟᱦᱟᱱᱛᱤ ᱨᱮ ᱡᱟᱸᱜᱟ ᱜᱤᱰᱤ ᱮᱫ ᱠᱷᱟᱱ ᱜᱮ ᱟᱭᱢᱟ ᱞᱮᱠᱟᱱ ᱚᱵᱷᱟᱵᱤᱭᱟᱹ ᱫᱚᱥᱟᱨᱮ ᱦᱚᱸ ᱧᱩᱨᱩᱜ ᱦᱩᱭᱩᱜ ᱠᱟᱱ ᱛᱟᱭᱟ ᱾

ᱮᱱᱠᱷᱟᱱ ᱛᱤᱨᱞᱟᱹ ᱟᱜ ᱢᱩᱦᱤᱢ ᱫᱚᱥᱟ ᱫᱚ ᱚᱠᱚᱭ ᱮ ᱩᱭᱦᱟᱹᱨᱟ, ᱛᱤᱨᱞᱟᱹ ᱞᱟᱦᱟᱱᱛᱤ ᱨᱮᱱᱟᱜ ᱡᱟᱦᱟᱸ ᱢᱩᱴᱷᱟᱹᱱ ᱚᱱᱟ ᱫᱚ ᱚᱠᱚᱭ ᱮ ᱥᱟᱵ ᱨᱟᱠᱟᱵᱟ ᱾ ᱪᱤᱠᱟᱹᱛᱮ ᱩᱱᱠᱩ ᱫᱚ ᱵᱚᱱ ᱟᱹᱭᱩᱨ ᱠᱚᱣᱟ ᱾ ᱱᱚᱶᱟ ᱜᱮ ᱵᱷᱟᱹᱵᱤᱛ ᱞᱟᱹᱠᱛᱤᱜ ᱠᱟᱱᱟ ᱾ ᱫᱤᱱ ᱯᱚᱞᱚᱢᱚᱜ ᱠᱟᱱᱟ – ᱦᱚᱭ ᱦᱤᱥᱤᱫ ᱵᱚᱫᱚᱞ ᱪᱟᱞᱟᱜ ᱠᱟᱱᱟ, ᱦᱤᱡᱩᱜ ᱠᱟᱱᱟ ᱢᱤᱫ ᱱᱟᱶᱟ ᱟᱱᱫᱟᱜ᱾ ᱠᱷᱟᱱ ᱚᱱᱟ ᱟᱱᱫᱚᱲ ᱨᱮ ᱵᱚᱱ ᱥᱮᱞᱮᱫ ᱢᱮᱥᱟ ᱞᱮᱱᱠᱷᱟᱱ ᱟᱹᱰᱤ ᱜᱮ ᱱᱟᱯᱟᱭ ᱠᱚᱜᱼᱟ ᱾ ᱢᱤᱫ ᱡᱟᱸᱜᱟ ᱵᱟᱨ ᱡᱟᱸᱜᱟ ᱠᱟᱛᱮ ᱡᱚᱛᱚ ᱥᱟᱱᱛᱟᱲᱤ ᱛᱤᱨᱞᱟᱹ ᱵᱚᱱ ᱛᱟᱲᱟᱢ ᱞᱟᱦᱟ ᱤᱫᱤ ᱞᱮᱠᱷᱟᱱ ᱥᱟᱶᱛᱟ ᱛᱚᱨᱟᱣ ᱨᱮ ᱟᱹᱰᱤ ᱜᱮ ᱜᱚᱲᱚ ᱧᱟᱢ ᱠᱮᱭᱟ ᱠᱚ ᱩᱱᱠᱩ ᱛᱤᱨᱞᱟᱹ ᱡᱟᱸᱦᱟᱭ ᱫᱚ ᱟᱨ ᱠᱚ ᱞᱮᱠᱟ ᱞᱟᱦᱟᱜ ᱨᱮᱱᱟᱜ, ᱠᱟᱹᱢᱤ ᱨᱮᱱᱟᱜ ᱠᱩᱠᱢᱩ ᱟᱛᱮ ᱵᱟᱧᱪᱟᱣᱜ ᱨᱮᱱᱟᱜ ᱟᱸᱥᱨᱮ ᱢᱮᱱᱟᱜ ᱠᱚᱣᱟ ᱾ ᱩᱱᱠᱩ ᱩᱫᱽᱜᱟᱹᱣ ᱥᱟᱨᱦᱟᱣ ᱥᱟᱶ ᱥᱟᱶᱛᱮ ᱟᱹᱭᱩᱨ ᱤᱫᱤ ᱨᱮᱱᱟᱜ ᱦᱚᱸ ᱞᱟᱹᱠᱛᱤ ᱢᱮᱱᱟᱜᱼᱟ ᱡᱟᱹᱥᱛᱤ ᱠᱟᱭᱛᱮ ᱾

