ᱥᱟᱱᱫᱮᱥ




‘ᱟᱭᱳ ᱟᱲᱟᱝ’ ᱥᱟᱶᱦᱮᱫ ᱯᱟᱛᱷᱟᱢ ᱵᱤᱥᱟᱠᱷᱟᱯᱟᱴᱱᱟᱢ ᱠᱷᱚᱱ ᱩᱪᱷᱟᱹᱱᱚᱜ ᱠᱟᱱ ᱵᱟᱰᱟᱭ ᱠᱟᱛᱮᱧ ᱨᱟᱹᱥᱠᱟᱹ ᱮᱱᱟ ᱾ ᱱᱚᱶᱟ ᱯᱟᱛᱷᱟᱢ ᱨᱮᱱᱟᱜ ᱠᱷᱟᱥ ᱠᱟᱛᱷᱟ ᱫᱚ ᱦᱩᱭᱩᱜ ᱠᱟᱱᱟ – ᱱᱚᱶᱟ ᱫᱚ ᱛᱤᱨᱞᱟᱹ ᱠᱚᱣᱟᱜ ᱯᱟᱛᱷᱟᱢ ᱠᱟᱱᱟ, ᱟᱠᱚ ᱜᱮᱠᱚ ᱥᱟᱡᱟᱣ ᱥᱟᱯᱲᱟᱣᱟ, ᱟᱠᱚᱣᱟᱜ ᱚᱞ ᱜᱮ ᱴᱷᱟᱶ ᱮ ᱧᱟᱢᱟ ᱟᱨ ᱱᱚᱶᱟ ᱫᱚ ᱤᱼᱯᱟᱛᱷᱟᱢ ᱠᱟᱱᱟ ᱾ ᱛᱟᱭᱚᱢ ᱫᱟᱨᱟᱢ ᱪᱷᱟᱯᱟ ᱠᱟᱛᱮ ᱧᱟᱢᱚᱜᱼᱟ ᱢᱮᱱᱛᱮ ᱟᱸᱥ ᱠᱚ ᱫᱚᱦᱚ ᱟᱠᱟᱫᱼᱟ ᱾

 ᱥᱟᱱᱛᱟᱲᱤ ᱥᱟᱶᱦᱮᱫ ᱪᱟᱨᱪᱟᱭᱮᱫ ᱛᱤᱨᱞᱟᱹ ᱠᱚᱣᱟᱜ ᱞᱮᱠᱷᱟ ᱫᱚ ᱟᱹᱰᱤ ᱠᱚᱢ ᱜᱮᱭᱟ᱾ ᱩᱱᱠᱩ ᱩᱫᱽᱜᱟᱹᱣ ᱥᱮ ᱩᱥᱠᱩᱨ ᱮᱢᱟ ᱠᱚ ᱱᱚᱶᱟ ᱯᱟᱛᱷᱟᱢ ᱨᱮᱱᱟᱜ ᱫᱤᱥ ᱦᱩᱫᱤᱥ ᱦᱚᱸ ᱠᱟᱱᱟ ᱾

 ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ‘ᱟᱭᱳ ᱟᱲᱟᱝ’ ᱨᱮᱱᱟᱜ ᱛᱟᱲᱟᱢ ᱰᱟᱦᱟᱨ ᱥᱟᱨ ᱠᱚᱜ ᱥᱟᱹᱜᱩᱱ ᱠᱚᱜ ᱢᱟ ᱾

ᱡᱚᱦᱟᱨ !!! ᱡᱚᱫᱩᱢᱚᱬᱤ ᱵᱮᱥᱨᱟ, ᱢᱟᱹ ᱗/᱙/᱒᱐᱒᱐ ᱦᱤᱛ, ᱠᱷᱚᱲᱚᱜᱽᱯᱩᱨ, ᱯᱩᱪᱷᱤᱢ ᱵᱮᱝᱜᱚᱞ ᱿


“ ᱡᱚᱦᱟᱨ ᱜᱚᱸᱥᱟᱭ ᱢᱟᱨᱟᱝ ᱵᱩᱨᱩ ᱦᱤᱨᱞᱟᱹ ”

ᱚᱱᱚᱞᱤᱭᱟᱹ ᱢᱟᱹᱱᱤ ᱢᱟᱭᱱᱚ ᱴᱩᱰᱩ ᱥᱟᱸᱳ ᱢᱤᱫ ᱫᱤᱱ ᱜᱟᱞᱢᱟᱨᱟᱣ ᱦᱳᱭᱳᱜ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱠᱟᱛᱷᱟ ᱠᱟᱛᱷᱟ ᱛᱮᱭ ᱞᱟᱹᱭ ᱠᱮᱫᱟ, ‘ᱜᱚᱢᱠᱮ ᱵᱷᱟᱨᱚᱛ ᱫᱤᱥᱚᱢ ᱨᱤᱱ ᱛᱤᱨᱞᱟᱹ ᱳᱱᱚᱞᱤᱭᱟᱹ ᱠᱚ ᱟᱛᱮ, ᱯᱮ ᱪᱟᱸᱫᱳᱠᱤᱭᱟᱹ “ ᱟᱭᱳ ᱟᱲᱟᱝ ”, ᱧᱩᱛᱩᱢᱟᱱ ᱥᱟᱸᱳᱦᱮᱫ ᱯᱟᱛᱷᱟᱢ ᱞᱮ ᱥᱟᱯᱲᱟᱣ ᱞᱟᱹᱜᱤᱫ’ ᱾

 ᱢᱟᱹᱱᱤ ᱢᱟᱭᱱᱚ ᱴᱩᱰᱩ ᱟᱜ ᱢᱚᱪᱟᱛᱮ ᱱᱚᱶᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱹᱰᱤ ᱟᱸᱴ ᱤᱧ ᱨᱟᱹᱥᱠᱟᱹ ᱮᱱᱟ, ᱟᱹᱰᱤ ᱟᱸᱴ ᱤᱧ ᱠᱩᱥᱤ ᱮᱱᱟ ᱾ ᱛᱤᱨᱞᱟᱹ ᱳᱱᱚᱞᱤᱭᱟᱹ ᱠᱚ ᱢᱚᱛᱚᱛᱮ ᱥᱟᱸᱳᱦᱮᱫ ᱯᱟᱛᱷᱟᱢ ᱠᱚ ᱳᱸᱰᱳᱠᱟ ᱱᱚᱶᱟ ᱢᱟ ᱟᱹᱰᱤ ᱨᱟᱹᱥᱠᱟᱹ ᱟᱨ ᱜᱚᱨᱚᱵᱽ ᱨᱮᱱᱟᱜ ᱠᱟᱛᱷᱟ ᱾ ᱵᱷᱟᱨᱚᱛ ᱫᱤᱥᱚᱢ ᱨᱮ ᱱᱤᱛ ᱦᱟᱹᱵᱤᱡ ᱛᱮ ᱟᱵᱚ ᱥᱟᱱᱛᱟᱲ ᱥᱟᱸᱳᱛᱟ ᱨᱮᱱ ᱚᱱᱚᱞᱤᱭᱟᱹ ᱠᱚᱢᱟ ᱦᱮᱸᱜᱮ, ᱮᱢᱚᱱ ᱪᱮᱫ ᱮᱴᱟᱜ ᱜᱟᱸᱛᱟᱠ ᱨᱮᱱ ᱛᱤᱨᱞᱟᱹ ᱳᱱᱚᱞᱤᱭᱟᱹ ᱠᱚ ᱢᱚᱛᱚᱛᱮ ᱥᱟᱸᱳᱦᱮᱫ ᱯᱟᱛᱷᱟᱢ ᱳᱸᱰᱳᱠ ᱫᱚ ᱢᱤᱫ ᱢᱟᱨᱟᱝ ᱱᱟᱜᱟᱢ ᱠᱟᱱ ᱜᱮᱭᱟ ᱾

 ᱛᱤᱦᱤᱧ ᱜᱟᱯᱟ ᱫᱚ ᱥᱟᱸᱳᱦᱮᱫ ᱯᱟᱛᱷᱟᱱ ᱨᱮᱱᱟᱜ ᱟᱹᱰᱤ ᱟᱸᱴ ᱟᱱᱟᱴ ᱧᱮᱞᱚᱜ ᱠᱟᱱᱟ ᱾ ᱱᱟᱶᱟ ᱚᱱᱚᱞᱤᱭᱟᱹ ᱠᱚ ᱵᱟᱝ ᱠᱚ ᱵᱮᱱᱟᱣ ᱨᱟᱠᱟᱵᱚᱜ ᱠᱟᱱᱟ ᱾ ᱥᱟᱸᱳᱦᱮᱫ ᱯᱟᱛᱷᱟᱢ ᱫᱚ ᱮᱸᱜᱟᱛ ᱠᱩᱠᱷᱤ ᱥᱟᱞᱟᱜ ᱛᱤᱞᱤᱡ ᱜᱟᱱᱚᱜᱼᱟ ᱾

 ᱟᱸᱥᱚᱜ ᱟᱹᱧ “ ᱟᱭᱳ ᱟᱲᱟᱝ ” ᱥᱟᱸᱳᱦᱮᱫ ᱯᱟᱛᱷᱟᱢ ᱫᱚ ᱱᱟᱶᱟ ᱚᱱᱚᱞᱤᱭᱟᱹ ᱠᱚ ᱡᱮᱞᱮᱠᱟᱭᱮ ᱵᱮᱱᱟᱣ ᱨᱟᱠᱟᱵ ᱠᱚᱣᱟ ᱾ ᱴᱷᱤᱠ ᱚᱱᱠᱟ ᱞᱮᱠᱟᱜᱮ ᱥᱟᱸᱳᱦᱮᱫ ᱜᱷᱟᱨᱚᱸᱡᱽ ᱨᱮ ᱢᱤᱫ ᱱᱟᱶᱟ ᱟᱨ ᱢᱟᱨᱟᱝ ᱱᱟᱜᱟᱢᱮ ᱛᱮᱭᱟᱨᱟ ᱾