ᱟᱵᱚ ᱥᱟᱱᱛᱟᱲ ᱥᱚᱢᱟᱡᱽ ᱨᱮ ᱨᱟᱺᱰᱤ ᱪᱷᱟᱹᱰᱣᱤ, ᱰᱟᱹᱱ ᱰᱟᱹᱯᱟᱹᱱ, ᱵᱟᱡᱟᱨ ᱠᱟᱹᱢᱤ ᱮᱢᱟᱱ ᱠᱚ ᱞᱟᱹᱭ ᱛᱮ ᱛᱤᱱᱟᱹᱜ ᱜᱮ ᱵᱟᱝ ᱱᱟᱦᱟᱪᱟᱨ ᱦᱩᱭᱩᱜ ᱠᱟᱱ, ᱜᱚᱡ ᱜᱤᱰᱤ ᱮᱫ ᱠᱚᱣᱟ ᱠᱚ, ᱫᱟᱞ ᱛᱚᱞ ᱮᱫ ᱠᱚᱣᱟ ᱠᱚ, ᱩᱱᱠᱩ ᱛᱟᱭᱚᱢ ᱚᱠᱚᱭ ᱦᱚᱸ ᱧᱮᱞ ᱦᱚᱲ ᱵᱟᱹᱱᱩᱜ ᱠᱚᱣᱟ, ᱜᱚᱲᱚ ᱦᱚᱲ ᱵᱟᱹᱱᱩᱜ ᱠᱚᱣᱟ – ᱟᱫᱚ ᱠᱷᱟᱱ ᱞᱟᱹᱠᱛᱤ ᱯᱟᱲᱟᱣᱜ ᱠᱟᱱᱟ ᱥᱟᱶᱛᱟ ᱡᱩᱢᱤᱫᱽ ᱨᱮᱱᱟᱜ ᱟᱨ ᱛᱤᱨᱞᱟᱹ ᱡᱩᱢᱤᱫᱽ ᱨᱮᱱᱟᱜ ᱾ ᱠᱟᱛᱷᱟ ᱨᱮᱜᱮ ᱢᱮᱱᱟᱜᱼᱟ – “ᱛᱤᱨᱞᱟᱹ ᱡᱩᱢᱤᱫᱽ ᱥᱚᱨᱮᱥ ᱡᱩᱢᱤᱫ ᱾” ᱛᱤᱨᱞᱟᱹ ᱡᱩᱢᱤᱫᱽ ᱟᱹᱰᱤ ᱜᱮ ᱡᱚᱨᱩᱲᱟ ᱾ ᱛᱤᱨᱞᱟᱹ ᱞᱟᱦᱟᱱᱛᱤ ᱵᱟᱠᱷᱨᱟ ᱛᱮ ᱟᱨ ᱥᱟᱶᱛᱟ ᱛᱚᱨᱟᱣ ᱵᱟᱠᱷᱨᱟ ᱦᱚᱸ ᱾ ᱮᱱᱠᱷᱟᱱ ᱜᱮ ᱦᱟᱯᱮᱱ ᱫᱤᱱ ᱨᱮᱱ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱵᱷᱟᱹᱜᱤ ᱰᱟᱦᱟᱨ ᱵᱚᱱ ᱪᱤᱭᱟᱹ ᱫᱟᱲᱮ ᱟᱠᱚᱣᱟ ᱟᱨ ᱛᱤᱨᱞᱟᱹ ᱠᱚ ᱞᱟᱹᱜᱤᱫ ᱦᱚᱸ ᱢᱤᱫ ᱥᱚᱱᱚᱛ ᱰᱟᱦᱟᱨ ᱵᱚᱱ ᱴᱷᱤᱠᱟᱹ ᱟᱠᱚᱣᱟ !!!
@@@