 ᱟᱸᱥᱚᱜ ᱟᱹᱧ ᱚᱱᱚᱞᱤᱭᱟᱹ ᱠᱚ, ᱯᱟᱲᱦᱟᱣ ᱛᱮᱱᱠᱚ, ᱥᱟᱱᱟᱢ ᱠᱚᱜᱮ ᱥᱟᱱᱟᱢ ᱯᱟᱦᱴᱟ ᱥᱮᱡ ᱠᱷᱚᱱ ᱜᱚᱲᱚ ᱥᱚᱯᱚᱦᱚᱫ ᱵᱚᱱ ᱮᱢᱚᱜᱼᱟ ᱾

 “ ᱟᱭᱳ ᱟᱲᱟᱝ ” ᱥᱟᱸᱶᱦᱮᱫ ᱯᱟᱛᱷᱟᱢ ᱨᱮᱱ ᱥᱟᱱᱟᱢ ᱜᱟᱛᱮ ᱠᱚ ᱨᱟᱹᱥᱭᱟᱹ ᱠᱚᱢᱟ ᱦᱮᱸᱜᱮ, ᱥᱟᱸᱳ ᱥᱟᱸᱳᱛᱮ ᱥᱟᱱᱟᱢ ᱛᱤᱨᱞᱟᱹ ᱳᱱᱚᱞᱤᱭᱟᱹ ᱠᱚ ᱞᱟᱹᱴᱩ ᱠᱚᱫᱚ ᱤᱧᱟᱜ ᱚᱛ ᱡᱟᱯᱟᱜ ᱡᱚᱦᱟᱨ ᱟᱨ ᱠᱟᱹᱴᱤᱡ ᱠᱚᱫᱚ ᱵᱟᱝ ᱪᱟᱵᱟᱜ ᱫᱩᱞᱟᱹᱲ ᱛᱷᱩᱢ ᱛᱟᱦᱮᱸᱭᱮᱱᱟ ᱾

ᱡᱚᱦᱟᱨ !!! ᱪᱚᱱᱰᱤ ᱪᱚᱨᱚᱱ ᱠᱤᱥᱠᱩ , ᱯᱟᱨᱥᱮᱛ , ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱸᱳᱛᱟ ᱿



ᱵᱟᱰᱟᱭ ᱠᱟᱛᱮ ᱟᱹᱰᱤ ᱨᱟᱹᱥᱠᱟᱹᱧ ᱟᱴᱠᱟᱨ ᱠᱮᱫᱟ ᱡᱮ ᱵᱤᱥᱟᱠᱷᱟᱯᱟᱴᱱᱟᱢ ᱨᱮ ᱟᱵᱚᱨᱮᱱ ᱵᱷᱟᱨᱚᱛ ᱡᱟᱠᱟᱛ ᱨᱤᱱ ᱛᱤᱨᱞᱟᱹ ᱥᱮ ᱠᱩᱲᱤ ᱦᱚᱯᱚᱱ ᱚᱱᱚᱞᱤᱭᱟᱹ ᱠᱚ, ᱢᱮᱱᱮᱛ ᱟᱭᱳ ᱠᱚ, ᱫᱟᱹᱭ ᱠᱚ, ᱢᱟᱹᱭ ᱠᱚ, ᱟᱨ ᱵᱤᱴᱤ ᱛᱮᱠᱚ ᱠᱚ ᱥᱩᱛᱩᱜ ᱠᱟᱛᱮ ᱢᱤᱫ ᱤ-ᱯᱟᱛᱷᱟᱢ ᱥᱮ E-Magazine ᱥᱟᱯᱲᱟᱣ ᱞᱟᱹᱜᱤᱫ ᱠᱚ ᱠᱩᱨᱩᱢᱩᱴᱩ ᱟᱠᱟᱫᱼᱟ ᱱᱚᱣᱟ ᱵᱟᱠᱷᱨᱟ ᱟᱭᱢᱟ ᱥᱟᱨᱦᱟᱣ ᱤᱧ ᱪᱟᱞ ᱟᱯᱮ ᱠᱟᱱᱟ ᱾ ᱠᱩᱲᱤ ᱦᱚᱯᱚᱱᱟᱜ ᱫᱚ ᱟᱭᱢᱟ ᱨᱩᱯ ᱼ ᱟᱭᱳ ᱞᱮᱠᱟᱛᱮ, ᱢᱤᱥᱮᱨᱟ ᱞᱮᱠᱟᱛᱮ, ᱮᱨᱟ ᱞᱮᱠᱟᱛᱮ ᱟᱨ ᱦᱚᱯᱚᱱᱮᱨᱟ ᱞᱮᱠᱟᱛᱮ ᱢᱮᱱᱟᱜ ᱟᱠᱟᱫᱟ ᱟᱨ ᱚᱱᱠᱟ ᱜᱮ ᱟᱞᱟᱭ ᱫᱟᱲᱮ, ᱥᱟᱦᱟᱣ ᱫᱟᱲᱮ ᱟᱨ ᱫᱩᱞᱟᱹᱲ ᱫᱟᱲᱮ ᱦᱚᱸ ᱢᱮᱱᱟᱜ ᱟᱠᱟᱫᱟ ᱾ ᱡᱚᱛᱚ ᱞᱮᱠᱟᱱ ᱦᱚᱨᱼᱰᱟᱦᱟᱨ ᱛᱮ ᱛᱟᱲᱟᱢ ᱨᱮᱱᱟᱜ ᱫᱟᱲᱮ ᱦᱚᱸ ᱢᱮᱱᱟᱜ ᱟᱠᱟᱫᱟ ᱾ ᱤᱧᱟᱜ ᱟᱥᱟ ᱢᱮᱱᱟᱜᱼᱟ ᱱᱚᱣᱟ ᱥᱟᱶᱦᱮᱫ ᱦᱟᱨᱟᱼᱵᱩᱨᱩᱭ ᱞᱟᱹᱜᱤᱫ ᱯᱮ ᱛᱟᱲᱟᱢ ᱟᱠᱟᱫ ᱰᱟᱦᱟᱨ ᱨᱮᱦᱚᱸ ᱞᱤᱸᱜᱤᱱ ᱜᱟᱰᱟ ᱫᱟᱜ ᱞᱮᱠᱟ ᱞᱟᱦᱟ ᱥᱮᱱ ᱯᱮ ᱞᱟᱦᱟ ᱥᱮᱱᱚᱜᱼᱟ ᱾ ᱟᱯᱮ ᱪᱮᱛᱟᱱ ᱨᱮ ᱤᱧᱟᱜ ᱫᱩᱞᱟᱹᱲ ᱟᱨ ᱛᱷᱩᱢ ᱛᱟᱦᱮᱸᱭᱮᱱᱟ ᱾ ᱢᱩᱪᱟᱹᱫ ᱨᱮ ᱵᱟᱨ ᱛᱷᱟᱨ ᱼᱼᱼ