About the author

ᱥᱤᱵᱟᱱᱤ ᱴᱩᱰᱩ

ᱥᱤᱵᱟᱱᱤ ᱴᱩᱰᱩ

ᱢᱟᱹᱱᱤᱡ ᱥᱤᱵᱟᱱᱤ ᱴᱩᱰᱩ ᱫᱚ ᱢᱤᱫ ᱚᱱᱚᱞᱤᱭᱟᱹ ᱠᱟᱱᱟᱭ, ᱵᱟᱨ ᱪᱟᱸᱫᱚᱠᱤᱭᱟᱹ ᱥᱟᱶᱦᱮᱫ ᱯᱟᱛᱷᱟᱢ ᱥᱤᱨᱡᱚᱱ ᱨᱤᱱᱤᱡ ᱥᱟᱯᱲᱮᱛ ᱠᱟᱱᱟᱭ, ᱢᱤᱫ ᱧᱩᱢ ᱦᱟᱞᱟᱝ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱠᱟᱱᱟᱭ ᱾ Adivasi Women's Welfare Association (NGO) ᱨᱤᱱᱤᱡ ᱵᱩᱱᱤᱭᱟᱹᱫᱤᱭᱟᱹ, ᱪᱟᱭᱨᱮᱛ ᱟᱨ ᱟᱹᱭᱩᱨᱤᱭᱟᱹ ᱦᱚᱸ ᱠᱟᱱᱟᱭ ᱾ ᱟᱹᱫᱤᱵᱟᱹᱥᱤ ᱩᱛᱱᱟᱹᱣ ᱞᱟᱹᱜᱤᱫ ᱞᱮᱠᱟᱱ ᱞᱮᱠᱟᱱ ᱜᱟᱶᱛᱟ ᱥᱟᱶ ᱡᱩᱦᱩᱲᱟᱹᱣ ᱨᱮ ᱢᱮᱱᱟᱭᱟ ᱾ ᱥᱟᱨ ᱥᱟᱹᱜᱩᱱ ᱯᱚᱛᱨᱤᱠᱟ, ᱵᱟᱝᱠᱩᱲᱟ ᱯᱟᱦᱴᱟ ᱠᱷᱚᱱ ᱥᱚᱨᱮᱥ ᱛᱤᱨᱞᱟᱹ ᱥᱟᱯᱲᱮᱛ ᱵᱟᱠᱷᱨᱟ ᱒᱐᱐᱖ ᱥᱟᱞᱮᱨᱮ ᱢᱟᱹᱱ ᱥᱤᱨᱯᱷᱟᱹᱭ ᱟᱢᱮᱴ ᱟᱠᱟᱫᱼᱟ ᱾ ᱵᱚᱨᱫᱷᱚᱢᱟᱱ ᱡᱤᱞᱟ ᱡᱟᱦᱮᱨ ᱴᱨᱚᱥᱴ, ᱯᱩᱨᱵᱚ ᱵᱚᱨᱫᱷᱚᱢᱟᱱ ᱠᱷᱚᱱ ᱦᱚᱸ ᱒᱐᱑᱘ ᱨᱮ Editors' Achievement Award ᱛᱮᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ, ᱜᱚᱯᱟᱞᱜᱚᱸᱡᱽ, ᱵᱤᱦᱟᱨ, ᱟᱠᱷᱤᱞ ᱵᱤᱥᱣᱚ NGO Union ᱯᱟᱦᱴᱟ ᱠᱷᱚᱱ ᱒᱐᱒᱐ ᱨᱮ Best NGO Award ᱛᱮᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾ Best Humanitarian 2020, ᱟᱨ Super Woman 2020 Award ᱛᱮᱦᱚᱸᱭ ᱢᱟᱹᱱ ᱥᱤᱨᱯᱷᱟᱹ ᱟᱠᱟᱱᱟ ᱾ ᱚᱱᱟ ᱥᱟᱶᱛᱮ ᱟᱨ ᱦᱚᱸ ᱟᱭᱢᱟ ᱢᱟᱹᱱ ᱥᱤᱨᱯᱷᱟᱹᱭ ᱟᱢᱮᱴ ᱟᱠᱟᱫᱼᱟ ᱾ᱯᱚᱥᱪᱤᱢ ᱵᱚᱨᱫᱷᱚᱢᱟᱱ, ᱯᱩᱪᱷᱤᱢ ᱵᱮᱝᱜᱚᱞ ᱯᱚᱱᱚᱛ ᱨᱮ ᱟᱡᱟᱜ ᱡᱟᱱᱟᱢ ᱫᱤᱥᱚᱢ ᱫᱚ ᱾

View all posts

Leave a Reply

Your email address will not be published. Required fields are marked *