ᱛᱤᱨᱞᱟᱹ

ᱚᱱᱛᱚᱨ ᱢᱚᱱᱮ ᱦᱚᱦᱚ ᱟᱢᱟᱜ, ᱥᱟᱡᱟᱣ ᱢᱮᱛᱟᱢ ᱠᱟᱛᱷᱟ ᱛᱮ, ᱚᱱᱟ ᱠᱟᱛᱷᱟ ᱥᱚᱫᱚᱨ ᱢᱮᱛᱟᱢ, ᱚᱱᱚᱞ ᱛᱟᱞᱟ ᱛᱮ ᱾

ᱛᱤᱨᱞᱟᱹ, ᱟᱢᱟᱜ ᱛᱤᱨᱮ ᱫᱟᱲᱮ ᱢᱮᱱᱟᱜ, ᱥᱟᱱᱟᱢ ᱠᱟᱹᱢᱤ ᱨᱮᱱᱟᱜ ᱾

ᱡᱚᱦᱟᱨ, ᱭᱚᱥᱳᱫᱟ ᱢᱩᱨᱢᱩ, ᱱᱟᱣᱟ ᱫᱤᱞᱞᱤ ᱿


ᱟᱭᱳ ᱟᱲᱟᱝ

ᱟᱭᱳ ᱟᱲᱟᱝ ᱫᱚ ᱢᱤᱫ ᱡᱟᱹᱛᱤ ᱥᱚᱢᱟᱡᱽ ᱨᱮᱱᱟᱜ ᱩᱯᱨᱩᱢ ᱠᱟᱱᱟ ᱾
ᱢᱤᱫᱴᱟᱹᱝ ᱢᱟᱹᱱᱢᱤᱭᱟᱜ ᱩᱱᱩᱨᱩᱢ ᱟᱭᱳ ᱟᱲᱟᱝ ᱛᱮᱜᱮ ᱦᱩᱭᱩᱜ-ᱟ ᱾ ᱟᱨ ᱱᱚᱶᱟ ᱫᱚ ᱟᱭᱳ ᱵᱟᱵᱟ ᱜᱮ ᱜᱤᱫᱽᱨᱟᱹ ᱠᱚ ᱥᱮᱬᱟ ᱚᱪᱚ ᱞᱟᱹᱠᱛᱤᱜ ᱠᱟᱱᱟ ᱾
ᱡᱟᱦᱟᱸᱭ ᱦᱚᱲ ᱟᱭᱳ ᱟᱲᱟᱝ ᱛᱮ ᱵᱟᱭ ᱨᱚᱲᱟ, ᱵᱟᱭ ᱥᱮᱪᱮᱫᱚᱜ-ᱟ ᱩᱱᱤᱭᱟᱜ ᱫᱚ ᱢᱟᱹᱱᱢᱤ ᱡᱚᱱᱚᱢ ᱵᱟᱭ ᱥᱚᱨᱮᱥᱚᱜ-ᱟ ᱾

ᱟᱵᱚ ᱠᱷᱮᱨᱣᱣᱟᱲ ᱵᱤᱨᱟᱹᱫᱟᱹᱞᱤ ᱠᱚᱣᱟᱜ ᱠᱟᱹᱦᱱᱤ, ᱠᱩᱫᱩᱢ, ᱮᱱᱮᱡ, ᱥᱮᱨᱮᱧ, ᱵᱤᱱᱛᱤ, ᱵᱟᱠᱷᱮᱬ ᱡᱚᱛᱚ ᱢᱮᱱᱟᱜ ᱛᱟᱵᱚᱱ ᱾

ᱟᱭᱳ ᱟᱲᱟᱝ ᱛᱮᱜᱮ ᱱᱚᱶᱟ ᱠᱚᱫᱚ ᱥᱟᱹᱲᱭᱟ ᱟᱨ ᱨᱟᱹᱭᱞᱟᱹ ᱥᱟᱺᱦᱤᱡ ᱟᱲᱟᱝᱤᱜ-ᱟ ᱾ ᱟᱭᱳ ᱟᱲᱟᱝ ᱛᱮ ᱥᱮᱪᱮᱜ ᱞᱮᱱᱠᱷᱟᱱ ᱟᱯᱱᱟᱨᱟᱜ ᱥᱚᱱᱟᱡᱽ, ᱥᱟᱶᱛᱟ, ᱥᱟᱶᱦᱮᱫ, ᱟᱹᱨᱤᱪᱟᱹᱞᱤ, ᱞᱟᱹᱭ ᱞᱟᱠᱪᱟᱨ, ᱦᱟᱨᱟᱵᱩᱨᱩᱜ-ᱟ ᱾
ᱟᱭᱳ ᱟᱲᱟᱝ ᱜᱮ ᱜᱤᱫᱽᱨᱟᱹ ᱠᱚᱣᱟᱜ ᱢᱟᱨᱟᱝ ᱥᱤᱠᱷᱱᱟᱹᱛ ᱠᱟᱱᱟ ᱾ ᱡᱟᱦᱟᱸ ᱯᱟᱹᱨᱤᱥ ᱨᱤᱱᱤᱡ ᱡᱟᱹᱛᱤ ᱜᱮᱭ ᱦᱩᱭ ᱦᱚᱪᱚ ᱟᱡᱟᱜ ᱟᱭᱳ ᱟᱲᱟᱝ ᱛᱮᱭ ᱟᱲᱟᱝ ᱞᱮᱠᱷᱟᱱ ᱥᱟᱱᱟᱢ ᱠᱟᱹᱢᱤ ᱨᱮᱜᱮ ᱞᱟᱦᱟ ᱨᱮᱭ ᱛᱟᱦᱮᱸᱱᱟ ᱢᱮᱱᱛᱮ ᱤᱧᱟᱜ ᱯᱟᱹᱛᱭᱟᱹᱣ ᱛᱟᱦᱮᱸ ᱮᱱᱟ ᱾

ᱵᱮᱲᱟᱭ ᱨᱟᱠᱟᱵ ᱵᱟᱨᱟᱝ ᱵᱟᱨᱟᱝ
ᱟᱭᱳᱣᱟᱜ ᱟᱲᱟᱝ ᱡᱤᱲᱤᱫ ᱡᱟᱲᱟᱝ
ᱫᱷᱟᱹᱨᱛᱤ ᱛᱟᱞᱟᱨᱮ ᱴᱟᱲᱟᱝ ᱴᱟᱲᱟᱝ
ᱨᱚᱯᱚᱲ ᱜᱟᱱᱟᱢ ᱫᱤᱱᱟᱹᱢ ᱢᱟᱬᱟᱝ ᱾

ᱤᱧ ᱜᱮ ᱥᱚᱯᱱᱟ ᱦᱮᱸᱵᱽᱨᱚᱢ,
ᱠᱷᱚᱲᱚᱜᱽᱯᱩᱨ ᱾


ᱤᱧ ᱱᱚᱶᱟ ᱵᱟᱰᱟᱭ ᱠᱟᱛᱮ ᱟᱹᱰᱤ ᱨᱟᱹᱥᱠᱟᱹᱧ ᱟᱹᱭᱠᱟᱹᱣ ᱠᱮᱫᱼᱟ ᱪᱮ ᱢᱟᱭᱱᱚ ᱴᱩᱰᱩ ᱢᱟᱹᱭᱟᱜ ᱠᱩᱨᱩᱢᱩᱴᱩ ᱪᱷᱩᱴᱟᱹᱣ ᱛᱟᱞᱟᱛᱮ “ᱟᱭᱳ ᱟᱲᱟᱝ” ᱤᱼᱯᱟᱛᱷᱟᱢ ᱥᱟᱯᱲᱟᱣ ᱮᱱᱟ ᱟᱨ ᱩᱪᱷᱟᱹᱱᱚᱜ ᱦᱚᱸ ᱮᱭᱦᱚᱵ ᱮᱱᱟ ᱾ ᱱᱚᱶᱟ ᱫᱚ ᱛᱤᱨᱞᱟᱹ ᱪᱮ ᱠᱩᱲᱤ ᱦᱚᱯᱚᱱ ᱠᱚᱣᱟᱜ ᱮᱛᱚᱦᱚᱵ ᱤᱼᱯᱟᱛᱷᱟᱢ ᱠᱟᱱᱟ ᱢᱮᱱᱛᱤᱧ ᱢᱚᱱᱮᱭᱟ ᱪᱮᱫᱟᱜ ᱵᱟᱝ ᱢᱟ ᱱᱚᱶᱟ ᱢᱟᱬᱟᱝ ᱫᱚ ᱠᱩᱲᱤ ᱦᱚᱯᱚᱱ ᱠᱚ ᱥᱩᱢᱩᱝ ᱞᱟᱹᱜᱤᱫ ᱫᱚ ᱵᱟᱭ ᱛᱟᱦᱮᱸ ᱠᱟᱱᱟ ᱾
ᱱᱤᱛᱚᱜᱟᱜ ᱱᱚᱶᱟ ᱞᱟᱦᱟᱜ ᱥᱚᱥᱱᱚᱜ ᱡᱩᱜᱽᱨᱮ ᱡᱟᱦᱟᱸᱭ ᱡᱟᱹᱛᱤ ᱱᱚᱶᱟ ᱡᱮᱜᱮᱛ ᱛᱟᱞᱟᱨᱮ ᱡᱟᱭᱡᱩᱜᱽ ᱡᱤᱣᱤᱫᱚᱜ ᱥᱟᱱᱟᱭ ᱠᱷᱟᱱ ᱩᱱᱤ ᱫᱚ ᱢᱟᱬᱟᱝ ᱛᱮ ᱟᱡᱟᱜ ᱡᱟᱱᱟᱢ ᱯᱟᱹᱨᱥᱤ ᱛᱮ ᱥᱮᱪᱮᱫᱚᱜ ᱟᱨ ᱡᱟᱱᱟᱢ ᱯᱟᱹᱨᱥᱤ ᱛᱮ ᱥᱟᱶᱦᱮᱫ ᱦᱟᱨᱟᱵᱩᱨᱩ ᱡᱮᱢᱚᱱ ᱯᱟᱛᱷᱟᱢ ᱯᱚᱛᱚᱵ ᱠᱚ ᱚᱞ ᱠᱟᱛᱮ ᱡᱚᱛᱚ ᱦᱚᱲ ᱴᱷᱮᱱ ᱥᱚᱫᱚᱨ ᱫᱚ ᱟᱹᱰᱤᱛᱮᱫ ᱜᱮ ᱞᱟᱹᱠᱛᱤᱜ ᱠᱟᱱᱟ ᱾ ᱯᱟᱛᱷᱟᱢ ᱯᱚᱛᱚᱵ ᱨᱮᱜᱮ ᱥᱟᱱᱟᱢ ᱞᱮᱠᱟᱱᱟᱜ ᱟᱹᱠᱤᱞ ᱜᱮᱭᱟᱱ, ᱱᱟᱜᱟᱢ, ᱥᱟᱬᱮᱥ, ᱜᱟᱢᱟᱢ, ᱚᱱᱚᱞ, ᱠᱟᱹᱦᱱᱤ, ᱚᱱᱚᱬᱦᱮ, ᱵᱤᱱᱛᱤ, ᱵᱟᱠᱷᱮᱬ, ᱠᱩᱫᱩᱢ, ᱠᱟᱹᱦᱛᱩᱠ, ᱥᱮᱨᱮᱧ, ᱫᱷᱚᱨᱚᱢ, ᱞᱟᱠᱪᱟᱨ, ᱮᱢᱟᱱ ᱥᱟᱱᱟᱢᱟᱜ ᱠᱟᱛᱷᱟ ᱠᱚ ᱚᱞ ᱛᱚᱞ ᱠᱟᱛᱮ ᱛᱟᱦᱮᱸᱱᱟ ᱾
ᱥᱟᱱᱟᱢ ᱦᱚᱲ ᱜᱮ ᱵᱚᱱ ᱵᱟᱰᱟᱭᱟ ᱛᱤᱨᱞᱟᱹ ᱪᱮ ᱠᱩᱲᱤ ᱦᱚᱯᱚᱱ ᱫᱚ ᱥᱤᱨᱡᱚᱱᱤᱭᱟᱹ ᱠᱟᱱᱟ ᱵᱚᱱ ᱜᱷᱟᱨᱚᱸᱡᱽ ᱨᱮ ᱚᱲᱟᱜ ᱫᱩᱣᱟᱹᱨ ᱨᱮᱱᱟᱜ ᱠᱟᱹᱢᱤ ᱠᱟᱹᱥᱱᱤ, ᱜᱤᱫᱽᱨᱟᱹ ᱯᱤᱫᱽᱨᱟᱹ, ᱯᱮᱲᱟ ᱯᱩᱨᱵᱷᱩ ᱧᱮᱞ ᱥᱟᱢᱴᱟᱣ ᱛᱩᱞᱩᱡ ᱥᱟᱶᱛᱟ ᱨᱮᱱᱟᱜ ᱠᱟᱹᱢᱤ ᱟᱨ ᱥᱟᱶᱦᱮᱫ ᱥᱤᱨᱡᱟᱹᱣ ᱨᱮᱦᱚᱸ ᱟᱵᱚᱣᱟᱜ ᱮᱱᱮᱢ ᱫᱚ ᱟᱹᱰᱤ ᱜᱮ ᱦᱟᱦᱟᱲᱟ ᱜᱮᱭᱟ ᱾ ᱟᱵᱚ ᱫᱚ ᱡᱚᱱᱚᱢ ᱚᱱᱚᱬᱦᱤᱭᱟᱹ ᱠᱟᱱᱟ ᱵᱚᱱ, ᱡᱟᱦᱟᱸᱱᱟᱜ ᱵᱚᱱ ᱧᱮᱞᱟ, ᱟᱸᱡᱚᱢᱟ, ᱟᱹᱭᱠᱟᱹᱣᱟ ᱚᱱᱟ ᱜᱮ ᱞᱩᱴᱤ ᱠᱷᱚᱱ ᱥᱤᱵᱤᱞ ᱥᱚᱲᱚᱢ ᱨᱟᱦᱟ ᱛᱮ ᱵᱚᱱ ᱯᱷᱚᱴᱮᱞ ᱚᱰᱚᱠᱟ ᱾
ᱱᱚᱶᱟ “ᱟᱭᱳ ᱟᱲᱟᱝ” ᱤᱼᱯᱟᱛᱷᱟᱢ ᱨᱮᱦᱚᱸ ᱚᱱᱠᱟᱱᱟᱜ ᱠᱚᱜᱮ ᱵᱚᱱ ᱥᱚᱫᱚᱨ ᱢᱟ ᱡᱮᱢᱚᱱ ᱠᱟᱹᱢᱤ ᱞᱟᱸᱜᱟ ᱩᱫᱽᱜᱟᱹᱨ ᱦᱟᱣᱮᱫ ᱦᱚᱲ ᱦᱚᱸ ᱱᱚᱶᱟ ᱯᱟᱲᱦᱟᱣ ᱠᱟᱛᱮ ᱡᱤᱭᱟᱹᱲ ᱜᱚᱢᱦᱮᱲ ᱜᱟᱡᱟᱲ ᱩᱢᱩᱞ ᱨᱮ ᱢᱮᱱᱟᱭ ᱞᱮᱠᱟᱭ ᱟᱹᱭᱠᱟᱹᱣ ᱢᱟ ᱾ ᱨᱮᱸᱜᱮᱡ ᱛᱮᱛᱟᱝ ᱤᱡ ᱦᱚᱸ ᱟᱡᱟᱜ ᱢᱚᱱᱮ ᱡᱤᱣᱤ ᱛᱤᱨᱯᱤᱫ ᱠᱟᱛᱮ ᱱᱤᱨᱟᱹᱭ ᱮ ᱧᱟᱢ ᱢᱟ ᱾ ᱱᱚᱶᱟ ᱯᱟᱛᱷᱟᱢ ᱨᱮ ᱥᱮᱞᱮᱫᱚᱜ ᱠᱟᱱ ᱜᱩᱱᱢᱟᱱ ᱥᱟᱹᱜᱩᱱ ᱥᱟᱯᱟᱨᱚᱢ, ᱟᱱᱟᱫᱚᱲ ᱚᱱᱚᱬᱦᱮ, ᱠᱟᱹᱦᱱᱤ, ᱠᱩᱫᱩᱢ, ᱠᱟ.ᱦᱛᱩᱠ, ᱚᱱᱚᱞ ᱮᱢᱟᱱᱟᱜ ᱠᱚ ᱯᱟᱲᱦᱟᱣ ᱞᱮᱠᱷᱟᱱ ᱥᱟᱱᱟᱢ ᱦᱚᱲᱟᱜ ᱢᱚᱱᱮᱨᱮ ᱩᱭᱦᱟᱹᱨ ᱛᱟᱦᱮᱸᱱᱟ ᱥᱟᱶᱛᱮ ᱡᱤᱣᱤ ᱦᱚᱲᱢᱚ ᱨᱮ ᱪᱤᱨᱜᱟᱹᱞ ᱟᱨ ᱪᱮᱴᱠᱟᱨ ᱨᱮᱱᱟᱜ ᱢᱤᱫ ᱱᱟᱶᱟ ᱛᱟᱨᱟᱥ ᱛᱟᱨᱥᱮᱜ ᱨᱟᱠᱟᱵᱚᱜ ᱨᱮᱱᱟᱜ ᱤᱧᱟᱜ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱟᱨ ᱥᱟᱱᱛᱟᱲᱤ ᱥᱟᱶᱦᱮᱫ ᱦᱟᱨᱟᱵᱩᱨᱩ ᱨᱮᱱᱟᱜ ᱥᱟᱱᱟᱝ ᱥᱟᱨᱥᱟᱣᱜᱼᱟ ᱟᱨ ᱟᱵᱚ ᱛᱟᱞᱟᱨᱮ ᱢᱤᱫ ᱱᱟᱶᱟ ᱪᱤᱱᱦᱟᱹ ᱟᱨ ᱩᱯᱨᱩᱢ ᱮ ᱥᱚᱫᱚᱨᱟ ᱢᱮᱱᱛᱮ ᱟᱸᱥ ᱤᱧ ᱫᱚᱦᱚ ᱠᱮᱫᱼᱟ ᱾
ᱱᱚᱶᱟ ᱤᱼᱯᱟᱛᱷᱟᱢ “ᱟᱭᱳ ᱟᱲᱟᱝ” ᱞᱤᱸᱜᱤᱱ ᱜᱟᱰᱟ ᱞᱮᱠᱟ ᱞᱮᱛᱟᱲ ᱜᱮ ᱞᱤᱸᱜᱤ ᱟᱠᱟ ᱛᱟᱦᱮᱸᱱ ᱢᱟ ᱟᱡᱟᱜ ᱚᱱᱟ ᱞᱟᱯᱷᱟᱝ ᱴᱷᱟᱹᱣᱠᱟᱹ ᱴᱷᱟᱶᱨᱮ ᱥᱮᱴᱮᱨᱚᱜ ᱢᱟ ᱱᱚᱶᱟ ᱜᱮ ᱡᱟᱦᱮᱨ ᱟᱭᱳ ᱴᱷᱮᱱ ᱤᱧ ᱱᱮᱦᱚᱸᱨᱚᱜ ᱠᱟᱱᱟ ᱾ ᱚᱱᱟ ᱥᱟᱶᱛᱮ ᱱᱚᱶᱟ ᱯᱟᱛᱷᱟᱢ ᱥᱟᱥᱟᱯᱲᱟᱣᱤᱡ ᱢᱟᱹᱭ ᱢᱟᱭᱱᱚ ᱴᱩᱰᱩ ᱫᱚ ᱟᱹᱰᱤ ᱟᱹᱰᱤ ᱚᱱᱛᱚᱨ ᱢᱚᱱᱮ ᱠᱷᱚᱱ ᱥᱟᱨᱦᱟᱣ ᱤᱧ ᱪᱟᱞᱟᱭ ᱠᱟᱱᱟ ᱡᱮᱢᱚᱱ ᱱᱚᱝᱠᱟ ᱜᱮ ᱥᱟᱶᱦᱮᱫ ᱦᱟᱨᱟᱵᱩᱨᱩ ᱨᱮ ᱵᱚᱸᱜᱟ ᱵᱳᱨᱳ ᱠᱚ ᱫᱟᱲᱮ ᱠᱚ ᱪᱟᱞᱟᱭ ᱢᱟ ᱾
“ᱫᱩᱞᱟᱹᱲ ᱥᱟᱞᱟᱜ ᱥᱟᱨᱦᱟᱣ”
ᱤᱧ ᱜᱮ
ᱡᱚᱵᱟ ᱢᱩᱨᱢᱩ
ᱡᱟᱢᱥᱮᱫᱽᱯᱩᱨ …


MESSAGE OF APPRECIATION

With immense pleasure I appreciate the Team of Santali Women Writers for their diligent effort for sustainable development of Santali literature, through education by the way of creative writing in the form of Stories, Poems and other valuable articles. Living far distance across India they came unitedly, to raise their voices cumulatively in the form of E-Magazine, named nicely as “AYO ARANG”, that means ‘Mothers Voices’. By accessing and reading articles posted in this E-Magazine, one can feel the heart touching sense of creativity, writing ability and reality of women position in our society. With a vehemence to show their ability to both taking care of Santali literature as well as family members, the Ayo Arang team has shown their mind strength beyond expectations.

I wish and hope this ‘AYO ARANG’ Santali E-Magazine will definitely sail through the heart of readers among Santali community throughout the world enriching the purposes as planned.

All The Best to Team AYO ARANG.

RAM CHANDRA TUDU

Member, Technical Support (Ayo Arang)

Executive Member-Central Committee

(All India Santali Writer’s Association)